Revelation 22

Tswana (BAEBELE e e Boitshepo) 1992

← Chapter 21 Jump to:

1A mpontsha noka ya metsi a botshelo, e galalela jaaka legakwa, e tswa mo setulong sa bogosi sa Modimo le sa ga Kwana,

2e le mo gare ga mmila wa motse. Moseja ono ga noka, le moseja ole, ga bo go le setlhare sa botshelo, se se ungwang maungo a mehuta e le 12, se ungwa ka kgwedi nngwe le nngwe; makakaba a setlhare e ne e le a a fodisang merafe.

3Ga go ketla go tlhola go nna phutso gope; setulo sa bogosi sa Modimo le sa Kwana se tlaa nna mo go one; le batlhanka ba one ba tlaa o direla.

4Ba tlaa bona sefatlhogo sa one; le leina la one le tlaa nna mo diphatleng tsa bone.

5Ga go ketla go tlhola go nna bosigo gope; ga ba batle lesedi la lampa, le fa e le lesedi la letsatsi; gonne Morena Modimo o tlaa ba naya lesedi; mme ba tlaa busa ka bosakhutleng le ka bosaengkae.

6Mme a nthaya a re: “Mafoko a, a boikanngo le boammaaruri; Morena, Modimo wa mewa ya baperofeti, o romile moengele wa gagwe, a tla go bontsha batlhanka ba gagwe dilo tse di tlaa akofang di dirafala.”

7“Bonang, ke tloga ke tla ka bonako. Go sego yo o bolokang mafoko a polelo ya lokwalo lo.”

8Nna Johane, ke nna ke utlwileng, ka bona dilo tse. Mme e rile ke utlwa ke bona, ka wela fa fatshe ka re ke obamela fa dinaong tsa moengele yo o mpontshitseng dilo tse.

9Mme a nthaya a re: “O se ka wa ba wa dira jalo; ke motlhanka ka wena, le ka baperofeti ba gaeno, le ka ba ba bolokileng mafoko a lokwalo lo; obamela Modimo.”

10A nthaya a re: “O se ka wa kanela mafoko a polelo ya lokwalo lo, gonne lobaka lo setse lo le gaufi.

11Yo o leng tshiamololo, a a nne a dire tshiamololo; yo o leng leswe, a a nne a leswefadiwe; yo o leng tshiamo, a a nne a dire tshiamo, le yo o leng boitshepo a a nne a dirwe boitshepo fela jalo.”

12“Bonang, ke tloga ke tlaa ka bonako; tuelo ya me ke na nayo, gore ke duele motho mongwe le mongwe ka fa tiro ya gagwe e ntseng ka teng.

13Ke nna Alefa le Omega, wa ntlha le wa bofelo, tshimologo le bokhutlo.

14“Go sego ba ba tlhatswang dikobo tsa bone, gore ba nne le tshiamelo ya go tla mo setlhareng sa botshelo, le go tsena ka dikgoro mo motseng.

15Kwa ntle go dintša, le baloi, le bagokafadi, le babolai, le badiredi ba medimo ya disetwa, le mongwe le mongwe yo o ratang a ba a dira maaka.

16“Nna Jesu ke romile moengele wa me, go tla go lo tlhomamisetsa dilo tse gore e nne tsa diphuthego. Ke nna modi wa ga Dafite, le lotsalo lwa gagwe, naledi e e phatsimang ya moso.”

17Mowa le monyadwi ba re: “Tlaa!” Le yo o utlwang, a a ka a re: “Tlaa!” Le yo o nyorilweng a a tle; yo o ratang a a tseye metsi a botshelo, a a tseye fela a se na theko.

18Ke tlhomamisetsa motho mongwe le mongwe yo o utlwang mafoko a polelelopele ya lokwalo lo, ka re: Fa motho mongwe a ka a oketsa, Modimo o tlaa mo okeletsa ka dipetso tse di kwadilweng mo lokwalong lo.

19Mme fa motho mongwe a ka fokotsa mafoko a lokwalo lo lwa polelelopele, Modimo o tlaa tlosa kabelo ya gagwe mo setlhareng sa botshelo, le mo motseng o o boitshepo, e bong mo dilong tse di kwadilweng mo lokwalong lo.

20Yo o tlhomamisang dilo tse a re: “Ee, ke tloga ke tla ka bonako.” A go nne jalo: Tlaa, Morena Jesu.

21Tshegofatso ya Morena Jesu a e nne le baitshepi. Amen.

← Chapter 21 Jump to: