Leviticus 16

Zande

← Chapter 15 Jump to: Chapter 17 →

1Yekova ki gumba pai fu Mose, fuo kpio agu awiri Arona nadu ue re, ho i ambedi ni ku bara bangiri Yekova ki kpiki.

2Yekova ki ya fu Mose, “Mo gúmba ha fu Arona nga unvuruamo ka ko niyé nga ku gii roko kparakpara ziazia ba yo ku barangba bainapai nga gu du ri sanduki dezirepai na arago dũ ya, ko ka kpi; bambiko mi ayúgo tire rogo dubo ku ri bainapai.

3Were Arona ka rima ku rogo ziazia ba yo: na paranga babagara tipa motumo ingapai na bakandoro tipa zozo motumo.

4Ko aniukadi gu ziazia roko du ni giri nzibi, ki vo sorondu du ni giri nzibi a, ki vo giri dimose du ni giri nzibi, na kaĩkaĩ rokori ku riko yo du ni giri nzibi a. Gere nga gu ziazia aroko. Ko anizundu kpotoko, fuo gure ko ki ukadi he.

5Ko ki rogo abaameme ue be rimbasa awiri aYisaraere tipa motumo ingapai, na bakandoro sa tipa zozo motumo.

6“Arona anifu babagara ni motumo ingapai tipa ko, ki mangi pa dada ingapai tipa ko na tipa gako aborokporo a.

7Fuo ho ko anirogo agu ameme ue re, ki moi ra pangbadimo bamburoko dungurati ku bara bangiri Yekova;

8Arona ki niba ake tipa agu ameme ue re, ake sa tipa Yekova, kura ake sa tipa Azazera.

9Arona nikanikusi gu meme ake niyugu ru tipa Yekova, ki fu ru ni motumo ingapai;

10ono gu meme ake niyugu ru tipa Azazera ko ki moi ru ni kina ungaru ku bara bangiri Yekova ka manga pa dada ingapai ri ru, ya i kedi ru ku ngbakungba yo fu Azazera.

11“Arona anikusi babagara ni motumo ingapai tipa ko, ki mangi pa dada ingapai tipa ko na gako aborokporo a; ko aniimi gu babagara re ni motumo ingapai tipa ko.

12Ko anidi ũzokingire hi be gu kingiri we du bamotumo yo du bara bangiri Yekova, na sukasuka wene fuõngua ni beko wa bara ue; ko ki nirimi na ni ku gii roko kparakpara ba yo

13ki uka gu fuõngua re ku we yo ku bara bangiri Yekova, ya ngimi fuõngua zi bainapai nga gu du auru sanduki dezirepai, ko ka kpi;

14ko ki di bete kure babagara ki migidi he ni wirinzagako kuti vuro bainapai barangba ha, ko ki migidi kure na wirinzagako bara saba ku barangba bainapai.

15“Fuo gure ko ki imi gu meme du tipa motumo ingapai nga gu ru du tipa aboro, ki ye na kureru ku gii roko kparakpara ziazia ba yo, ki mangi na kureru a wa ko nimangi na kure babagara, nimigidi he ku ri bainapai na ku barangba bainapai a;

16were ko ka nimangi pa dada ingapai tipa ziazia ba, bambiko gu bibiriko apai nga ga awiri aYisaraere, na tipa gayo asamungu, na gayo ingaapai dunduko; ko ki mangi kina wo a tipa bamburoko dungurati, nga gu nye dagba yo na dagba gayo bibiriko apai.

17Boro anidu nga dimo yo bamburoko dungurati yo ho ko arima ni ka manga pa dada ingapai rogo ziazia ba yo te, daho ko ka kura ni ku zegi fuo manga ko pa dada ingapai tipa ko ni tiko na tipa gako aborokporo, na tipa gu gbuu dunduko nga ga aYisaraere.

18Si du ko ki kuru sa gu bamotumo nga gu du bara bangiri Yekova ki mangi pa dada ingapai tipa ha a, ki di bete kure babagara na bete kure meme, ki kpe he ti agbanga du ti bamotumo kirikiri.

19Ko ki migidi bete kure na wirinzagako ku ri he bara saba, ki girisi he ti gu bibiriko apai nga ga awiri aYisaraere ki kpara ha.

20“Ho ko ka nidigisi pa dada ingapai ni tipa ziazia ba na tipa bamburoko dungurati na tipa bamotumo, ko anifu unga meme;

21Arona ki uka beko ue ku ri unga meme, ki kusi pa ga awiri aYisaraere irairapai dunduko ku ri ru, na pa gayo asamungu dunduko, na pa gayo ingapai dunduko; ko ki moi he ku ri meme, ki kedi ru u merẽ ku ngbakungba yo ku be gu boro sia yo ni ni ndu na u.

22Gu meme re nikanitindi gayo irairaapai dunduko ki ga na ni ku kungba rago yo, ni ki mbu meme u merẽ ku ngbakungba yo.

23“Si du Arona ki rimi ku bamburoko dungurati yo, ki uru aroko du ni giri nzibi nga gu ko niukadi kina ho ko arima ni ku rogo ziazia ba yo, ki mbu he yo;

24ko ki zundu tiko rogo ziazia ba yo, ki ukadi boro gako aroko, ki kuru, ki fu gako zozo motumo na gu zozo motumo nga ga aboro, ki mangi pa dada ingapai tipa ko ni tiko na tipa aboro a.

25Gu nzeme nya nga ga motumo ingapai ru, ko anizo ho ri bamotumo.

26Gu ni nambu meme u ga koyo du Azazera ni, ni anizundu gani aroko ki zundu tini, fuo gure ni ki nirimi ku bataya yo berewe.

27Gu babagara du tipa motumo ingapai na gu meme du tipa motumo ingapai, nga agu ra i aye na kurera ka manga pa dada ingapai na ni rogo ziazia ba yo, i anitindi ra ki kusi ra ku zegi yo gii bataya yo; kpotora na pasiora na regbora i ka nizo ho azo.

28Gu ni nikanizo ra ni anizundu gani aroko ki zundu tini, fuo gure ni ki nirimi ku bataya yo berewe.

29“Gi pai re adú ni rugapai fu roni nye anye kindi, nga ti saba diwi, ti rameru bawe, oni arúngosi tironi, ka oni amánga nga sunge wa sa ya, watadu wiri ringara na gu kungba boro sungu ku dagba roni a ya;

30bambiko ti gu uru re i ka manga pa dada ingapai tipa roni, ka girisa roni; oni ki giri ti gaoni ingapai dunduko ku bara bangiri Yekova.

31Si nga sabiti tipa ringbisiringbisi rago ongoda fu roni, oni ki nirungosi tironi; si nga nyenye rugapai.

32Gu boromotumo i ambedi ko ki kpara ko ni boromotumo ku ba bako ko nikanimangi pa dada ingapai, ko aniukadi gu ziazia aroko du ni giri nzioi re;

33ko animangi pa dada ingapai tipa ziazia ba, ko ki nimangi pa dada ingapai berewe tipa bamburoko dungurati tipa bamotumo a, ko ki nimangi pa dada ingapai tipa aboromotumo na tipa aboro gbuu dunduko.

34Gere adú ni nyenye rugapai fu roni, ya i mángi pa dada ingapai tipa awiri aYisaraere bara sa rogo garã sa, tipa gayo ingaapai dunduko.” Mose ki mangi he a wa Yekova arugu ko na ni.

← Chapter 15 Jump to: Chapter 17 →