Mark 16

Tswana (BAEBELE e e Boitshepo) 1992

← Chapter 15 Jump to:

1E rile Sabata o sena go feta, boMaria Magetalene, le Maria mma Jakobe, le Salome, ba reka ditlhatshana tsa malao gore ba ye go mo tlotsa.

2Ya re ka letsatsi la ntlha la beke, go le ka maphakela a magolo, ba tla ba fitlha fa phupung letsatsi le sena go tlhaba.

3Ba bo ba ntse ba raana ba re: “Mang yo o tlaa re tlosetsang lentswe fa molomong wa phupu?”

4Mme ya re ba tsholetsa matlho ba bona fa lentswe le setse le fidikolotswe, gonne le ne le le legolo thata.

5Mme ya re ba tsena mo phupung, ba bona motho wa lekau a dutse ka fa ntlheng ya letsogo le legolo, a apere kobo e tshweu; mme ba tseana.

6A ba raya a re: “Se tseaneng; lo batla Jesu wa Monasaretha yo o neng a bapotswe, o tsogile, ga a yo fa, bonang felo fa ba ne ba mmeile teng!

7Yang lo bolelele barutwa ba gagwe, le Petere, lo re, o lo etelela pele a ya Galilea; lo tlaa mmona teng jaaka a kile a lo bolelela.”

8Mme ba tswa mo phupung, ba tshaba, gonne go roroma le go gakgamala go ne go ba tshwere; mme ba se ka ba bua le ope sepe ka ba boifa.

9Jaana e rile a sena go tsoga go le ka maphakela ka letsatsi la ntlha la beke, a bonala pele kwa go Maria Magetalene, yo o kileng a kgoromeletsa ntle mewa e e maswe e e supang mo go ene.

10Ene a ya a bolelela bone ba ba kileng ba ne ba na nae, mme ba bo ba hutsafetse ba lela.

11Ya re ba utlwa fa a tshedile, a bile a bonywe ke ene, ba se ka ba dumela.

12Morago ga dilo tse a senogela bangwe ba le babedi ka tshwano e sele, ba le mo tseleng, ba tsamaela golo gongwe mo nageng.

13Le bone ba ya ba bolelela ba bangwe; le bone bao, ba se ka ba ba dumela.

14Morago a senogela ba ba 11 ba dutse ba ja; mme a ba kgoba ka go tlhoka go dumela ga bone, le ka bothata jwa dipelo tsa bone, ka ba ganne go dumela ba ba mmonyeng a sena go tsoga.

15A ba raya a re: “Yang mo lefatsheng lotlhe, lo rerele lobopo lotlhe Mafoko a a Molemo.

16Yo o dumelang a ba a kolobediwa, o tlaa bolokwa; yo o ganang go dumela o tlaa sekisiwa.

17Ditshupo tse, di tlaa dirana le ba ba dumelang: ba tlaa kgoromeletsa ntle mewa e e maswe ka leina la me; ba tlaa bua dipuo tse dintšha;

18ba tlaa tsholetsa dinoga, mme fa ba ka nwa se se bolayang, ga se ketla se ba utlwisa botlhoko gope; ba tlaa baya diatla mo balwetseng, mme ba tlaa fola.”

19Jalo, e rile Morena Jesu a sena go bua nabo, a tsholelediwa kwa legodimong, mme a dula ka fa letsogong le legolo la Modimo.

20Mme bone ba tswa, ba rera Mafoko a a Molemo mo ntlheng tsotlhe, Morena a ntse a dira nabo, a tlhomamisa lefoko ka ditshupo tse di diranang najo. Amen.

← Chapter 15 Jump to: