1 Chronicles 16

Chinese TTVR (現代台語譯本羅馬字版)

← Chapter 15 Jump to: Chapter 17 →

1Chiah-ê Lī-bī -lâng kng Siōng-tè ê iok-kūi ji̍p--khì, hē tī Tāi-pi̍t ūi-tio̍h iok-kūi tah ê pò͘-pîⁿ lāi-bīn, koh tī Siōng-tè ê bīn-chêng hiàn sio-hòa-chè kap pêng-an-chè.

2Tāi-pi̍t hiàn sio-hòa-chè kap pêng-an-chè liáu-āu, chiū hōng Siōng Chú ê miâ kā jîn-bîn chiok-hok.

3I koh pun mi̍h-kiāⁿ hō͘ Í-sek-lia̍t chèng-lâng, bô-lūn lâm-lú, ta̍k-ê lâng chi̍t tè piáⁿ, chi̍t tè bah, chi̍t lia̍p phû-tô-koaⁿ-oân.

4Tāi-pi̍t phài kúi-nā ê Lī-bī -lâng tī Siōng Chú ê iok-kūi chêng ho̍k-sāi, lâi khún-kiû, kám-siā, chheng-chàn Siōng Chú — Í-sek-lia̍t ê Siōng-tè.

5Tūi-tiúⁿ sī A-sat, hù-tūi-tiúⁿ sī Sat-ka-lī-a, koh ū Ngá-sih, Sī-bí-la-boa̍t, Iâ-hiat, Má-tha-thê-ngá, Í-lī-ap, Pí-ná-ngá, Gô-pia̍t Í-tong, Iâ-lī, tôaⁿ-khîm tôaⁿ-sek; A-sat phah-poa̍h phōaⁿ-chàu.

6Chè-si Pí-ná-ngá kap Ngá-hap-sek tī Siōng-tè ê iok-kūi chêng chiàu-sî pûn lat-pah.

7Hit-ji̍t, Tāi-pi̍t tē-it piàn chí-phài A-sat kap i ê chhin-cho̍k kám-siā Siōng Chú.

8Lín tio̍h kám-siā Siōng Chú, kiû-kiò I ê miâ, tī bān-bîn tiong pò-iông I ê chok-ûi.

9Tio̍h tùi I gîm-si, ǹg I chhiùⁿ-koa o-ló, tâm-lūn I it-chhè kî-biāu ê só͘-chòe.

10Tio̍h khoa-iāu I ê sèng-miâ. Goān chhē-kiû Siōng Chú ê lâng sim-lāi hoaⁿ-hí.

11Tio̍h óa-khò Siōng Chú kap I ê koân-lêng, put-sî chhē-kiû kìⁿ I ê bīn.

12I ê po̍k-jîn Í-sek-lia̍t ê hō͘-tāi, I só͘ kéng Ngá-kok ê kiáⁿ-sun ah, lín tio̍h siàu-liām I kî-biāu ê chok-ûi, siàu-liām I ê sîn-jiah kap I só͘ kóng phòaⁿ-toàn ê ōe.

14I sī Siōng Chú — lán ê Siōng-tè; I ê sím-phòaⁿ phó͘-ki̍p choân-tōe.

15Tio̍h ōe-kì-tit I ê iok ti̍t-kàu éng-oán, I ê èng-ún ti̍t-kàu bān-tāi.

16Tio̍h ōe-kì-tit I kap A-pek-la-hán li̍p ê iok, tùi Í-sat só͘ li̍p ê sè.

17I chiong chit-ê iok hō͘ Ngá-kok chòe kui-lē, hō͘ Í-sek-lia̍t chòe éng-oán ê iok.

18I kóng, “Góa beh chiong Ka-lâm -tōe sù hō͘ lí, chòe lí èng-tit ê sán-gia̍p.”

19Tng-sî in ê jîn-kháu iú-hān, jîn-sò͘ chin chió; in tī hia chòe chhut-gōa-lâng.

20In tùi chit-cho̍k kiâⁿ kàu hit-cho̍k, tùi chit-kok kàu hit-kok.

21I bô iông-ún lâng ap-pek in; ūi-tio̍h in ê iân-kò͘, I khiàn-chek hiah-ê kun-ông.

22I kóng, “M̄-thang kha̍p-tio̍h góa kéng-soán ê po̍k-jîn, mā m̄-thang khi-hū góa ê sian-ti.”

23Choân-tōe lóng tio̍h tùi Siōng Chú chhiùⁿ-koa! Tio̍h ji̍t-ji̍t soan-pò͘ I chín-kiù ê hó siau-sit!

24Tio̍h tùi bān-kok soan-iông I ê êng-iāu! Tio̍h tùi bān-bîn kóng-khí I úi-tāi ê chok-ûi!

25In-ūi Siōng Chú chì-tōa, eng-kai siū ke̍k-tōa ê chheng-chàn; I pí só͘-ū ê sîn-bêng eng-kai koh-khah siū kèng-ùi.

26In-ūi gōa-pang ê sîn-bêng put-kò sī ngó͘-siōng; m̄-kú Siōng Chú chhòng-chō chiah-ê thiⁿ.

27Chun-kùi kap ui-giâm pau-ûi I; koân-lêng kap hí-lo̍k chhiong-móa I ê só͘-chāi.

28Tōe-chiūⁿ bān-bîn lóng tio̍h chheng-chàn Siōng Chú! Tio̍h chiong êng-iāu kap koân-lêng kui hō͘ I!

29Tio̍h chiong Siōng Chú èng-tit ê êng-iāu kui hō͘ I! Tio̍h tòa chè-mi̍h lâi kàu I ê bīn-chêng! Tio̍h chhēng sèng-kiat chòe lé-ho̍k kèng-pài Siōng Chú!

30Choân-tōe tio̍h tī I bīn-chêng kiaⁿ-hiâⁿ phi̍h-phi̍h-chhoah! Sè-kài kian-kò͘ bōe tōng-iâu;

31thiⁿ tio̍h hoaⁿ-hí, tōe tio̍h khoài-lo̍k! Tio̍h tùi bān-kok soan-pò͘, “Siōng Chú choh-ông!”

32Hái kap hit lāi-bīn ê oa̍h-mi̍h lóng tio̍h chhut tōa-siaⁿ! Chhân-hn̂g kap kî-tiong só͘-ū--ê lóng tio̍h khoài-lo̍k!

33Hit-sî, chhiū-nâ lāi ê chhiū-ba̍k lóng beh tī Siōng Chú bīn-chêng hoaⁿ-hí chhiùⁿ-koa, In-ūi I beh lâi sím-phòaⁿ phó͘-thiⁿ-ē.

34Tio̍h kám-siā Siōng Chú, in-ūi I chì-siān; I ê chû-ài sòa kàu éng-oán!

35Tio̍h kóng, “Chín-kiù goán ê Siōng-tè ah, kiû lí chín-kiù goán, chū-chi̍p goán, kiù goán thoat-lī lia̍t-kok, hō͘ goán thang kám-siā lí ê sèng-miâ, ēng chheng-chàn lí chòe goán siōng-tōa ê hoaⁿ-hí.

36Goān chheng-chàn kui hō͘ Siōng Chú — Í-sek-lia̍t ê Siōng-tè, tùi éng-oán kàu éng-oán.” Choân-thé jîn-bîn lóng kóng “Amen!” koh chheng-chàn Siōng Chú.

37Tāi-pi̍t lâu A-sat kap i ê chhin-cho̍k tī Siōng Chú ê iok-kūi chêng, chiàu ta̍k-ji̍t eng-kai chòe ê kang-chok, kè-sio̍k tī iok-kūi chêng ho̍k-sāi.

38Koh lâu Gô-pia̍t Í-tong kap i ê chhin-cho̍k la̍k-cha̍p-poeh lâng, í-ki̍p Iâ-tō͘-tùn ê kiáⁿ Gô-pia̍t Í-tong kap Hô-sat chòe iok-kūi ê siú-ōe.

39Koh lâu chè-si Sat-tok kap i ê chhin-cho̍k chèng chè-si, tī Ki-piàn soaⁿ-thâu-tôaⁿ Siōng Chú ê hōe-bō͘ chêng,

40ta̍k-ji̍t chá-àm tī chè-tôaⁿ téng hiàn sio-hòa-chè hō͘ Siōng Chú, lóng chiàu Siōng Chú bēng-lēng Í-sek-lia̍t -lâng ê lu̍t-hoat só͘-ū ê kì-chài.

41Iáu ū Hi-bān, Iâ-tō͘-tùn, kap kî-tha siū soán, miâ ū teng-lio̍k ê lâng, kap in chòe-hé chheng-chàn Siōng Chú, in-ūi I ê chû-ài éng-oán chûn-sio̍k.

42Hi-bān, Iâ-tō͘-tùn kap in chòe-hé ēng lat-pah, poa̍h, kap o-ló Siōng-tè ê ga̍k-khì chheng-chàn Siōng Chú; Iâ-tō͘-tùn ê hō͘-tāi chòe siú-ōe.

43Āu-lâi, choân-thé jîn-bîn chiū tò-khì in tau; Tāi-pi̍t mā tò--khì, kā i ê ka-cho̍k chiok-hok.

← Chapter 15 Jump to: Chapter 17 →