Leviticus 5

Zande

← Chapter 4 Jump to: Chapter 6 →

1“Ka boro mangi ingapai bambiko wa ni nigi pa yambahe tipa zungahe, ka ni vura du ni dezire he vurũ, watadu ni bi gu pai re ki ini he a, ono ni agumba nga pa ha te, mbugo gani irairapai ki du Kina ku ri ni.

2Watadu gu boro zadi birikobiriko he, watadu kangba nyakorokpa, watadu kangba zogozogo nya du ni nyakorokpa, watadu kangba birikobiriko agbiro nagbe tira sande, si ki du ni okooko pai ti ni, ni anidu ni birikosibirikosi ni be he, ni anidu na pai ku ri ni a.

3Watadu ka ni zadi gu biriko nga ga boro, watadu gini ngbatunga biriko nga ha nabirikosi boro, si ki du ni okooko pai ti ni, ho ni ka niini pa na ni, ni anidu na pai ku ri ni.

4Watadu ka boro gumba pai ni ngbani ni zungahe, ni gba sa pai ka manga gbigbitapai watadu ka manga wenepai, watadu gini ngbatunga gba sa pai nga ha aboro nazunga ha, si ki du ni okooko pai ti ni, ho ni ka niini pa agi apai ni re, ni anidu na pai ku ri ni.

5Ho boro ka nidu ni na pai ku ri ni mbiko gu pai sa dagba agere, ni anikusi gu ingapai mangi ni,

6ni aniye na gani motumo tindika fu Yekova tipa gu ingapai mangi ni, nga nya ni nara dagba rimbasara yo, wiri kandoro, watadu meme tipa motumo ingapai boromotumo ki mangi pa dada ingapai fu ni tipa gani ingapai.

7“Ka ni aréngba nga na fu wiri kandoro ya, ni ki ye na ambipo ue fu Yekova ni gani motumo tindika tipa gu ingapai mangi ni, watadu paranga agbungu ue, gu ru ki du tipa motumo ingapai, gu kurai ki du tipa zozo motumo.

8Ni aniye na ami fu boromotumo, ko anifu gu ru tipa motumo ingapai; ko ki kama goru, ono ko anikau nga riru ti ru te,

9ono ko ki migidi bete kureru nga ga motumo ingapai kuti pavuru bamotumo, yangara kureru ki gbadi ki niga kuti mburu bamotumo; si nga motumo ingapai.

10Ko afú gu ue ru ni zozo motumo kuti sangba rugute; boromotumo ki mangi pa dada ingapai fu ni tipa gu ingapai mangi ni, mi ki vu ni ti ni.

11“Ono ka ni aréngba nga na fu ambipo ue watadu paranga agbungu ue a ya, ni ki ye na fufurũ ngungo wa aritere biata na bebere he tipa motumo ingapai ni gani gamunihe mbedisatise tipa gu ingapai mangi ni. Ni aniuka nga nzeme ti ni te, ka ni aúka nga wene fuõngua ti ni a ya, bambiko si nga motumo ingapai

12Ni ki niye na ni fu boromotumo, boromotumo anirogo bete he na beko sa ni gaha ũtingida, ki zo ho ri bamotumo, ri agu amotumo i nazo ho fu Yekova; si nga motumo ingapai.

13Were boromotumo ka nimangi pa dada ingapai tipa ni tipa gu gani ingapai mangi ni dagba agi apai re, mi ki vu ni ti ni. Gu yangara ha nikaninye si anidu ni ga boromotumo he, wa du pa ha tipa motumo riahe.”

14Yekova ki ya fu Mose,

15“Ka boro mangi pai ki ti ndika, ki mangi ingapai zanga ruga tini na pa ha, rogo gu kparakpara ziazia apai nga ga Yekova, ni aniye na bakandoro tipa gani motumo tindika fu Yekova, gu ru zanga serõ dagba rimbasara yo, mo ki gedi genoru ni asekere du ni feda, ringbisi he na gu sekere nga ga kparakpara ziazia ba; si nga motumo tindika.

16Ni anitumo tipa gu pai ingi ni ti ni rogo kparakpara ziazia apai yo ki moi sa dagba bisue ku ri he ki fu he fu boromotumo; boromotumo ki nimangi pa dada ingapai tipa ni na gu bakandoro nga ga motumo tindika ru, mi ki vu ni ti ni.

17“Ka boro mangi ingapai, ki mangi gu sa dagba agi apai yo re nga gu Yekova arugu he ka boro mángi nga ha ya; ka ni avura nga ina pa ha vurũ ya, ono ni anidu na pai ku ri ni, mbugo gani irairapai ki nidu kina ku ri ni.

18Ni aniye na bakandoro zanga serõ dagba rimbasara yo fu boromotumo, mo ki gedi genoru ringbisi he kuti geno motumo tindika, boromotumo ki nimangi pa dada ingapai tipa ni tipa gu irairapai mangi ni zanga ruga tini na pa ha, mi ki vu ni ti ni.

19Si nga motumo tindika; ni du na pai ku ri ni bara bangiri Yekova.”

← Chapter 4 Jump to: Chapter 6 →