Leviticus 19

Zande

← Chapter 18 Jump to: Chapter 20 →

1Yekova ki ya fu Mose,

2“Mo yá fu rimbasa awiri aYisaraere dunduko, Oni adú ziazia; bambiko mi nga Yekova nga gaoni Mbori du ziazia.

3Aboro ni ba sa sa ka irisa anayo na abayo, oni ki ka kuti irisa gimi arago sabiti: Mi nga Yekova nga gaoni Mbori.

4Ka oni nisá nga tironi fuo kpiaahe watadu mbakada zaragasizaragasi ambori fu roni ya: Mi nga Yekova nga gaoni Mbori.

5“Ho oni ka fu amotumo zereda ni fu Yekova, oni afú he mi idi pa roni aida.

6I ari he ni kina gu uru fu oni he, watadu fuo girarago; gu he nikaninye daku ti biata uru i anizo ho azo.

7Ka i ri he ti biata uru, si nga kere gbegberẽ sino; mi idí nga pa ha te,

8agu aboro dunduko ka ri he i ambú mbugo gayo irairapai, bambiko i gbarasi ziazia he nga ga Yekova; i akpára agu aboro re akpara ku sa yo ti gayo aboro.

9“Ho oni ka nike gaoni ũringara ni, oni anike nga ha ati kpuroni yo ki da ti ndikidi bangbanda ha te, ka oni adúngura nga futuhe fuo ke oni he a ya.

10Ka oni nizúra nga gaoni bakakue dunduko ya, ka oni nidúngura nga gu tiwitiwi rindi bakakue natiwa rogo gaoni ati bakakue a ya; oni animbu he fu rungorungo aboro na fu agu aboro sungu ku dagba roni: Mi nga Yekova nga gaoni Mbori.

11“Ka oni nidĩ nga he ya, ka oni nimángi nga pai ni biriki ya, ka oni nigúmba nga zire fu akuaroni a ya.

12Ka oni nizúnga nga he ni rimore ni biriki ya, ka gbarasa rimo gaoni Mbori: Mi nga Yekova.

13“Ka oni nirúngosi nga kuaroni watadu dĩ gayo ahe ya. Ka ga boro sunge mosoro ima nga ku beroni yuru da ku wiso ya.

14Ka oni nitíwa nga boro ngbianga watadu maa ũkota barangba iravurari ya, ono oni agunde ti gaoni Mbori: Mi nga Yekova.

15“Ka oni niírasi nga sarangbanga ya, ka oni nibérẽ nga pa du boro ni rungorungo ni ya, watadu gunde ti gu ni du ni bakere ni a ya, ono oni ka sara ngbanga ni ruru he fu akuaroni.

16Ka oni nindú nga ku bani na ku bani wa abagbarasirimo dagba gaoni aboro ya, ka oni nikúru nga ka kita ngbanga akuaroni ni zire sa kpio a ya: Mi nga Yekova.

17“Ka oni nisógo nga wirinaroni ku kpotoroni yo ya, ono oni asáka pai dagba roni na akuaroni oni ka mbu mbugo gayo ingapai.

18Ka oni niíri nga bape watadu kpi pai kuti awiri gaoni aboro ya, ono oni akpi nyemu akuaroni wa oni akpí nyemu tironi: Mi nga Yekova.

19“Oni aká kuti gimi rugaapai. Ka oni nimbú nga gaoni zogozogo anya ami vungu na kura ngbatunga anya ya; ka oni nirũ nga ngbatunga atunga rogo gaoni ati ue ya; ka oni niúkadi nga tironi na roko i atu rogo ngbatunga ahe ue ya.

20“Ka kumba ra na de nga kanga wa sino borose, pazua yo ri fu kura boro ka i ata tumo nga ri watadu ki mbu ri ti sunge kanga ya, i asasana he ti ni. I aímo nga yo te, bambiko ri adu ni kanga;

21ono kumba aniye na motumo tindika tipa ko fu Yekova, ku ngbadimo bamburoko dungurati yo, nga bakandoro tipa motumo tindika.

22Boromotumo ki mangi pa dada ingapai tipa ko na gu bakandoro nga ga motumo tindika ru ku bangiri Yekova tipa gako ingapai nga gu mangi ko; Yekova avú ko ti gu ingapai ko amangi he.

23“Ho oni ka da ni ku rogo gu ringara re ki rũku ngbatunga angua dunduko ni riahe, si du oni asá zuzuhe wa ginagina he; oni agína ha tipa garã biata, oni arí nga ha te.

24Ti biama garã zuzuhe adú dunduko ni kparakpara ha ni motumo nga ga tambuahe fu Yekova.

25Ono ti bisue garã oni ki niri zuzuhe, ya si zuku fu roni ni zoozoo ho: Mi nga Yekova nga gaoni Mbori.

26“Ka oni nirí nga pasio na kure rogo ho ya. Ka oni nisóroka nga watadu gia sangba abinza a ya.

27Ka oni nikpé nga mange pavuro rironi watadu yera mburu maingbaroni ya.

28Ka oni nidéwe nga kpotoroni tipa kpio boro watadu ke aze ti kpotoroni wa sa ya: Mi nga Yekova.

29“Ka oni nigbárasi nga wironi nga de nisa ri ni debari ya, ringara ka du na pa bari, ringara ki hi be gbegberẽ pai.

30Oni aká kuti gimi arago sabiti ki niirisi gi ziazia ba: Mi nga Yekova.

31“Ka oni nindú nga fuo agumba sangbaatoro na abinza ya; ka oni nigbáta nga yo ya, oni ka birikosi tironi ni gayo apai: Mi nga Yekova nga gaoni Mbori.

32“Oni arú ku ari bara bangiri gbinza aboro, ki niirisi kuru aboro, oni ki nigunde ti gaoni Mbori: Mi nga Yekova.

33“Ho kungba boro nisungu ni ku dagba roni rogo gaoni ringara, ka oni nimángi nga ni gbegberẽ ya.

34Gu kungba boro sungu ku dagba roni adú fu roni wa wiri ringara dagba roni, oni ki nikpi nyemu ni a wa oni akpi nyemu tironi; bambiko oni adu ni kungba aboro ringara Ezipeta yo: Mi nga Yekova nga gaoni Mbori.

35“Ka oni niírasi nga sarangbanga na pa ringbisa bagizaahe watadu na pa barõaahe na pa bangbeahe ya.

36Oni adú na gaoni ũringbisaahe nzunzu, na ũringbisa barõaahe nzunzu, na ũringbisa zende ahe nzunzu, na nzunzu úringbisa ime ahe a: Mi nga Yekova nga gaoni Mbori, naye oni ringara Ezipeta yo.

37Oni akpária pa gimi rugaapai dunduko na gimi ruru asarangbanga dunduko, ki nimangi he: Mi nga Yekova.”

← Chapter 18 Jump to: Chapter 20 →