Hebrews 5

Ahirani (आहिराणी नवा करार) - No Year

← Chapter 4 Jump to: Chapter 6 →

1परमेश्वर प्रत्येक महा यहुदी पुजारी ले इस्त्राएल ना लोकस मधून निवाळस, आणि माणसस्ना चांगला साठे परमेश्वर नि सेवा करासाठे नेमा मा एस. एनासाठे कि तो अर्पण आणि लोकस्ना पापस्नी प्रायश्चित्त नि बलिदान चळावो.

2एनासाठे तो अज्ञानी आणि भटकेल ना संगे सोम्यपणा कण व्यवहार करू सकस, कारण कि तो स्वता बी दुर्बळता ना आधीन मा शे.

3तेना साठे हई आवश्यक शे कि तो फक्त लोकस्ना पापस्ना प्रायश्चित कराना साठे बलिदान नई चळावो, पण आपला पापस्ले दूर कराना साठे बी बलिदान चळावो.

4कोणी बी माणुस स्वता महा पुजारी होवाना पद नई लेवू सकत. ज्या प्रमाणे परमेश्वर नि अहरोन ले पयले महा पुजारी ना रूप मा बलाव आणि निवाळ, त्याच प्रमाणे तो दुसरा महा पुजारी ले बी परमेश्वर द्वारे बलावामा येस.

5त्याच प्रमाणे, ख्रिस्त नि बी स्वता ले महा यहुदी पुजारी बनासाठे नेमी सन स्वता नि आपला सन्मान नई कर, पण परमेश्वर नि तेले हवू सन्मान दिधा आणि सांग, “तू मना पुत्र शे, मी हय घोषणा करस कि आज मी तुना बाप बनेल शे.”

6ह्याच प्रकारे पवित्र शास्त्र मा दुसरा जागा वर बी सांगस, “जसा मलकीसदेक एक पुजारी होता, त्याच प्रमाणे तू कायम ना साठे पुजारी शे.”

7येशु नि ह्या जमीन वरना आपला जीवन मा परमेश्वर ले, जो तेले मृत्यु पासून वाचाळू सकत होता, जोरमा आराया मारत आणि रळत, प्रार्थना व विनंत्या करेल होत्यात, एनासाठे तेना नम्रता आणि समर्पण मुळे परमेश्वर नि तेनी आयक.

8जव कि तो परमेश्वर ना पोऱ्या होता, तरी बी तेनी दुख उचली-उचलीसन आज्ञा मानाले सिखना.

9जस तेले सिद्ध करामा उना, त तो आपला सर्वा आदन्या मानणारस्ना साठे कायम ना तारण ना कारण हुईग्या.

10आणि तेले परमेश्वर ना कळून मलकीसदेक ना सारखा महा यहुदी पुजारी ना पद भेटणा.

11एना बारामा सांगा साठे गैर काही शे पण तेस्ना बारामा विस्तार कण सांगण कठीण शे. कारण कि तुमी परमेश्वर ना वचन ना बारामा सिखामा आळशी हुई जायेल शेतस.

12तुमी इतला लांब टाईम पासून विश्वास करत एयेल शेतस कि आते तुमी दुसरास्ले शिकाळाले पाहिजे. पण तुमलेच कोणी गरज शे जो तुमले परमेश्वर ना वचन प्राथमिक गोष्टी परत सिखाळो. तुमी त्या पोरस सारखा शेतस जेस्ले दुध नि गरज शे आणि त्या जळ जेवण नई करू सकतस.

13कारण कि दुध पीणारा पोरस्ले त धार्मिकता नि शिक्षा नि समज नई ऱ्हात, कारण कि तो बाळच शे.

14जळ जेवण तेस्ना साठे ज्या विश्वास मा पक्का शेतस, ज्या अनुभव ना द्वारे बरोबर आणि चुकीनी वयख करामा सक्षम शे.

← Chapter 4 Jump to: Chapter 6 →