2 Chronicles 25

Tswana Setswana 1970

← Chapter 24 Jump to: Chapter 26 →

1E rile Amasia a simolola go busa, a bo a le dinyaga di le 25; a busa dinyaga di le 29 kwa Jerusalema; leina la ga mmaagwe e le Joatane wa Jerusalema.

2A dira tse di siameng mo matlhong a Morena, fela e seng ka pelo yotlhe.

3Mme e rile bogosi bo sena go mo tlhomamela a bolaya batlhanka ba gagwe ba ba bolaileng kgosi rraagwe.

4Fela a se ka a bolaya bomorwaa-bone, mme a dira jaaka go kwadilwe mo molaong mo lokwalong lwa ga Moše, fa Morena a laetseng teng a re: “A borra-bana ba se ka ba swela bana, le bana ba se ka ba swela borraabo; gonne mongwe le mongwe o tshwanetse go swela boleo jwa gagwe fela.”

5Amasia o kile a phutha ba Juta, a ba rulaganya ka fa dikgorong, ba okametswe ke balaodi ba dikete le balaodi ba makgolo, e bong Bajuta le Babenyamene botlhe; a ba bala go simolola ka ba ba dinyaga tse di 20 le bomogoloa-bone, a fitlhela ba ba tlhaotsweng ba le 300 000 ba ba ka bololang mephatong, ba tshotse marumo le dithebe.

6Le gona a rapa bagale ba le 100 000 kwa Iseraeleng ka ditalente di le 100 tsa selefera.

7Fela monna wa Modimo a tla kwa go ene a re: “Kgosi, a mephato ya Iseraele e se ka ya ya nao; gonne Morena ga a na le Baiseraele le e seng le Baeferaime botlhe.

8Mme o ye o le wesi, o itshupe o le thata mo tlhabanong. Go seng jalo Modimo o tla go diga fa pele ga mmaba. Gonne Modimo o na le thata go ka thusa le go ka diga.”

9Mme Amasia a botsa monna wa Modimo a re: “Ke direng ka ditalente di le 100 tse ke di neileng lesomo la Baiseraele?” Monna wa Modimo a re: “Morena o nonofile go go naya tse dintsi tse di fetang tseo.”

10Ke fa Amasia a ba tlhaola, e bong lesomo le le tsileng kwa go ene la Baeferaime gore ba boele kwa gae. Mme ba tukela Bajuta bogale thata, ba boela kwa gae ka bogale ba gaketse.

11Amasia a ba a nna pelokgale, a goga batlhabani ba gagwe, a ya kwa lebaleng la letswai, a bolaya ba Seire ba le 10 000.

12Bajuta ba tshwara ba le 10 000 ba bangwe gape ba sa phela, ba ba isa kwa godimo ga makgotlho a thaba, ba ba diga mo setlhoeng sa makgotlho, mme ba phanyega botlhe.

13Mme ba lesomo le Amasia a le busitseng gore ba se ka ba ya nae kwa tlhabanong, ba thukhutha mo metseng ya Juta go tloga kwa Samaria go fitlha kwa Bethorone, ba bolaya ba le 3 000 ba teng, ba thopa thopo e kgolo.

14Jaanong ya re Amasia a boa a sena go bolaya Baetomo, a tla le medimo ya ba Seire, a feta a e ipeela go nna medimo ya gagwe, a e obamela a e tshubela maswalo.

15Ke fa Morena a tukela Amasia bogale, a roma moporofeti kwa go ene go ya go mo raya a re: “O obamelelang medimo ya morafe e e se kang ya namolela morafe wa yona mo diatleng tsa gago?”

16Ya re a bua nae, Amasia a mo fetola a re: “O dirilwe ke mang mogakolodi wa kgosi? Didimala! Go seng jalo o tla itewa.” Ke fa moporofeti a didimala ka go re: “Ke lemoga gore Modimo o ikaeletse go go senya, ka o dirile jalo, mme o sa reetse kgakololo ya me.”

17Letsatsi le lengwe Amasia kgosi ya Juta a ikgakolola, a roma motho kwa go Joase morwa Joahase morwa Jehu kgosi ya Iseraele a re: “Tlaya, re thulane!”

18Mme Joase kgosi ya Iseraele a roma motho kwa go Amasia kgosi ya Juta, a re: “Mosu o o kwa Lebanone wa roma kwa mosetereng o o kwa Lebanone wa re: ‘Neela morwaake morwadio go nna mosadi.’ Mme diphologolo tsa naga tse di kwa Lebanone tsa feta tsa gataka mosu oo.

19Ka nnete o fentse Baetomo, ka moo o a ikgogomosa ka tlotlego. Jaanong he, nna kwa gae. Ke ka ntlha ya eng fa o re o itatlhela mo tatlhegong gore o we, wena le Bajuta nao?”

20Mme Amasia a se ka a utlwa; gonne go ne go tswa mo Modimong go mo neela mo diatleng tsa ga Joase, ka ba ineetse mo medimong ya Baetomo.

21Ke fa Joase kgosi ya Iseraele a bolola, mme ba thulana, ene le Amasia kgosi ya Juta kwa Betšhemeše wa Juta.

22Mme Bajuta ba fenngwa ke Baiseraele, ba tshaba, mongwe le mongwe a tshabela kwa gae.

23Mme Joase kgosi ya Iseraele a tshwara Amasia kgosi ya Juta morwa Joase morwa Ahasia kwa Betšhemeše, a mo isa kwa Jerusalema, a feta a thuba lobota lwa Jerusalema go tswa Kgorong ya Eferaime go fitlha Kgorong ya Sekhutlo boleele jwa mabogo a le 400.

24A ba a tsaya gouta yotlhe le selefera le dilo tsotlhe tse di fitlhelwang mo Ntlong ya Modimo mo tisong ya boora Obete-Etomo le mahumo a ntlo ya kgosi le batho ba peeletso, a ba a boela kwa Samaria.

25Ya re Joase morwa Joahase kgosi ya Iseraele a sena go swa Amasia morwa Joase kgosi ya Juta a sala a phela dinyaga di le 15.

26Ditirafalo tse dingwe tsa ga Amasia tsa pele le tsa morago kana di kwadilwe mo lokwalong lwa dikgosi tsa Juta le Iseraele.

27Go tloga sebakeng se Amasia a ikepileng mo Moreneng ka sona ba mo tsosetsa moferefere kwa Jerusalema. Ke fa a tshabela kwa Lagiše, mme ba roma batho, ba mo latelela kwa Lagiše, ba mmolaela teng.

28Ba mo tlisa ka dipitse, ba mo fitlha fa go borraagwe mo motseng wa ga Dafita.

← Chapter 24 Jump to: Chapter 26 →