1 Samuel 28

Sotho 1951 (BIBELE)

← Chapter 27 Jump to: Chapter 29 →

1Mehleng yeo Bafilisita ba rapa madira a bona ba tšwela Baisiraele. Akise a bolela le Dafida a re: Tseba gobane o tlo tšwa le nna o na le banna ba gago.

2Dafida a fetola a re: Go lokile! Ke mo o tlogo bona se mohlanka wa gago a tlogo se dira. Akise a re: Gona ke tlo go bea wa ba moloti wa hlogo ya ka ka mehla yohle.

3Ke mola Samuele a šetše a hwile, Baisiraele ba mo hlobogile ba mmolokile kua motseng wa gabo wa Rama. Saulo mo nageng ya gagwe o be a rakile dinoge le ba maphalo.

4Bafilisita ge ba bokana ba tla ba hloma mešaša Sunema. Saulo a rapa Baisiraele ka moka ba hloma mešaša Giliboa.

5Saulo ge a bona madira ao a Bafilisita, a boifa, pelo ya gagwe ya tšhoga gagolo.

6A botšiša Morena; gomme Morena a se mo fetole, le ge e le ka diloro, le ge e le ka seetša, le ge e le ka baporofeta.

7Ke moka Saulo a laela bahlanka ba gagwe a re: Nnyakeleng mosadi wa senoge, ke ye go yena ke mmotšiše. Bahlanka ba gagwe ba mmotša ba re: Mosadi wa senoge šo, o fa Endoro.

8Saulo a ikgakantšha, a apara diaparo di šele, a ya a na le banna ba babedi; ba tla go mosadi eo e le bošego; mme Saulo a re: Nnogele ka bonoge, o ntsošetše yo ke tlogo go botša.

9Mosadi a fetola a re: O reng o nkiša moreong gore o mpolaye, etšwe o tsebe se Saulo a se dirilego ge a fediša dinoge le ba maphalo mo lefaseng leno.

10Saulo a mo enela ka Morena a re: Ka bophelo bja Morena, o ka se ke wa ba le molato ka taba ye.

11Mosadi a re: Ke go tsošetše mang? Saulo a re: Ntsošetše Samuele.

12Ya re ge mosadi a bona Samuele, a goa ka lentšu le legolo a bolela le Saulo a re: O mphoretšeng? Ke wena Saulo.

13Kgoši ya fetola ya re: Se boife! O bonang? Mosadi a re: Ke bona modimo o rotoga o etšwa fase.

14Saulo a re: Sebopego sa wona ke se sebjang? Mosadi a re: Go rotoga monna wa mokgalabje; o apere kobo. Saulo a tseba gore ke Samuele, a khunama a lotšha.

15Bjale Samuele a bolela le Saulo a re: O reng o ntshwenya wa ntsoša? Saulo a re: Ke tlaletšwe gagolo, ka gobane Bafilisita ba ntšwetše dira, gomme Modimo o ntlogetše; ga a mphetole, le ge e le ka baporofeta, le ge e le ka diloro. Ke ka baka leo ke go biditšego gore o mpotše se nkago se dira.

16Samuele a re: O sa mpotšišang etšwe Morena a go tlogetše, a ba lenaba la gago?

17Morena o dira se a se boletšego ka nna; o go amoga mmušo, mme o o neela wa geno, Dafida.

18Ke ka baka la ge o sa ka wa kwa se Morena a bego a se bolela, o sa ka wa phetha se a bego a go laetše sona mola bogale bja gagwe bo tuketše Baamaleke. Ke ka baka leo Morena a go dirago tšona tše tša lehono.

19Gomme le Baisiraele Morena o tlo ba gafela diatleng tša Bafilisita gotee le wena. Bosasa o tlo ba le nna fa, le barwa ba gago. Le madira a Baisiraele o tlo a gafela diatleng tša Bafilisita.

20Ya ba gona Saulo a welago fase, a patlama ka botelele bja gagwe, a tšhogile tše Samuele a di boletšego; a felelwa ke maatla, ka gobane o be a sešo a ja selo letšatši ka moka le bošego ka moka.

21Mosadi yola ge a tla go Saulo, a hwetša a tšhogile gagolo, a bolela le yena a re: O di bone, nna molata wa gago ke dirile se o mpoditšego sona; e bile e le go gafa bophelo, ge ke dira ka mo o mpoditšego ka gona.

22Bjale le wena o ko theetše se nna molata wa gago ke se bolelago. A nke ke go tlišetše thathana ya bogobe, o je o tie maatla, o tsebo ikela ka tsela ya gago.

23Saulo a gana a re: Nka se ke ka ja! Bahlanka ba gagwe ba mo phegelela, le yena mosadi, a ba a kwa se ba se bolelago, a tsoga fase, a dula mo dilaong.

24Mosadi o be a na le namane e nonnego; e be e le lapeng la gagwe; a akgofa a e hlaba, a tšea bupi a bo duba, a apea dinkgwa tše di sa omelwago.

25A di tliša a di bea pele ga Saulo le bahlanka ba gagwe, gomme ba ja; ba ba ba tsoga ba sepela bošego bošego bjoo.

← Chapter 27 Jump to: Chapter 29 →