Leviticus 2

Zande

← Chapter 1 Jump to: Chapter 3 →

1“Ho gu boro ka ye ni na gamunihe mbedisatise ni motumo nga riahe fu Yekova, gani gamunihe anidu nga fufurũ ngungo; ni aniuka nzeme ki uka fuõngua ti ni a,

2ni ki ye na ni koyo du awiri Arona ni nga aboromotumo. Ni ki nirogo fufurũ ngungo na beni sa na nzeme na gaha fuõngua dunduko; boromotumo anizo gere wa gaha bete he ni ũtingida ri bamotumo, si nga motumo ni we, du ni guzuguzu fuõhe fu Yekova.

3Gu he nikaninye ti motumo riahe si anidu ni ga Arona na ga awiriko a, si du ni gu bete pa aũmotumo du ni kparakpara ha ni ziazia ha susi, nga motumo ni we fu Yekova.

4“Ho oni ka niye na gamunihe mbedisatise ni nga riahe ni zozo ho rogo gbigiwi yo ni motumo, si anidu ni rukutu zozohe ni fufurũ ngungo zanga agbooro ti ni, kodi yo ho na nzeme, watadu ayaaya kpokuta zanga agbooro ti ni, migidi yo ho na nzeme.

5Ka gaoni gamunihe mbedisatise du ni riahe ni zozo ho rogo kpasakpasa saani, si anidu ni fufurũ ngungo zanga agbooro ti ni kodi yo ho na nzeme;

6oni akúadi he rukutu, ki uka nzeme ti ni, si nga gamuni riahe.

7Ka gaoni gamunihe mbedisatise du ni riahe ni awadiawadi he rogo kpario, oni animangi he rogo fufurũ ngungo na nzeme.

8Oni ki niye na gamuni riahe nga gu mangi yo ho na agi ahe re fu Yekova; ho i ka niye na ni ni fu boromotumo, ko aniye na ni ku ri bamotumo.

9Boromotumo anidi gu bete pa gamuni riahe ni ũtingida, ki zo ho ri bamotumo, si nga motumo ni we, du ni guzuguzu fuõhe fu Yekova.

10Gu nikaninye dagba gamuni riahe si anidu ni ga Arona na ga awiriko a; si nga kparakpara bete pa gamuni riahe ziazia susi nga motumo ni we fu Yekova.

11“A nga gamuni riahe nga gu oni ka niye na ni fu Yekova ka du na agbooro ti ni te; bambiko oni azó nga agbooro na nzeme anyege ni motumo ni we fu Yekova te.

12Oni aniye na ni ni gamunihe mbedisatise ni makawa ahe fu Yekova, ono oni aniye nga na ni ku ri bamotumo ni guzuguzu fuõhe te.

13Oni aniba tikpo ti gaoni gamuni riahe dunduko, ka oni niídi nga tikpo zanga ti gaoni gamuni riahe nga ngbaanga mokido na Mbori ya; oni aniba tikpo ti gaoni gamunihe mbedisatise dunduko.

14“Ka oni ayé na gamuni riahe nga ga makawa fu Yekova, oni aniye na makawa zende ahe, nga sasa vovo zende ahe nga ga gu garã re, ugu auga gauya be we.

15Oni ki niuka nzeme kuti ni, ki uka fuõngua ti ni a; si nga gamuni riahe.

16Boromotumo anizo bete gu sasa vovo zende ahe na bete nzemehe na fuõngua dunduko ni gaha ũtingida; si nga motumo ni we fu Yekova.

← Chapter 1 Jump to: Chapter 3 →