Hebrews 3

Ahirani (आहिराणी नवा करार) - No Year

← Chapter 2 Jump to: Chapter 4 →

1एनासाठे ओ विश्वासी भावूसहोण, परमेश्वर नि तुमले तेना संगे सहभागी होवा साठे बलायेल शे. येशु ना बारामा मा विचार करा, जो आमना साठे परमेश्वर ना कळून प्रेषित आणि महा यहुदी पुजारी शे.

2तो परमेश्वर ना साठे जेनी तेले हय काम करासाठे निवाळेल होत विश्वास योग्य होता, जसा मोशे बी परमेश्वर ना घराणा मा आपला सर्वा कामस्मा विश्वास योग्य होता.

3घर ले बनावनार व्यक्ती घर तून जास्त आदर ना योग्य समजामा येस, ह्याच प्रकारे येशु मोशे तून गैरा जास्त आदर ना योग्य शे.

4प्रत्येक घर ना कोणीन कोणी बनावनारा ऱ्हास, पण जेनी सर्व काही बनाव तो परमेश्वर शे.

5मोशे त परमेश्वर ना घराणा मा सर्वा लोकस साठे एक सेवक ना सारखा विश्वास योग्य ऱ्हायना, जे काही मोशे नि कर ते तेना कडे इशारा करत होत जे परमेश्वर नंतर सांगणार होता.

6पण ख्रिस्त पुत्र ना सारखा परमेश्वर ना घर ना विश्वास योग्य अधिकारी शे, आणि तेना घर आमी शेतस, कदी आमी साहस वर आणि आपली आशा ना अभिमान वर आखरी लगून दृढता कण स्थिर ऱ्हातस..

7एनासाठे, जसा पवित्र आत्मा पवित्र शास्त्र मा सांगस, “कदी आज तुमी परमेश्वर नि आवाज आयकोत,

8त तेनी आज्ञा माना पासून नकार नका करा, जसा कि तुमना पूर्वजस्नी उजाळ जागा मा परीक्षा ना टाईम ले परमेश्वर ना विरुद्ध करेल होत.

9तठे तुमना पूर्वजस्नी चाळीस वरीस लगून, मना महान कामस्ले देखा नंतर बी मले आव्हान दिधी आणि मले परख.”

10ह्या मुळे मी त्या टाईम ना लोकस्वर रागे भरेल ऱ्हायना आणि सांगणा, “एस्ना मन कायम भटकत ऱ्हातस आणि मनी आदन्या ना पालन करा पासून नकार करत ऱ्हायेल शेतस.”

11तव मनी रागे भरीसन शेप्पत खादी आणि सांग, “त्या त्या जागा वर कदीच प्रवेश नई करी सकावत जठे मी तेस्ले आराम देणार होतु.”

12ओ विश्वासी भावूसहोण, सावधान राहा कि तुमना मा असा वाईट आणि अविश्वासी मन नई हो, जो जित्ता परमेश्वर ना अनुकरण कराले नकार करत हो.

13पण जठ लगून पवित्र शास्त्र कण “आज” शब्द आमना वर लागू होस, तठ लगून एक-दुसरास्ले प्रोत्साहित करत राहा, कदी अस नई हुई जावो, कि तुमना मधून कोणी पाप मा फसीसन कठीण हुई जावो.

14कदी आमी आखरी लगून दृढता कण आपला सुरुवात ना विश्वास ले धरी ठेवतस त आमी ख्रिस्त ना भागीदार बनी जातस.

15जसा कि पवित्र शास्त्र मा लिखेल शे, “कदी आज तुमी परमेश्वर नि आवाज आयकोत, त तेनी आज्ञा माना पासून नकार नका करा, जसा कि तुमना पूर्वजस्नी वाळवंट मा परीक्षा ना टाईम ले परमेश्वर ना विरुद्ध करेल होत.”

16त्या कोण लोक होतात जेस्नी परमेश्वर ना आवाज आयकीसन बी, तेना विरोध कर? निश्चितच ह्या त्या लोक होतात, ज्या मोशे ना नेतृत्व मा मिसर देश मधून निघी एयेल होतात.

17आणि त्या कोण लोक होतात, जेस्ना वर परमेश्वर चाळीस वरीस लगून रागे भरेल ऱ्हायना? निश्चित ह्या त्या लोक होतात, जेस्नी पाप कर आणि जेस्ना प्रेत उजाळ जागा मा पळेल ऱ्हायनात.

18कोणता लोकस्ना बारामा तेनी शेप्पत खाईसन सांग कि “ह्या मना आराम ना जागा वर प्रवेश नई करावत?” निश्चितच तेस्ना बारामा, जेस्नी तेनी आज्ञा ना पालन करावर नकार करेल होतात.

19ह्या प्रकारे आमी देखतस कि, त्या आपला अविश्वास मुळे परमेश्वर नि आराम नि जागा मा प्रवेश नई करू सकनात.

← Chapter 2 Jump to: Chapter 4 →