Hebrews 11

Ahirani (आहिराणी नवा करार) - No Year

1विश्वास त्या गोष्टीस्ना पक्का निश्चय शे, जेस्नी आमी आशा करतस आणि त्या वस्तूस्ना अस्तित्व ना प्रमाण शे, जेस्ले आमी नई देखतस.

2आमना पूर्वजस्ना विश्वास ह्या प्रकार ना होता, ह्या मुळे परमेश्वर तेस्ना कण खुश होता.

3परमेश्वर मुळेच आमी समजी जातस, कि पुरा जग नि निर्मिती परमेश्वर ना वचन ना द्वारे हुयेल शे. एनासाठे आमी ते सगळ जे देखतस, तेनी उत्पत्ती देखेल वस्तूसकण नई हुईनी.

4विश्वास कणच आदाम ना पुत्र हाबेल नि आपला भावू काइन तून उत्तम बलिदान परमेश्वर ना साठे चळाव, आणि त्याच बलिदान ना द्वारे परमेश्वर नि हय साक्ष दिधी कि हाबेल एक धर्मी व्यक्ती शे. कारण कि परमेश्वर तेना बलिदान कण खुश होता, आणि तरी हाबेल मरा नंतर बी आपला विश्वास मुळे आमना शी बोलस.

5विश्वास कणच हनोख नाव ना व्यक्ती स्वर्ग मा जित्ता उचला मा उना, एनासाठे कि तो मृत्यु ना अनुभव नई करू सको, आणि ह्या मुळे कोणी तेना पत्ता नई लावू सकना. स्वर्ग मा उचला मा येवाना पहिले पवित्र शास्त्र मा परमेश्वर नि हनोख ना बारामा साक्ष दियेल होती, कि तेनी परमेश्वर ले खुश करेल शे.

6फक्त विश्वासनाच द्वारे परमेश्वर ले खुश करान संभव शे. कारण कि परमेश्वर ना जोळे येनारस्ले विश्वास कराले पाहिजे कि परमेश्वर शे, आणि त्या ज्या तेले खरापणा कण झामलतस, तो तेस्ले तेना प्रतीफय देस.

7नोहा नाव ना व्यक्ती नि परमेश्वर पासून बाळ ना बारामा जी तेनी कदी देखेल नई होती चेतावणी लिसन, विश्वास कणच परमेश्वर ना आदर करीसन आदन्या मानीसन आपला परिवार ले वाचाळा साठे जहाज बनाव. परिणाम स्वरूप जग ना लोक विश्वास नई करा मुळे दोषी ठरावामा उनात, आणि नोहा ले परमेश्वर पासून ती धार्मिकता भेटणी जी विश्वास द्वारे प्राप्त होस.

8विश्वास कणच अब्राहाम ले परमेश्वर ना द्वारे बलावामा उन, त तो आदन्या मानीसन त्या जागा ले निघी ग्या जिले परमेश्वर वारसा ना रूप मा तेले देणार होता. तेले माहिती नई हुईसन कि कोठे जान शे आपला देश ले सोळीसन निघी ग्या.

9त्या जागा वर जेना करार परमेश्वर नि करेल होता, त्या जागा वर अब्राहाम परदेशी बनीसन आपला पुत्र इसहाक आणि नातू याकोब ना संगे ज्या परमेश्वर ना एकच प्रतिज्ञा ना उत्तरधिकारी होतात. आणि त्या तंबूस्मा राहाले लागनात.

10कारण कि अब्राहाम त्या स्थिर पाया वाला स्वर्गीय नगर नि वाट देखत होता, जेना निर्माण करता आणि बनावनारा परमेश्वर शे.

11विश्वास मुळेच वय निघी जावावर बी अब्राहाम ले प्रजनन नि शक्ती भेटणी पण सारा बी वांझ होती, तरी बी तेस्ना विचार हय होता कि तेनी करार करेल शे, तो खरा शे.

12पण तीना नवरा अब्राहम मरेल सारखा होता, तरी बी तो गैरा लोकस्ना पूर्वज बनी गया, जो आकाश ना तारा सारखा असंख्य शे आणि समुद्र तठ नि रेती ना सारखा असंख्य शे.

13ह्या सर्वा लोक प्रतिज्ञा ना फय बिगर लेवाना फक्त विश्वास करत मरी ग्यात, पण तेस्ले दूर कण देखीसन खुश हुईनात आणि मानी लीधात कि आमी पृथ्वी वर परदेशी आणि बाहेर ना शेतस.

14ज्या ह्या प्रकार ना गोष्टी सांगतस, त्या हय स्पष्ट करी देतस कि त्या आपला देश ना शोध मा लागेल शेतस.

15जर त्या त्या देश ना गोष्टीस्ना विचार करतात ज्या त्या मांगे सोळी एयेल होतात त तेस्ले तठे परता नि संद्धी बी होती.

16पण त्या त एक उत्तम देश म्हणजे स्वर्ग ना शोध मा लागेल होतात, एनासाठे परमेश्वर ले त्या लोकस्वर गर्व होत आणि तेले तेस्ना परमेश्वर म्हणा मुळे लाज नई वाटत होती. कारण कि तेनी त तेस्ना साठे एक नगर नि निर्मिती करेल शे.

17जव परमेश्वर नि अब्राहाम नि परीक्षा लीधी, त विश्वास मुळे अब्राहम नि आपला पुत्र इसहाक ले बलिदान चळावा ना साठे तयार होता, तोच अब्राहाम जेले परमेश्वर पासून करार भेटेल होता, तरी बी तो आपला एकुलता पुत्र नि बली देवा साठे तयार होता.

18परमेश्वर तेले सांगेल होत, “इसहाक कणच तुना वंश वाळीन जेनी प्रतिज्ञा मनी करेल होती.”

19कारण कि अब्राहाम नि मानी लीयेल होत, कि परमेश्वर सामर्थ्यी शे कि इसहाक ले मरेल मधून जित्ता करो. आणि ह्या प्रकारे प्रतिक रूप कण तेनी आपला पुत्र ले परत प्राप्त कर.

20विश्वास कणच इसहाक नि आपला दोनी पोरस्ले याकोब आणि एसाव ले प्रतिज्ञा करेल गोष्टीस्ना विषय मा आशीर्वाद दिधा.

21विश्वास कणच याकोब नि मरता टाईम ले योसेफ ना दोनी पोरस मधून एक-एक ले आशीर्वाद दिधा, आणि आपली काळी ना टोक ना सहारा लिसन परमेश्वर नि उपासना करी.

22विश्वास कणच योसेफ नि जव तो मरा वर होता, सांगेल होत, कि इस्त्राएल देश ना लोक मित्र देश ले सोळीसन निघी जातीन. आणि आठ लगून कि तेनी तेस्ले आदन्या दियेल होती कि जव त्या तठून निघतीन त तेस्ना अस्थीस्ले बी संगे ली जावोत.

23विश्वास कणच मोशे ना माय-बापस्नि तेले जन्म होवाना नंतर तीन महिना लगून दपाळी ठेवनात. कारण कि तेस्नी देख कि ते बाळ सुंदर शे, आणि त्या राजा नि आदन्या ना उलंघन कराले नई घाबरनात.

24मिसर देश ना राजा नि पोर नि मोशे न पालन-पोषण कर, आणि जव मोशे मोठा हुईग्या त विश्वासच कण तेनी देख कि लोक तेले फारो नि पोर ना पोऱ्या नई सांगोत.

25तेनी पाप मा थोळा दिन खुशी लेवा पेक्षा परमेश्वर ना लोक संगे दुख भोगान चांगल समज.

26तेनी मिसर देश नि धन-संपत्ती पेक्षा ख्रिस्त ना मुळे निंदित होवाले जास्त मूल्यवान समज. कारण कि तेनी नजर भविष्य मा प्राप्त होणारा ईनाम वर लागेल होती.

27विश्वास मुळेच तेनी मिसर देश ले सोळी टाक. तो राजा फारो ना राग कण भ्यायेल नई होता, पण दृढ बनी ऱ्हायना, समजा जसा तो अदृश्य परमेश्वर ले देखी ऱ्हायंता.

28विश्वास कणच मोशे नि वल्हांडण ना सन नि विधीस्ना पालन कर, आणि इस्त्राएलीस्ले दरवाजास्ना चौखटस्वर कोकरू ना रक्त ना छीडकाव करानी आदन्या दिधी, एनासाठे कि मृत्यु ना दूत इस्त्राएलीस्ना पहिला जल्मेल पोरस्ना ना जीव नई लेवो.

29विश्वासनाच मुळे इस्त्राएली लोकस्नी लाल समुद्र ले पार कर, समजा जशी ती सुखी जमीन होती, आणि जव मिसरीस्नी तसच करान प्रयत्न कर, कारण कि समुद्र ना पाणी परत उना आणि त्या बुळी मरणात.

30जव इस्त्राएली लोकस्नी परमेश्वर वर विश्वास कर आणि यरीहो तठ ना आजुबाजू ले सात दिन लगून चक्कर लाव, त ती भीत पळी गयी.

31विश्वास कणच राहाव वेश्या बी परमेश्वर नि आदन्या नई मानणारस संगे नाश नई हुईनी, कारण कि तिनी त्या इस्राएली हेरस्ले ज्या यरीहो शहर नि हेरगिरी कराले एयेल होतात तेस्नी शांती कण स्वागत करेल होत.

32आते मले आखो काही सांगानी गरज नई शे. कारण कि टाईम नई ऱ्हायना, कि गिदोन ना, आणि बाराक आणि शमशोम ना, आणि इफ्ताह ना, आणि दाविद ना आणि शमुवेल ना, आणि भविष्यवक्तास्ना वर्णन करू.

33एस्नी विश्वासनाच द्वारे राज्यस्ले आपला आधीन करी लीधा. धार्मिकता ना काम करात, प्रतिज्ञा करेल फय ले प्राप्त कर, सिंहस्ना तोंड बंद कर.

34आग तेस्ले चेटाळू नई सकनी, तलवार तेस्ले मारू नई सकनी, अशक्तपणा मा त्या सशक्त हुईनात. युध्द मा त्या पराक्रमी निघनात आणि विदेश नि फौज ले मारी पयाळ.

35विश्वासच कण काही बायास्नी आपला मरेलस्ले परत जित्ता देखनात, कितलाक त मार खात-खात मरी ग्यात, पण स्वातंत्र होवाना नई देखनात, एनासाठे कि मरीसन जित्ता होवा नंतर एक चांगला जीवन ना भागी हुई सकुत.

36काही लोकस्ले चेष्टास्ना आणि फटकास्ना सामना करना पडणा जव कि काही लोकस्ले बेड्यास्कन बांधीसन बंदीगृह मा टाकामा उन.

37काही लोकस्वर दगळफेक करीसन मारा मा उन. तेस्ले करवतीस्कन कापीसन दोन भाग करामा उन, तेस्ले तलवार कण मारी टाकामा उन. तेस्ले गरीबी ना सामना करन पळेल होतात, तेस्ले दुख देवामा उन आणि तेस्ना संगे वाईट व्यवहार करामा उन. त्या मेंढी-बकरीस्नी कातळीस्ले पांघरीसन ईकळे-तिकळे भटकत ऱ्हायनात

38तेस्ना साठे जग योग्य साबित नई हुईना. त्या जंगल मा, डोंगरस्वर, गुफास्मा व जमीन ना खड्डास्मा भटकत-दपत ऱ्हायनात.

39त्या सर्वा आपला विश्वास मुळे परमेश्वर ले खुश करणारा समजामा उनात. तरी बी तेस्ले प्रतिज्ञा ना फय प्राप्त नई हुईना.

40कारण कि परमेश्वर नि आमना साठे पहिले पासून आखो बी उत्तम योजना बनायेल होती, तेना उद्देश्य हवू होता कि त्या आमना संगेच सिद्धता मा पोहोचोत.

← Chapter 10 Jump to: Chapter 12 →