Hebrews 10

Ahirani (आहिराणी नवा करार) - No Year

← Chapter 9 Jump to: Chapter 11 →

1मोशे ले देवामा एयेल नियम भविष्य मा येणारी ईच्छास्ना अस्पष्ट प्रतिरूप शे, पण तेस्ना असली स्वरूप नई शे. एनासाठे नियम ना आधीन लोक दर वरीस्ले एकच प्रकार ना बलिदान अर्पण करतस, पण ह्या बलिदान उपासना साठे परमेश्वर ना जोळे जानारस्ले कदीच सिद्ध नई करू सकतस.

2जर नियम तेस्ले शुद्ध करू सकता, त बलिदानस्न चळावान पहिले पासूनच थांबी जात. भक्त खरज आपला पापस कण शुद्ध हुई जातात आणि परत तेस्ना विवेक कदी बी तेस्ले पाप ना विषय मा दोषी नई ठरावस.

3पण बलिदान करेल पशुस्ना रक्त पापस्ले दूर नई करू सकत. पण हय दर वरीस्ले तेस्ले तेस्ना पापस्नी आठवण करावस.

4कारण कि हय शक्य नई, कि बईल आणि बकऱ्यास्ना रक्त पापस्ले दूर करो.

5ह्या मुळे ख्रिस्त जग मा ईसन हई सांग, “तुनी नईत यज्ञ करानी ईच्छा शे आणि नईत बलिदान, पण तुनी मनासाठे एक शरीर तयार करेल शे.

6होम-बली आणि पाप-बली कण तू खुश नई हुयना.

7तव ख्रिस्त नि परमेश्वर ले सांग, ओ परमेश्वर देख, मी ईजायेल शे, तुनी ईच्छा पुरी करासाठे जी पवित्र शास्त्र मा मना विषय मा लिखामा एयेल शे.”

8जसा ख्रिस्त नि पयले सांगेल शे, कि “तुनी ईच्छा नई माणस तुना साठे बलिदान चळावोत व तुले भेट देवोत, आणि होम-बली आणि पाप-बली कण तू खुश नई हुईना.” जरी ह्या सर्वा बलिदान त नियम ना नुसार चळावामा येतस.

9एना नंतर ख्रिस्त पवित्र शास्त्र मा हय बी सांगस, कि “ओ परमेश्वर, देख, मी ईजायेल शे एनासाठे कि तुनी ईच्छा पुरी करू,” आणि एनासाठे परमेश्वर सर्वा जुना बलिदानस्ले सोळी देस आणि ख्रिस्त ना बलिदान ले तेस्ना जागा वर ठेवस. कारण कि येशु ख्रिस्त नि परमेश्वर नि ईच्छा नुसार आमले सर्वा पापस्तून युध्द करासाठे एकच सावा आपली देह बलिदान करीसन आमले पवित्र करी दिधा.

11प्रत्येक यहुदी पुजारी वेदी समोर उभा ऱ्हायसन दररोज सेवा करस, आणि एकच प्रकार ना बलिदानस्ले घळी-घळी चळावस, पण ह्या सर्वा बलिदान कदी बी पापस्ले दूर नई करू सकतस.

12पण ख्रिस्त त पापस्नी माफी साठे स्वता ले एकच सावा बलिदान चडावीसन कायम ना साठे परमेश्वर ना सिंहासन ना उजवा बाजू जाईबसना.

13तेनी एकच चळावा ना द्वारे तेस्ले ज्या पवित्र करामा येतस, कायम ना साठे सिद्ध करी टाकेल शे, आणि आते ख्रिस्त तठे एनी वाट देखी ऱ्हायना कि तेना शत्रू तेना अधिकार ना आधीन मा करामा येवोत.

15एना बारामा पवित्र आत्मा नि साक्ष बी आमना जोळे शे. कारण कि पवित्र शास्त्र मा प्रभु नि पहिले पासूनच सांगेल होत.

16“टाईम एवावर मी तेस्ना साठे ह्या करारस्ले निश्चित करसू,” प्रभु सांगस, “मी आपला नियम तेस्ना हृदयस्मा ठेवसू, मी तेस्ले तेस्ना मन वर चिन्हांकित करसू,”

17परत परमेश्वर हय सांगस, “आणि मी तेस्ना पापस्ले आणि अधर्मस्ले आठवण बी नई कराव.”

18आणि जव परमेश्वर नि आमना पापस्ले माफ करी टाकेल शे, त मंग आखो बलिदानस्ले अर्पण करानी गरज नई ऱ्हायनी

19एनासाठे ओ विश्वासी भावूसहोण, आमना साठे येशु ख्रिस्त ना रक्त मुळे आमले हय साहस शे कि आमी स्वर्गीय महापवित्र जागा मा प्रवेश करू सकतस.

20बलिदान ना रूप मा मरीसन, ख्रिस्त नि स्वर्गीय पवित्र तंबू ना त्या परदा कण प्रवेश हुईसन आमना साठे नवा रस्ता ले उघाळी टाक जेना कण आमले जीवन भेटस.

21आणि जव कि आमना असा महान पुजारी शे, जो परमेश्वर ना घर ना अधिकारी शे.

22त या, आमी खरा मन, आणि ख्रिस्त मा पुरा विश्वास कण, आणि विवेक ले दोषमुक्त करासाठे आपला हृदय वर ख्रिस्त ना रक्त ना छीडकाव करीसन, आणि आपला शरीर ले शुद्ध पाणी कण धुईसन परमेश्वर ना जोळे जावूत.

23आणि बिगर लळखळत आपली आशा ना अंगीकार ले दृढता कण धरी ठेवूत, कारण कि परमेश्वर आपला करारस्ले पुरा करामा विश्वास योग्य शे.

24आमले त हय गोष्ट ना ध्यान ठेवाले पाहिजे कि आमी एक-दुसरा नि मदत करासाठे, प्रेम दाखाळा साठे आणि चांगला काम करासाठे एक-दुसरास्ले उत्साहित करोत.

25आणि परमेश्वर नि उपासना करासाठे एक-दुसरा ना संगे संगती कराले नई सोळाले पाहिजे, जसा कि गैरा लोक संगती कराले सोळी ऱ्हायनात. पण आमले एक-दुसरास्ले प्रोत्साहित करत राहाले पाहिजे, खास करीसन ह्या टाईम ले जव प्रभु ना परत येवाना दिन जोळे शेतस.

26कारण कि कदी सत्यता ले वयखा नंतर जर आमी जानी बुजीसन पाप करत ऱ्हायनूत, त पापस्ले दूर करासाठे परत कोणताच बलिदान बाकी नई. पण, एले सोळीसन जी वस्तू बाकी शे ती हय शे, कि भीती ना संगे येणारा न्याय नि वाट देखन आणि भस्म करणारी आग जी परमेश्वर ना विरोधीस्ले नाश करी टाकीन.

28जो माणुस मोशे ना नियम ना उल्लंघन करस. कदी तेले दोन व तीन झनस्नी साक्ष वर बिगर दया कण मृत्युदंड देवामा येस,

29त विचार करील्या कि तो कितला आजून बी भारी दंड ना योग्य ठरीन. जेस्नी परमेश्वर ना पोऱ्या ना आदर नई करत तेले पायस कण ठेच. तेनी ख्रिस्त ना त्या रक्त ले पवित्र नई समज जेना द्वारे परमेश्वर नि तेले पवित्र बनावा साठे नवा करार नि सुरुवात करेल होती. आणि तेनी पवित्र आत्मा ना अपमान कर जेना द्वारे तेनी कृपा प्राप्त करेल होता.

30असा करणारस्ले भयानक दंड भेटीन, कारण कि परमेश्वरच शे जेनी अस सांगेल शे, कि “बदला लेवाना मना काम शे, मीच बदला लीसू.” आणि परत तो हय सांगस, कि “प्रभु आपला लोकस्ना न्याय करीन.”

31जित्ता परमेश्वर कण दंड भेटन हय गैरी भयानक गोष्ट शे.

32त्या सुरुवात ना दिनस्ना बारामा विचार करा जव तुमनी पहिला सावा ख्रिस्त ना बारामा आयकेल होत. आठवण करा कि कोणत्या प्रकारे तुमी भयानक कष्ट ले सहन करीसन बी विश्वास योग्य बनेल ऱ्हायनात.

33तुमना मधून काही लोकस्ले सर्वास्ना देखता अपमान आणि छळ सहन करन पडण, आणि काही लोक त स्वतानी ईच्छा कण त्या लोकस्मा मिई ग्यात जेस्ना अपमान करामा येत होता आणि जेस्ना संगे वाईट वागामा येत होत.

34कारण कि तुमी नईत फक्त कैदीस्ना संगे तेस्ना दुखस्मा दुखी हुईनात पण जव तुमी लोकस्नी धन-संपत्ती जप्त करामा उणी. त तुमनी हय नुकसान खुशी कण स्वीकार कर, कारण कि तुमले माहिती शे कि तुमना जोळे आते बी त्या सर्वा वस्तू शेतस जेना करार परमेश्वर नि करेल होता. ज्या कि गैरा चांगला शेतस आणि ज्या सदा ऱ्हातस.

35म्हणून आपला विश्वास ले नका सोळा एनासाठे कि तुमले परमेश्वर ना कळून एक मोठा प्रतीफय भेटो.

36तुमले विश्वास मा धीर धरी ठेवण अवश्य शे. तव तुमी परमेश्वर नि ईच्छा ले पुरा करी सकश्यात आणि ते सगळ प्राप्त करू सकश्यात जेनी प्रतिज्ञा परमेश्वर नि तुमना संगे करेल शे.

37कारण कि पवित्र शास्त्र सांगस, कि “आते गैरा कमी टाईम ऱ्हाईजायेल शे, जव कि येणारा ईन आणि उशीर नई कराव.”

38आणि मना धर्मी झन विश्वास कण जित्ता राहीन, आणि कदी तेस्ना मधून काही मले सोळी देतस, त मना मन तेस्ना कण खुश नई होवाव.

39पण आमी त्या लोकस मधून नईत ज्या परमेश्वर ले सोळी देवूत आणि नाश हुई जावूत. पण आमी तेस्ना मधून शेतस ज्या परमेश्वर वर विश्वास करतस एनासाठे कि वाचाळामा येवोत.

← Chapter 9 Jump to: Chapter 11 →