Hebrews 8

Ahirani (आहिराणी नवा करार) - No Year

← Chapter 7 Jump to: Chapter 9 →

1आते ज्या गोष्टी आमी करी ऱ्हायनूत, तेस्ना मधून सर्वास्तून मोठी गोष्ट हय शे, कि आमना असा महा यहुदी पुजारी शे, जो स्वर्ग मा परमधन्य परमेश्वर ना सिंहासन ना उजवा बाजू जाई बठना.

2आमना महा पुजारी स्वर्गीय खरा तंबू ना महापवित्र जागा मा सेवा करस, जेले कोणी माणुस नि नई पण परमेश्वर नि बनायेल शे.

3कारण कि प्रत्येक महा यहुदी पुजारी भेट, आणि पापस्नी माफी साठे बलिदान चळावाना साठे ठरावामा एस. ह्या मुळे, अवश्य शे कि आमना महा पुजारी ना जोळे बी काही चळावा साठे राहो.

4आणि कदी ख्रिस्त जग मा ऱ्हाता त कदीच यहुदी पुजारी नई ऱ्हाता, कारण कि जग मा मोशे ना नियम ना नुसार भेट चळावनारा यहुदी पुजारी पहिलेच पासून शेतस.

5ह्या त्या पुजारी शेतस, ज्या स्वर्गीय वस्तूस्ना प्रतिरूप व प्रतिबिम्बस्निच फक्त स्तुती करतस, कारण कि मोशे जव तंबू ना निर्माण करावर होता, त परमेश्वर ना द्वारे हय चेतावणी देवामा एयेल होती. “हय ध्यान मा ठेवज्यात कि तू तंबू ना निर्माण तसाच करजो, जसा तुले पहाड वर दाखाळा मा एयेल होता.”

6पण येशु ख्रिस्त ले जी सेवा भेटेल होती ती त्या पुजारीस्नी सेवा तून बी उत्तम होती. कारण कि तो ज्या करार ना मध्यस्थ शे तो जुना करार तून उत्तम शे आणि उत्तम वस्तूस्नी प्रतिज्ञास्वर आधारित शे.

7कारण कि कदी तो पहिला करार निर्दोष ऱ्हाता, त दुसरा करार नि गरजच नई पळती.

8पण परमेश्वर लोकस्वर दोष लाईसन सांगस, “प्रभु सांगस, देखा त्या दिन येतस, कि मी इस्त्राएल देश ना लोकस संगे, आणि यहूदा ना लोकस संगे नवीन करार करसू.

9हय त्या करार ना सारख नई राहाव, जो मनी तेस्ना पूर्वजस संगे त्या टाईम ले बांधेल होती. जव मी तेस्ना हात धरीसन तेस्ले मिसर देश मधून काळी लयनु. कारण कि त्या मना करार ना साठे विश्वास योग्य नई राहोत, आणि एनाच साठे मनी तेस्नी सुधी नई लीधी, अस प्रभु सांगस.”

10परत प्रभु सांगस कि, जो नवा करार मी येणारा दिनस्मा इस्त्राएल देश ना लोकस संगे बांधसू, तो हवू शे, कि “मी आपला नियमले तेस्ना मनस्मा टाकसु, आणि तेले तेस्ना हृदयस्वर लीखसू. मी तेस्ना परमेश्वर ठरसू, आणि त्या मना लोक ठरतीन.

11आणि कोलेच हय गरज नई पळाव कि तो आपला देश वालास्ले व आपला भावूस्ले हय शिक्षा देवो, कि प्रभु ले वयख, कारण कि धाकला पासून त मोठा लगून सर्वा मले वयखी लेतीन कि मी तेस्ना परमेश्वर शे.

12मी तेस्ना अधर्म ना कामस्ना बदला मा तेस्ना वर दया करसू, आणि तेस्ना पापस्ले परत आठवण नई कराव.”

13परमेश्वर ह्या करार ले “नवा करार” सांगस, एनासाठे तेनी पहिला करार ले जुना ठरावना, आणि ज्या वस्तू जुना आणि जीर्ण हुई जातस तेस्नी समाप्ती हुईजान आवश्यक शे.

← Chapter 7 Jump to: Chapter 9 →