1 Chronicles 12

Chinese TTVR (現代台語譯本羅馬字版)

← Chapter 11 Jump to: Chapter 13 →

1Tāi-pi̍t ūi-tio̍h siám-pī Ki-sū ê kiáⁿ Sò-lô, bih tī Sé-kek-la ê sî, ē-bīn chiah-ê ióng-sū lâi kàu i hia, pang-chān i kau-chiàn.

2In ōe ēng chiàⁿ-chhiú tò-chhiú siā-chìⁿ, hìⁿ chio̍h-thâu; lóng sī Piān-ngá-bín -lâng, sī Sò-lô ê chhin-cho̍k:

3Chhōa-thâu--ê sī A-hi-í-siā, koh lo̍h--khì sī Iok-a-si, in lóng sī Ki-pí-a -lâng Sī-má ê kiáⁿ; koh ū A-su-má-ui ê kiáⁿ Iâ-sih kap Pí-le̍k, Pí-la-ka A-ná-tu̍t -lâng Iâ-hō͘

4Ki-piàn -lâng I-si-má-ngá (saⁿ-cha̍p lâng tiong ê chi̍t ê ióng-sū, teh koán-lí hit saⁿ-cha̍p lâng), Iâ-lī-bí, Ngá-hap-sek, Iok-hap-lân Ki-tí-la -lâng Iok-sat-poa̍t,

5I-lī-o͘-sài, Iâ-lī-mô͘, Pí-a-lī-ngá, Sī-má-lī-ngá Hap-lu̍t-hut -lâng Sī-hoat-thê-ngá

6Khó-la -lâng Í-lī-ka-ná, I-sī-ngá, A-sat-lia̍t, Iok-í-siā, Ngá-sok-pan

7Ki-to -lâng Iâ-lô-hán ê kiáⁿ Iû-la kap Se-pa-tē-ngá.

8Ka-tek chi-cho̍k ū kúi-nā lâng lâi kàu khòng-iá ê iàu-sài, kui-sūn Tāi-pi̍t. In lóng sī ióng-béng ê chiàn-sū, giâ tún-pâi, gia̍h chhiuⁿ, gâu sio-thâi; in ê bīn chhin-chhiūⁿ sai ê bīn, gâu cháu chhin-chhiūⁿ soaⁿ--ni̍h ê lo̍k.

9Thâu chi̍t ê Í-siā-ní, tē-jī Gô-pa-tí-a, tē-saⁿ Í-lī-ap,

10tē-sì Bî-si-má-ná, tē-gō͘ Iâ-lī-bí,

11tē-la̍k A-thài, tē-chhit Í-lī-gia̍p,

12tē-poeh Iok-hap-lân, tē-káu Í-lī-sat-pa,

13tē-cha̍p Iâ-lī-bí, tē-cha̍p-it Boa̍t-pa-nāi.

14Chiah-ê lóng sī Ka-tek chi-cho̍k ê kun-koaⁿ; siōng-sòe--ê chi̍t ê tú chi̍t-pah, siōng-kiông--ê chi̍t ê tú chi̍t-chheng.

15Chiaⁿ--ge̍h Iok-tàn-hô ê chúi tiòng-móa siang-pêng hōaⁿ ê sî, in kè hô, hō͘ só͘-ū tòa tī pêng-goân ê lâng kiaⁿ kah sì-sòaⁿ tô-cháu.

16Koh ū Piān-ngá-bín -lâng kap Iû-tāi -lâng lâi Tāi-pi̍t ê iàu-sài.

17Tāi-pi̍t chhut-khì gêng-chiap in, tùi in kóng, “Lín nā hó-ì lâi beh pang-chān góa, góa hoan-gêng lín kap góa liân-bêng; m̄-kú lín nā beh chiong góa chit-ê bô-chōe ê lâng chhut-bōe hō͘ tùi-te̍k, goān lán lia̍t-chó͘ ê Siōng-tè kàm-chhat chek-hoa̍t.”

18Hit-sî Siōng-tè ê sîn lîm-kàu chèng kun-koaⁿ ê siú-léng A-má-sài, i chiū kóng, “ Tāi-pi̍t ah, goán sī kui-sūn lí--ê; Iâ-se ê kiáⁿ ah, goán sī chi-chhî lí--ê. Goān lí pêng-an sūn-lī, goān pang-chān lí--ê mā lóng pêng-an; in-ūi lí ê Siōng-tè pang-chān lí.” Tāi-pi̍t chiū chiap-la̍p in, siat-li̍p in chòe iû-kek-tūi ê tūi-tiúⁿ.

19Tāi-pi̍t kap Hui-lī-sū -lâng chòe-hé beh kong-kek Sò-lô ê sî, ū chi̍t-kóa Má-ná-se -lâng lâi kui-sūn i. Āu-lâi in bô pang-chān Hui-lī-sū -lâng, in-ūi Hui-lī-sū ê léng-siù ū chham-siông, kiò Tāi-pi̍t tò--khì, kóng, “I chin ū khó-lêng the̍h lán ê thâu-khak khì kui-sūn i ê chú-lâng Sò-lô.”

20Tāi-pi̍t khì Sé-kek-la ê sî, ū Má-ná-se -lâng ê chí-hui-koaⁿ, Ap-ná, Iok-sat-poa̍t, Iâ-thia̍p, Bí-ka-le̍k, Iok-sat-poa̍t, Í-lī-hō͘, Sé-le̍k-thài, lóng lâi kui-sūn i.

21Chiah-ê lâng pang-chān Tāi-pi̍t tùi-khòng iû-kek-tūi, in lóng sī ióng-béng ê chiàn-sū, koh chòe kun-koaⁿ.

22Hit-sî, ta̍k-ji̍t ū lâng lâi beh pang-chān Tāi-pi̍t, i ê kun-tūi chiū chhin-chhiūⁿ Siōng-tè ê kun-tūi hiah-ni̍h kiông-tāi.

23Ū bú-chong hó-sè ê chiàn-sū lâi Hi-pek-lûn kìⁿ Tāi-pi̍t, beh chiàu Siōng Chú ê ōe chiong Sò-lô ê ông-ūi kau hō͘ i. Ē-bīn sī hiah-ê chiàn-sū ê sò͘-bo̍k:

24Iû-tāi chi-cho̍k: Giâ tún-pâi, gia̍h-chhiuⁿ ê bú-chong chiàn-sū, ū la̍k-chheng poeh-pah lâng.

25Se-biān chi-cho̍k: Ōe chhut-chiàn ê ióng-sū, ū chhit-chheng chi̍t-pah lâng.

26Lī-bī chi-cho̍k: Sì-chheng la̍k-pah lâng;

27A-lûn hō͘-tāi ê cho̍k-tiúⁿ Iâ-hô-iâ-tāi kap tè-i--ê ū saⁿ-chheng chhit-pah lâng;

28Ióng-béng ê chiàn-sū siàu-liân-lâng Sat-tok kap i ka-cho̍k ê léng-siù jī-cha̍p-jī lâng.

29Piān-ngá-bín chi-cho̍k: Sò-lô ê chhin-cho̍k ū saⁿ-chheng lâng; chêng-kàu-taⁿ, in tōa-pō͘-hūn ióng-hō͘ Sò-lô -ke.

30Í-hoat-liân chi-cho̍k: Chhut-miâ ê ióng-béng chiàn-sū, ū nn̄g-bān khòng poeh-pah lâng.

31Iok-tàn-hô sai-pêng ê Má-ná-se pòaⁿ chi-cho̍k: Ū kì-lio̍k tī ka-phó͘--ê, chi̍t-bān poeh-chheng lâng, lóng ióng-hō͘ Tāi-pi̍t choh-ông.

32Í-sat-ka chi-cho̍k: Ū tì-sek, bat sî-sè, chai Í-sek-lia̍t tī sím-mi̍h sî tio̍h chòe sím-mi̍h ê léng-siù ū nn̄g-pah lâng; in ê chhin-cho̍k lóng thiaⁿ in ê bēng-lēng.

33Se-pò͘-lûn chi-cho̍k: Ōe ēng ta̍k-chióng kun-khì chhut-tīn kau-chiàn, chin ū kì-lu̍t, tùi Tāi-pi̍t tiong-sêng--ê ū gō͘-bān lâng.

34Ná-hut-tha-lī chi-cho̍k: Ū chi̍t-chheng ê léng-siù; gia̍h chhiuⁿ, giâ tún-pâi tè in--ê, ū saⁿ-bān chhit-chheng lâng.

35Tān chi-cho̍k: Ōe chhut-chiàn--ê, ū nn̄g-bān poeh-chheng la̍k-pah lâng.

36A-siat chi-cho̍k: Ōe chhut-tīn kau-chiàn--ê, ū sì-bān lâng.

37Tī Iok-tàn-hô tang-pêng, Lū-piān chi-cho̍k, Ka-tek chi-cho̍k, Má-ná-se pòaⁿ chi-cho̍k: Gia̍h ta̍k-chióng kun-khì kau-chiàn--ê, ū cha̍p-jī-bān lâng.

38Chiah-ê chiàn-sū lóng sûi-sî ōe-tàng chhut-chiàn, tùi Tāi-pi̍t tiong-sêng. In lâi kàu Hi-pek-lûn ióng-hō͘ Tāi-pi̍t chòe Í-sek-lia̍t choân-kok ê ông; kî-tha ê Í-sek-lia̍t -lâng mā tâng-sim ióng-hō͘ Tāi-pi̍t choh-ông.

39In tī hia kap Tāi-pi̍t chòe-hé saⁿ ji̍t, ia̍h-chia̍h-ia̍h-lim, in-ūi in ê chhin-cho̍k lóng kā in pī-pān hó-sè.

40In hù-kūn ê lâng, sīm-chì tùi Í-sat-ka, Se-pò͘-lûn, Ná-hut-tha-lī lâi ê lâng, lóng ēng lû, lo̍k-tô, lô, gû, chài chia̍h-mi̍h, ū mī-hún, bû-hoa-kó-koaⁿ-oân, phû-tô-koaⁿ-oân, chiú, iû, koh tòa gû iûⁿ lâi hia, ta̍k-hāng lóng chin chōe; in-ūi tī Í-sek-lia̍t tiong ū tōa hoaⁿ-hí.

← Chapter 11 Jump to: Chapter 13 →