Leviticus 18

Zande

← Chapter 17 Jump to: Chapter 19 →

1Yekova ki ya fu Mose,

2“Mo yá fu awiri aYisaraere, Mi nga Yekova nga gaoni Mbori.

3Ka oni nimángi nga pai wa i anamanga ha rogo ringara Ezipeta yo ya, yo oni anaraka ni, ka oni nimangi nga pai wa i anamanga ha ringara Kanana yo a ya, nga gu ringara mi aye na oni ku rogo ho. Ka oni nipéke nga sangba gayo rugaapai a ya.

4Ono oni amánga gimi ruru asarangbanga ki nika kuti gimi rugaapai, ki nimangi he. Mi nga Yekova nga gaoni Mbori.

5Si du oni aká kuti gimi rugaapai na gimi ruru asarangbanga, nga agu apai ka boro amanga ha ni ki du ni ungani: Mi nga Yekova.

6“A nga boro sa ka mbeda na kundiri mbembedi gumeni te. Mi nga Yekova.

7Ka oni nibí nga kundiri baroni ya, nga gu kundirise nga ga naroni; ri nga naroni, ka oni nibi nga kundiri ri ya.

8Ka oni nibí nga kundiri dia baroni ya; nga ga baroni kundirise.

9Ka oni nibi nga kundiri dawironi ya, wiri vuru baroni watadu wiri vuru naroni, watadu wirikporo watadu wiri gii rago yo a ya.

10Ka oni nibí nga kundiri awiri awironi nga ade ya, bambiko kundiri yo nga ndikidi gaoni.

11Ka oni nibí nga kundiri wiri dia baroni nga de ya, baroni avungu ri, bambiko wa du ri ni kina dawironi.

12Ka oni nibi nga kundiri dawiri baroni ya; ri nga mbembedi gume baroni.

13Ka oni nibí nga kundiri unduru naroni ya, bambiko ri nga mbembedi gume naroni.

14Ka oni nibí nga kundiri aunduru baroni ya, gure nga oni ambéda nga na diako te, ri nga dawiri baroni.

15Ka oni nibí nga kundiri ri ya.

16Ka oni nibí nga kundiri dia wirinaroni ya; si nga ga wirinaroni kundirise.

17Ka oni nibí nga kundiri de na kundiri wiriri ya, ka oni aróga nga awiri wiriri nga akumbagude watadu awiri awiriri nga degude ka bi kundiri yo ya; i nga ade ni mbembedi gumeroni; si nga kere gbegberẽ pai.

18Ka oni nirógo nga wirina diaroni fuo adiaroni ya, ka bi kundiri ri ho du wirinari ni ni ungari ya.

19“Ka oni nimbédi nga ka bi kundiri de ho du ri ni na kaza ade ya.

20Ka oni nirá nga na dere akumba ni sino aboro ya, ka birikosi tironi na yo ya.

21Ka oni nifú nga awironi ki dika yo niba yo ku we yo fu Moreke ya, ka gbarasa rimo gaoni Mbori: Mi nga Yekova.

22Ka oni nirá nga na kumba wa de ya; si nga kfere gbegberẽ sino.

23Ka oni nirá nga na nya ka birikosi tironi na u ya, ka de idi nga ka ra na nya a ya: si nga manga pai ni wasiro.

24“Ka oni nigbárasi nga tironi na agi apai re wa sa ya, bambiko mbiko agi apai re mi nabafa agu arika aboro ti ni dunduko ku sa yo bara bangironi nagbarasa tiyo na agi apai re;

25ringara ki gberẽ be he, si du mi ambúsa gaha irairapai, ringara ki suku araki rogo ho.

26Ono oni aká kuti gimi rugaapai na gimi ruru asarangbanga, ka oni amánga nga gi kere gbegberẽ asino re wa sa ya, watadu wiri ringara na gu kungba boro sungu ku dagba roni;

27bambiko aboro ringara nga agu yo naadu rogo ho mbata fu roni amangi gi kere gbegberẽ asino re dunduko, si du ringara agberẽ ti ni;

28ringara ka suka roni, ho oni ka gbarasa ha ni, wa si asuku gu rika aboro nga agu yo naadu rogo ho mbata fu roni.

29Bambiko gu boro nikamanga gi kere gbegberẽ asino re, agu aboro mangi he i akpára yo akpara ku sa yo ti gayo aboro.

30Si du oni ká kuti gi rugapai ka oni amánga nga gi kere gbegberẽ asino re nga gu i amangi he mbata fu roni wa sa ya, ka oni agbárasa nga tironi na ni wa sa a ya: Mi nga Yekova nga gaoni Mbori.”

← Chapter 17 Jump to: Chapter 19 →