Hebrews 4

Ahirani (आहिराणी नवा करार) - No Year

← Chapter 3 Jump to: Chapter 5 →

1एनासाठे जव कि परमेश्वर नि आमना संगे करार करेल शे कि आमी तेना आराम नि जागा मा जासुत, त आमी सावधान राहाले पाहिजे, कदी अस नई हुई जावो कि तुमना मधून कोणी झन त्या करार ना जागा मा प्रवेश करा पासून चुकी जावो.

2कारण कि आमले त्याच इस्त्राएलीस्ना सारखा शुभ-सुवार्ता आयकाळा मा एयेल शे, पण तेस्ले एना कण काही फायदा नई हुईना कारण कि जव तेस्नी ह्या सुवार्ता ले आयक त विश्वास कण एले स्वीकार नई कर.

3आणि आमी जेस्नी विश्वास कर, त्या आराम नि जागा मा प्रवेश करतस जेना करार परमेश्वर नि करा. जस कि परमेश्वर नि दुसरास्ना विषय मा सांग, “त्या त्या जागा मा कदीच प्रवेश नई करू सकावत जठे मी तेस्ले आराम देणार होतु. जरी परमेश्वर ना काम त जग नि निर्मिती ना टाईम लेच समाप्त हुई जायेल शे.”

4कारण कि सातवा दिन ना बारामा तेनी पवित्र शास्त्र मा अस सांगेल शे, “परमेश्वर नि सातवा दिन आपला सर्वा कामस्ले समाप्त करीसन आराम करना.”

5आणि पवित्र शास्त्र मा परत हई लिखेल शे कि, “त्या त्या जागा मा कदीच प्रवेश नई करू सकावत जठे मी तेस्ले आराम देणार होतु.”

6पण कईक लोकस जोळे त्या आराम ना जागा वर जावा साठे मोका आते बी शे, जेस्नी पयले शुभ-सुवार्ता आयक तेस्नी तेनावर विश्वास नई करा मुळे त्या आराम ना जागा ले नई लेवू सकनात.

7एनासाठे परमेश्वर नि आपला आराम ना जागा मा प्रवेश करावा साठे एक आखो टाईम ले नेम, आणि तो टाईम “आज” शे. आणि तेनी गैरा वरीस नंतर दाविद ना तोंड कण ह्या वचनस्नि घोषणा करावी, ज्या पहिले पासूनच सांगामा एयेल होतात, “कदी आज तुमी परमेश्वर नि आवाज आयकोत, त तेले आयका पासून नकार नका करा.”

8आमले हय बी माहिती शे परमेश्वर नि ज्या आराम ना जागा ना करार करेल शे, तो कनान देश नई शे, जेनामा जावा साठे यहोशू नि आमना पूर्वजस्नी पुढाकारी करी. कारण कि कदी हय कनान देश ऱ्हात त परमेश्वर नंतर हय नई सांगता कि एनासाठे एक दुसरा टाईम होता.

9एनासाठे, जसा परमेश्वर नि सर्व काही बनावा नंतर सातवा दिन ले आराम कर, तसाच परमेश्वर ना लोकस साठे कायम ना आराम ना टाईम बनेल शे.

10कारण कि परमेश्वर नि आपला काम समाप्त करा नंतर आराम करना, आणि हई त्या सगळा साठे सारख शे ज्या परमेश्वर ना जोळे आराम कराले जातस, त्या आपला काम समाप्त करा नंतर आराम करतीन.

11एनासाठे आमी त्या आराम नि जागा मा प्रवेश कराना प्रयत्न करोत, अस नई हुई जावो कि कोणी झन तेस्ना सारखा आज्ञा नई मानीसन पळी जावो.

12कारण कि परमेश्वर ना वचन जित्ता, आणि प्रबळ, आणि प्रत्येक दोनधारी तलवार तून बी जास्त धार दार शे, जीव आणि आत्मा ले, आणि गाठ-गाठ, आणि मज्जा-मज्जा ले आल्लग करीसन आर पार भेदस आणि मन ना भावना आणि विचारस्ले पारखस.

13परमेश्वर पासून जग नि कोणतीच वस्तू दपेल नई शे. तेना समोर सर्व काही उघळ आणि प्रगट शे. तेलेच आमले हिसाब देणा शे.

14येशु जो स्वर्ग ले जायेल शे, तो परमेश्वर ना पोऱ्या शे. तो आमी सर्वास्ना उच्चा महा यहुदी पुजारी शे. एनासाठे या आमी त्या विश्वास ले बिगर सोळाना दृढता कण बनेल राहोत जेले आमनी सर्वास समोर स्वीकार करेल होतुत.

15हवू महा यहुदी पुजारी, जो येशु ख्रिस्त शे, आमनी प्रत्येक कमजोरीले समजस. येले सोळीसन, जसा सैतान नि आमनी परीक्षा लीयेल होता तसाच तेनी येशु नि बी प्रत्येक गोष्ट मा परीक्षा लीधी, तरी बी तो निशपाप निघना.

16एनासाठे, या आमी साहस कण परमेश्वर ना सिंहासन ना जोळे येवोत, जो कृपा कण भरेल शे, तव परमेश्वर आमना वर दया आणि कृपा दिन, आणि आमनी गरजस्मा तो आमनी मदत करीन.

← Chapter 3 Jump to: Chapter 5 →