1 Samuel 31

Sotho 1951 (BIBELE)

← Chapter 30 Jump to:

1Gomme Bafilisita ba hlabana le Baisiraele. Banna ba Isiraele ba rakwa ke Bafilisita; ba ba bolailwego ba tlala dithabeng tša Giliboa.

2Bafilisita ba dika Saulo le barwa ba gagwe, ba bolaya Jonathane le Abinadaba le Malakisua barwa ba Saulo.

3Tlhabano ya ba e thata mo go bego go le Saulo, a kgonwa ke banna ba go betša ka mesebe, a gobatšwa gagologolo ke babetši bao.

4Saulo a laela morwadi wa dibetša tša gagwe a re: Swara tšhoša ya gago o ntlhabe ka yona, gore mašoboro ao a se tle a ntlhaba a ntira sekwero! Morwadi wa dibetša a gana ka go boifa. Saulo a tšea tšhoša ya gagwe a ipolaya ka go ikwetša mo go yona.

5Morwadi wa dibetša a bona Saulo a hwile, le yena a ipolaya ka go ikwetša mo go tšhoša, a hwa nae.

6Saulo o hwile ka mokgwa woo, le barwa ba gagwe, le morwadi wa dibetša tša gagwe, le banna ba gagwe ka moka. Ba hwile mohla woo felo gotee.

7Banna ba Isiraele ba ba bego ba le ka thoko yeno ya molala, le ba ba bego ba le ka mošono wa noka ya Jorodane, ge ba bona gore banna ba Isiraele ba tšhabile, le gore Saulo o hwile le barwa ba gagwe, ba tlogela metse ba tšhaba; gomme gwa tla Bafilisita ba dula go yona.

8Ka la ka moswana Bafilisita ba be ba tlile go hlakola ba ba bolailwego, ba hwetša Saulo le barwa ba gagwe ba bararo ba rapaletše dithabeng tša Giliboa;

9ba mo kgaola hlogo, ba mo apola ditlhamo, ba di iša nageng ya Bafilisita thoko tšohle, ba iša dikati mo nywakong ya medimo ya bona le mo setšhabeng.

10Ditlhamo tša gagwe ba di išitše ngwakong wa Asiterothe, setoto sa gagwe ba se fega morakong wa Bethesane.

11Ba motse wa Jabese wa Gileada ba kwa tše Bafilisita ba di dirilego Saulo.

12Banna ka moka ba bahlabani ba tšwa, ba lala ba sepela bošego ka moka, ba tla ba fegolla setoto sa Saulo, le ditoto tša barwa ba gagwe gona moo morakong wa Bethesane, ba di tliša motseng wa Jabese, ba di fiša ntshe.

13Ba tšea mašapo a bona ba a fihla lebitleng ka tlase ga mohlopi, ba ikona ba fetša matšatši a šupago.

← Chapter 30 Jump to: