1 Chronicles 20

Chinese TTVR (現代台語譯本羅馬字版)

← Chapter 19 Jump to: Chapter 21 →

1Keh-nî chhun-thiⁿ, lia̍t-ông chhut-chiàn ê sî, Iok-ap chhōa kun-peng kong-kek húi-hoāi A-bûn -lâng ê tōe, ûi-kong La-pa -siâⁿ; Tāi-pi̍t lâu tī Iâ-lō͘-sat-léng. Iok-ap kong-chiàm La-pa, kā siâⁿ thiat-tóe phò-hoāi.

2Tāi-pi̍t the̍h-tio̍h Bí-le̍k-kong thâu-khak téng ê ông-koan, sī ēng tāi-iok saⁿ-cha̍p-gō͘ kong-kun ê kim chō--ê, koh ū siuⁿ pó-chio̍h. Lâng chiong chit-téng ông-koan tì tī Tāi-pi̍t ê thâu-khak. Tāi-pi̍t tùi siâⁿ-lāi chhú chin chōe châi-bu̍t,

3koh kā siâⁿ-lāi ê jîn-bîn lia̍h--chhut-lâi, hō͘ in ēng kù-á, thih-pê-á, kap pó͘-thâu chòe khó͘-kang; Tāi-pi̍t lóng ēng chit-khoán hong-hoat tùi-thāi A-bûn hiah-ê siâⁿ ê lâng. Āu-lâi, Tāi-pi̍t kap só͘-ū ê kun-peng tò-khì Iâ-lō͘-sat-léng.

4Āu-lâi, Í-sek-lia̍t -lâng tī Ki-sek kap Hui-lī-sū -lâng kau-chiàn. Hō͘-sa -lâng Se-pí-kai thâi-sí chi̍t ê tōa-hàn-cho̍k ê hō͘-tāi, i ê miâ kiò-chòe Sè-phài; Hui-lī-sū -lâng chiū khut-ho̍k.

5In koh kap Hui-lī-sū -lâng kau-chiàn, hit-sî Gâi-ní ê kiáⁿ I-le̍k-hap-lân thâi-sí Ka-te̍k -lâng Ko-lī-a ê hiaⁿ-tī La-hap-bí; chit-ê lâng ê chhiuⁿ-pìⁿ chhin-chhiūⁿ chit-pò͘-ki ê chhia-sim hiah chho͘.

6In koh tī Ka-te̍k kau-chiàn. Tī hia ū chi̍t ê tōa-hàn-lâng, chhiú kap kha lóng ū la̍k ki chńg-thâu-á, kiōng jī-cha̍p-sì ki, i mā-sī tōa-hàn-cho̍k ê hō͘-tāi.

7Chit-ê lâng tùi Í-sek-lia̍t ê kun-tūi chhiàng-siaⁿ ê sî, Tāi-pi̍t ê hiaⁿ-ko Sī-bí-a ê kiáⁿ Iok-ná-tan kā i thâi-sí.

8Chiah-ê lâng lóng sī Ka-te̍k tōa-hàn-cho̍k ê hō͘-tāi; lóng hō͘ Tāi-pi̍t kap i ê kun-peng thâi-sí.

← Chapter 19 Jump to: Chapter 21 →