Hebrews 2

Ahirani (आहिराणी नवा करार) - No Year

← Chapter 1 Jump to: Chapter 3 →

1एनासाठे आमले जो संदेश भेटेल शे, तेनावर चांगल्या प्रकारे ध्यान देवाले पाहिजे. कदी अस नई हुई जावो कि आमी सत्यता पासून भटकी जावूत.

2कारण कि जो वचन परमेश्वर नि स्वर्गदूतस्ना द्वारे दियेल होता तो कायम खरा साबित हुईना, आणि त्या सर्वा लोकस्नी जेस्नी एना पालन नई कर व अनुकरण नई कर एना ठीक-ठीक दंड तेस्ले भेटेल शे.

3आमी लोक असा महान तारण ना तिरस्कार करीसन कसा वाचू सकतस? ह्या महान तारण नि घोषणा सर्वास्तून पहिले प्रभु येशु नि करेल होती, आणि ज्या लोकस्नी प्रभु ले आयक, तेस्नी तेना संदेश ले आमना साठे बरोबर ठराव.

4परमेश्वर नि बी चिन्ह, चमत्कार, आल्लग-आल्लग प्रकार ना सामर्थ्य ना काम आणि आपली ईच्छा ना नुसार पवित्र आत्मा ना वरदानस्ले वाटाणा द्वारे आपला संदेश ले खरा ठरावना.

5परमेश्वर नि तेले येणारा जग ले जेना बारामा आमी चर्चा करी ऱ्हायनूत, परमेश्वर ना दूतस्ना आधीन नई कर पण पुत्र ना आधीन मा कर.

6पण पवित्र शास्त्र मा कोणी कोठेतरी हय लिखेल शे, “ओ परमेश्वर, माणुस काय शे, कि तू तेनी चिंता करस व तेनी कायजी करस?

7तुनी तेले परमेश्वर ना दूतस्तून कम महत्वपूर्ण बनायेल शे, तुनी तेले राजा ना सारखा महिमा आणि सन्मान दिधा, आणि आपला हातस्ना कामस्वर तेले अधिकार दिधा.

8आठे अस वाटस कि परमेश्वर नि सगळ काही लोकस्ना नियंत्रण मा करी दियेल शे. म्हणजे, काही बी वाचेल नई, जे तेना नियंत्रण मा नई. पण आमी देखी सकतस कि आज बी सगळी वस्तू लोकस्ना नियंत्रण मा नई शे.”

9पण आमी येशु ले देखतस जो काही टाईम साठे परमेश्वर ना दूतस्तून थोळासाच कमी महत्वपूर्ण करामा एयेल होता, एनासाठे कि परमेश्वर नि कृपा कण तो प्रत्येक माणुस साठे मरी जावो. एनासाठे कि तो दुख उचला आणि मरी ग्या, परमेश्वर नि तेले महिमा आणि आदर दिधा.

10परमेश्वर नि ह्या सर्वा वस्तूस्ले बनाव आणि आपला साठे समाई ठीयेल शे, एनासाठे, कि गैरा लोकस्ले आपली महिमा मा सहभागी करो, परमेश्वर नि हवू निर्णय लीधा, कि प्रभु येशु दुख सहन करीसन सिद्ध बनी जावो, कारण कि येशुच शे जो तेस्ले तारण कडे लीजास.

11येशुच सर्वा लोकस्ले तेस्ना पापस पासून युध्द करस, एनासाठे जो पवित्र करस आणि ज्या पवित्र करामा येतस, त्या सर्वास्ना एकच बाप शे. ह्या मुळे येशु तेस्ले आपला भावू सांगाले नई लाजत.

12तो परमेश्वर ले सांगस, “जे काही तुनी करेल शे, ते मी आपला भावूस्ले सांगसु. मी तेस्नी सभा मा तुना भजन म्हणसू.”

13तो हय बी सांगस, “मी तेनावर विश्वास ठेवसू.” आणि परत सांगस, “मी आठे त्या लोकस्ना संगे शे जेस्ले परमेश्वर नि मले दियेल शे, ज्या पोरस सारखा शेतस.”

14कारण कि परमेश्वर ना पोर माणस शेतस, म्हणजे मांस आणि रक्त कण बनेल, त पुत्र बी एक माणुस बनी ग्या. कारण कि फक्त एक माणुस बनी सनच तो मरी सकत होता, आणि मराणा द्वारेच तो सैतान नि शक्ती ले तोळी सकत होता, जेना जोळे मृत्यु नि शक्ती होती.

15ह्या प्रमाणे येशु नि त्या लोकस्ना तारण कर ज्या मृत्यु नि भीती मा आपला पुरा जीवन दासस्ना सारखा जगी ऱ्हायंतात.

16कारण कि प्रभु येशु परमेश्वर ना दूतस्नि नई पण अब्राहाम ना वंश नि मदत करस.

17ह्या मुळे तेले पाहिजे होत कि तो सर्वा गोष्टीस्मा आमी सर्वा माणसस्ना सारखा बनो, एनासाठे कि तो आमना दयाळू आणि विश्वास योग्य उच्चा महा यहुदी पुजारी ना रूप मा परमेश्वर नि सेवा करी सको आणि आमना पापस्नी माफी साठे स्वता ले अर्पण करी सको.

18कारण कि जव तेनी कठीणता आणि परीक्षा ना अनुभव करा, त तो तेस्नी बी मदत करू सकस ज्या परीक्षा आणि कठीणता ना सामना करतस.

← Chapter 1 Jump to: Chapter 3 →