1 Chronicles 28

Chinese TTVR (現代台語譯本羅馬字版)

← Chapter 27 Jump to: Chapter 29 →

1Tāi-pi̍t tiàu-chi̍p Í-sek-lia̍t ê léng-siù, kok chi-cho̍k ê siú-léng, kap lûn-pan ho̍k-sāi ông ê koaⁿ-tiúⁿ, koán-lí chi̍t-chheng lâng kap koán-lí chi̍t-pah lâng ê kun-koaⁿ, koán-lí ông kap ông kiáⁿ-jî ê sán-gia̍p kap cheng-siⁿ ê koaⁿ-oân, thài-kàm, ióng-sū, í-ki̍p tiōng-iàu jîn-sîn, lóng lâi Iâ-lō͘-sat-léng.

2Tāi-pi̍t -ông chiū khiā--khí-lâi, kóng, “Kok-ūi hiong-chhin, kok-ūi tông-pau, chhiáⁿ thiaⁿ! Góa pún-lâi siūⁿ-beh khí-chō sèng-tiān lâi an-tì Siōng Chú ê iok-kūi, chiū-sī lán ê Siōng-tè ê kha-tiam; góa mā í-keng chún-pī hó-sè.

3M̄-kú Siōng-tè tùi góa kóng, ‘Lí bōe-ēng-tit ūi-tio̍h góa ê miâ khí sèng-tiān, in-ūi lí sī chiàn-sū, ū thâi-sí chin chōe lâng.’

4M̄-kú, Siōng Chú — Í-sek-lia̍t ê Siōng-tè tùi goán lāu-pē choân ka-cho̍k kéng-soán góa choh-ông, éng-oán tī-lí Í-sek-lia̍t; in-ūi I kéng-soán Iû-tāi chòe léng-siù, koh tùi Iû-tāi chi-cho̍k kéng-soán goán lāu-pē ê ke, tī goán lāu-pē ê kiáⁿ-jî tiong te̍k-pia̍t ì-ài góa, soán-li̍p góa choh-ông, tī-lí choân Í-sek-lia̍t.

5Siōng Chú siúⁿ-sù góa chin chōe kiáⁿ, tī góa ê kiáⁿ-jî tiong kéng-soán góa ê kiáⁿ Só͘-lô-bûn, chē Siōng Chú ê kok ê ông-ūi, tī-lí Í-sek-lia̍t.

6“Siōng Chú koh tùi góa kóng, ‘Lí ê kiáⁿ Só͘-lô-bûn beh khí góa ê tiān, góa ê tiâⁿ; góa kéng-soán i chòe góa ê kiáⁿ, góa mā beh chòe i ê pē.

7I nā chhin-chhiūⁿ kin-á-ji̍t kian-koat chun-siú góa ê kài-bēng kap bēng-lēng, góa chiū beh kian-kò͘ i ê kok-ūi, ti̍t-kàu éng-oán.’

8“Hiān-chāi, tī Siōng Chú ê tāi-hōe, Í-sek-lia̍t chèng-lâng ê bīn-chêng, lán ê Siōng-tè mā teh thiaⁿ, góa bēng-lēng lín tio̍h chun-hêng khat-bō͘ Siōng Chú — lín ê Siōng-tè ê kài-bēng; án-ni, lín chiū thang tit-tio̍h chit-tè hó ê thó͘-tōe, lâu hō͘ lín ê hō͘-tāi, éng-oán chòe sán-gia̍p.”

9Tāi-pi̍t tùi Só͘-lô-bûn kóng, “Góa ê kiáⁿ Só͘-lô-bûn, lí tio̍h jīn-bat lí ê lāu-pē ê Siōng-tè, choân-sim hoaⁿ-hí ho̍k-sāi I; in-ūi Siōng Chú kàm-chhat ta̍k-ê lâng ê sim, chai in ê sim-su ì-liām. Lí nā chhē-kiû I, I ōe hō͘ lí chhē--tio̍h; lí nā pàng-sak I, I ōe éng-oán khì-sak lí.

10Lí tio̍h kín-sīn, in-ūi Siōng Chú kéng-soán lí khí-chō sèng-tiān; lí tio̍h ióng-kám khì chòe.”

11Tāi-pi̍t chiong sèng-tiān ê cháu-lông, pâng-keng, hú-khò͘, lâu-téng ê pâng-keng, lōe-tiān, kap si-un-chō ê só͘-chāi, só͘-ū ê siat-kè-tô͘, kau hō͘ i ê kiáⁿ Só͘-lô-bûn;

12chiong i tùi Siōng-tè ê sîn só͘ tit--tio̍h koan-hē Siōng Chú sèng-tiān ê tiâⁿ, sì-ûi ê pâng-keng, sèng-tiān ê hú-khò͘, kap khǹg sèng-mi̍h ê hú-khò͘ ê siat-kè-tô͘, lóng kau hō͘ Só͘-lô-bûn.

13Tāi-pi̍t koh kā Só͘-lô-bûn chí-sī án-chóaⁿ hun-phòe chè-si kap Lī-bī -lâng ê pan-chhù, hō͘ in chip-hêng tī Siōng Chú tiān-lāi ho̍k-sāi ê chit-bū, í-ki̍p koán-lí Siōng Chú tiān-lāi ê khì-khū.

14Tāi-pi̍t koh chí-sī i ēng jōa-chōe kim kap gûn chòe ta̍k-chióng ho̍k-sāi beh ēng ê kim-khì kap gûn-khì, kim kap gûn ê teng kap teng-tâi, khǹg hiàn-chè ê piáⁿ ê kim-toh kap gûn-toh;

17koh chí-sī i tio̍h ēng jōa-chōe sûn-kim chòe bah-chhe, pôaⁿ, poe, óaⁿ, í-ki̍p ēng jōa-chōe gûn chòe gûn-óaⁿ;

18koh chhìn liān--kè ê kim chòe hiuⁿ-tôaⁿ; mā chiàu siat-kè-tô͘ ēng kim chòe thiⁿ-sài ki-lō͘-pek ê chhia, in thí-khui si̍t, jia-khàm Siōng Chú ê iok-kūi.

19Tāi-pi̍t kóng, “Téng-bīn chiah-ê siat-kè-tô͘, lóng sī chiàu Siōng Chú chhin-sin chí-sī góa siá--chhut-lâi--ê.”

20Tāi-pi̍t koh kā i ê kiáⁿ Só͘-lô-bûn kóng, “Lí tio̍h kian-kiông ióng-kám khì chòe; m̄-thang kiaⁿ, m̄-thang lún; in-ūi Chú Siōng-tè, góa ê Siōng-tè, kap lí tông-chāi; I it-tēng bōe lī-khui lí, mā bōe pàng-sak lí, ti̍t-kàu lí oân-sêng Siōng Chú sèng-tiān ê kang-thêng.

21Lí khòaⁿ, hiah-ê chè-si kap Lī-bī -lâng tī Siōng-tè ê sèng-tiān ho̍k-sāi ê chit-bū í-keng hun-phòe hó-sè, mā ū chin chōe kang-hu chin hó ê sai-hū hoaⁿ-hí pang-chān lí, koh ū chin chōe koaⁿ-tiúⁿ kap choân-thé jîn-bîn lóng ōe thiaⁿ-thàn lí ê bēng-lēng.”

← Chapter 27 Jump to: Chapter 29 →