1 Chronicles 29

Chinese TTVR (現代台語譯本羅馬字版)

← Chapter 28 Jump to:

1Tāi-pi̍t -ông tùi choân hōe-chiòng kóng, “Góa ê kiáⁿ Só͘-lô-bûn sī Siōng-tè te̍k-pia̍t kéng-soán--ê, m̄-kú iáu siàu-liân, bô keng-giām. Chit-ê kang-thêng chin tōa, in-ūi chit-ê sèng-tiān m̄-sī ūi-tio̍h lâng, sī ūi-tio̍h Chú Siōng-tè khí--ê.

2Góa ūi-tio̍h góa ê Siōng-tè ê tiān í-keng chīn-la̍t, ū chún-pī kim, gûn, tâng, thih, chhâ, beh chòe ta̍k-khoán khì-khū; koh ū chún-pī chin chōe âng-bé-ló, thang siuⁿ ê pó-chio̍h, kng-chio̍h, chhái-sek ê chio̍h, ta̍k-khoán ê pó-chio̍h, kap tāi-lí-chio̍h.

3Góa ì-ài góa ê Siōng-tè ê tiān, chiū tī chún-pī khí sèng-tiān ê châi-liāu í-gōa, koh chiong góa chek-chū ê kim-gûn, lóng hiàn chòe khí góa Siōng-tè sèng-tiān ê lō͘-ēng;

4chiū-sī Gô-hui ê kim chi̍t-pah gōa kong-tùn, sûn-gûn nn̄g-pah sì-cha̍p gōa kong-tùn, lâi tah sèng-tiān ê piah;

5í-ki̍p hō͘ sai-hū chòe kim-khì, gûn-khì, kap só͘-ū khì-khū ê lō͘-ēng. Kin-á-ji̍t iáu ū sím-mi̍h-lâng hoaⁿ-hí hōng-hiàn, hōng-hiàn i pún-sin hō͘ Siōng Chú?”

6Án-ni, cho̍k-tiúⁿ, Í-sek-lia̍t ta̍k chi-cho̍k ê siú-léng, koán chi̍t-chheng lâng kap koán chi̍t-pah lâng ê kun-koaⁿ, í-ki̍p kàm-tok hiah-ê kā ông choh-kang ê lâng ê koaⁿ-tiúⁿ, lóng kam-sim hōng-hiàn.

7In ūi-tio̍h Siōng-tè sèng-tiān ê kang-thêng, hōng-hiàn kim chi̍t-pah chhit-cha̍p gōa kong-tùn, gûn saⁿ-pah sì-cha̍p gōa kong-tùn, tâng iok la̍k-pah jī-cha̍p kong-tùn, kap thih saⁿ-chheng sì-pah kong-tùn.

8Ū pó-chio̍h ê lâng lóng chiong pó-chio̍h the̍h-khì kau hō͘ Kek-sūn -lâng Iâ-hiat, sàng-ji̍p Siōng Chú sèng-tiān ê hú-khò͘.

9Jîn-bîn lóng chin hoaⁿ-hí hōng-hiàn, in-ūi in chīn-sim hiàn hō͘ Siōng Chú; Tāi-pi̍t -ông mā hui-siông hoaⁿ-hí.

10Tāi-pi̍t tī choân hōe-chiòng ê bīn-chêng chheng-chàn Siōng Chú, kóng, “Siōng Chú — goán chó͘-sian Í-sek-lia̍t ê Siōng-tè eng-kai siū chheng-chàn, tùi éng-oán kàu éng-oán.

11Siōng Chú, lí chì-tōa, ū koân-lêng, êng-kng, sèng-lī, ui-giâm; thiⁿ-téng tōe-ē só͘-ū--ê lóng sī lí ê. Siōng Chú, kok sī lí ê, lí chì-koân, sī bān-iú ê chú-cháiⁿ.

12Hù-jū chun-kùi lóng tùi lí lâi, lí mā chiáng-koán bān-iú; lí ū tōa koân-lêng tōa khùi-la̍t, hō͘ lâng úi-tāi kiông-sēng.

13Goán ê Siōng-tè, taⁿ goán kám-siā lí, chheng-chàn lí êng-iāu ê miâ.

14“Góa sǹg sím-mi̍h, góa ê chú-bîn sǹg sím-mi̍h, goán kèng-jiân ōe-tàng án-ni kam-sim hōng-hiàn? Bān-mi̍h lóng tùi lí lâi, goán put-kò ēng lí ê mi̍h hiàn hō͘ lí.

15Goán tī lí ê bīn-chêng sī chhut-gōa-lâng, sī kià-ku--ê, kap goán ê chó͘-sian kâng-khoán. Goán tī sè-kan ê ji̍t-chí chhin-chhiūⁿ iáⁿ, bô sím-mi̍h ǹg-bāng.

16Siōng Chú — goán ê Siōng-tè ah, goán chún-pī chiah-ê só͘-ū ê châi-liāu, beh ūi-tio̍h lí ê sèng-miâ khí-chō sèng-tiān, chiah-ê lóng sī tùi lí lâi, mā lóng sī lí ê.

17Góa ê Siōng-tè, góa chai lí kàm-chhat lâng ê sim, ì-ài chèng-ti̍t; góa ēng chèng-ti̍t ê sim kam-sim hōng-hiàn chiah-ê só͘-ū ê mi̍h. Hiān-chāi góa chin hoaⁿ-hí khòaⁿ-tio̍h lí ê chú-bîn tī chia, lóng kam-sim hōng-hiàn hō͘ lí.

18Siōng Chú — goán lia̍t-chó͘ A-pek-la-hán, Í-sat, Ngá-kok ê Siōng-tè, kiû lí hō͘ lí ê chú-bîn siông-siông chûn chit-khoán sim-su ì-liām, kian-koat kui-ǹg lí.

19Koh kiû lí siúⁿ-sù góa ê kiáⁿ Só͘-lô-bûn sûn-choân ê sim, thiat-tóe chun-siú lí ê kài-bēng, kà-sī, kui-lē, koh ēng góa chún-pī--ê khí-chō sèng-tiān.”

20Tāi-pi̍t tùi choân hōe-chiòng kóng, “Lín tio̍h chheng-chàn Siōng Chú — lín ê Siōng-tè.” Choân-thé hōe-chiòng chiū chheng-chàn Siōng Chú — in lia̍t-chó͘ ê Siōng-tè, àⁿ-thâu kūi-pài Siōng Chú kap ông.

21Keh-ji̍t, in ǹg Siōng Chú hiàn-chè. In hiàn sio-hòa-chè hō͘ Siōng Chú, kang ê gû chi̍t-chheng chiah, kang ê mî-iûⁿ chi̍t-chheng chiah, sòe-chiah iûⁿ-á chi̍t-chheng chiah, kap tiān-chiú-chè; koh ūi Í-sek-lia̍t ê jîn-bîn hiàn chin chōe chè-mi̍h.

22Hit-ji̍t, in tī Siōng Chú ê bīn-chêng lim-chia̍h, hui-siông hoaⁿ-hí. In tē-jī piàn siat-li̍p Tāi-pi̍t ê kiáⁿ Só͘-lô-bûn choh-ông, tī Siōng Chú bīn-chêng kā i boah-iû choh-ông; koh ēng iû boah Sat-tok chòe chè-si.

23Só͘-lô-bûn chiū chē Siōng Chú só͘ siúⁿ-sù ê ông-ūi, sòa-chiap i ê lāu-pē Tāi-pi̍t choh-ông. I sū-sū sūn-lī, Í-sek-lia̍t jîn-bîn lóng kui-sūn i.

24Só͘-ū ê léng-siù kap ióng-sū, liân Tāi-pi̍t -ông lóng-chóng ê kiáⁿ-jî mā lóng sūn-ho̍k Só͘-lô-bûn -ông.

25Siōng Chú hō͘ Só͘-lô-bûn tī Í-sek-lia̍t jîn-bîn ê bīn-chêng siū chun chòe tōa; hō͘ i ū kok-ông ê ui-giâm, chhiau-kè Í-sek-lia̍t í-chêng só͘-ū ê ông.

26Iâ-se ê kiáⁿ Tāi-pi̍t chòe choân Í-sek-lia̍t ê ông.

27I choh-ông thóng-tī Í-sek-lia̍t kiōng sì-cha̍p nî: Tī Hi-pek-lûn chhit nî, tī Iâ-lō͘-sat-léng saⁿ-cha̍p-saⁿ nî.

28I hióng-siū êng-hôa-hù-kùi, chia̍h tn̂g-hè-siū. I ê kiáⁿ Só͘-lô-bûn sòa-chiap i choh-ông.

29Tāi-pi̍t -ông it-seng ê sū-chek lóng kì-chài tī sian-kiàn Sat-bó-ní, sian-ti Ná-tan, í-ki̍p sian-kiàn Ka-tek ê chheh.

30Chiah-ê chheh mā kì-chài i án-chóaⁿ tī-lí kok-chèng kap i ê sêng-chiū, koh kì-chài i kap Í-sek-lia̍t í-ki̍p sì-ûi kok-ka só͘ keng-le̍k ê sū.

← Chapter 28 Jump to: