Isaiah 11

Amharic Dawro DFBE (ጌሻ ማጻፋ) No Year

← Chapter 10 Jump to: Chapter 12 →

1እሰይ ዱሩማፐ አጫይ ከሳና፤ አ ጻጱዋፐ አይፍያ ታሺ ከሳና።

2መና ጎዳ አያናይ፥ አዳ ኤራተነ አኬካ አያናይ፥ ዞርያነ ዎልቃ አያናይ፥ ኤራተነ መና ጎዳዉ ያይያ አያናይ አ ቦላ ሸምፓና።

3መና ጎዳዉ ያይያዋን እ ናሸቴ፤ ባረ አይፊ በኤዳዋን ጮ ፕርደና፤ ዎይ ባረ ሀይይ ስሴዳዋን ጮ ፕርደና።

4ሽን ህዬሳቶ እ ጽሉዋን ፕርዳና፤ ሳኣን ደእያ መቶታንቻቱ የዉዋካ እ ሱረተን ፕርዳና። እ ባረ እንጻርሳ ጋትማን ሳኣ ሾጫና፤ ባረ ዶና ሸምፑዋን ኢታቱዋ ዎና።

5ጽሎተይ አ ጼሳዉ ዳንጮ ግዳናዋ፤ አማነትያዌካ አ ምይያዉ ሳቂያ ግዳናዋ።

6ጄሪ ዶርሳ ማራና እትፐ ደአና፤ ማሂካ ዴሻ ማራና እትፐ ግሳና፤ ሚዛ ማራና፥ ጋሙዋ ማራናነ እትፐ ሄመታና፤ ጉ ናእ ኡንቱንታ ሄማና።

7ሚዛታነ ባባን ጌተትያ ዶአይ እትፐ ማና፤ ኡንቱንቱ ማራቱካ እትፐ ግሳና፤ ጋሙ ቦራዳን ኡቱላ ማና።

8ን ምያ ናአይ ሾሻ ኦላን ካአና፤ ን ዱዳ ናአይ ዎያ ሾሻ ኦላን ባረ ኩሽያ የዳና።

9ታ ጌሻ ደርያን ኦንነ ቆሄተና፥ ዎይ ባየና፤ አያዉ ጎፐ፥ አባይ ሃን ኩምያዋዳን፥ ሳአይ መና ጎዳ ኤርያዋን ኩማና።

10ሄ ጋላስ እሰይ ጻጱ አሳዉ ማላታ ግዲደ ኤቃና፤ ካዉተ ኡባይ አ ኮያና፤ እ ደእያ ሳአይካ ቦንቼታና።

11ሄ ጋላስ ጎዳይ ባረ አሳ አቶተ አሶረፐ፥ ግብጼፐ፥ ፓትሮሳፐ፥ ቶጵያፐ፥ ኤላማፐ፥ ባብሎነፐ፥ ሀማታፐነ አባ ዶናን ደእያ ቢታቱዋፐ ላኤንዋ ዛር አካናዉ ባረ ኩሽያ የዳና።

12ካዉተቶ ማላታ እ ቁ ኦደ ደንና፤ እስራኤልያፐ ላለቴዳዋንታ እትፐ ጋና፤ ይሁዳፐ ፕስክ ጌዳዋንታካ ሳኣ ኦይዱ ሚዛናፐ እ ሺሻና።

13ሄዋፐ ጉይያን፥ ኤፍሬማ ቃናቲ አፐ ሻከታና፤ ቃይ ይሁዳ ዋይስያዋንቱካ ቆለት ያና። ኤፍሬመ ይሁዳ ቃናተና፤ ይሁዳይካ ኤፍሬማ ዋይሰና።

14ኡንቱንቱ አዋይ ዉልያ ባጋን ደእያ ፕልስጼማ ጋድያ ቦላ ፓሊደ ዎና፤ አዋይ ዶልያ ባጋን ደእያ አሳካ ኡንቱንቱ እትፐ ቦንቃና። ኡንቱንቱ ኤዶማ ቦላነ ሞኣባ ቦላ ባረንቱ ኩሽያ ዎና፤ አሞናቱካ ኡንቱንቶ አዛዘታና።

15መና ጎዳይ ግብጼ ምይያን ደእያ ዞኦ አባ ኡባና መልሳና፤ ባረ ላጽያ ጫርኩዋና ባረ ኩሽያ ኤፍራጺሳ ሻፋ ቦላ ደንና። ያቲደ አሳይ መላ ኤለካ ፕናና ማላ፥ ላፑን ቄር ሻፋ ከሲደ ሾጫና።

16እስራኤልያ አሳይ ግብጼ ጋድያፐ ከስያ ዎደ ኦጊ ደኤዳዋዳን፥ አ አሳፐ አቴዳዋንቶ አሶረ ጋድያፐ ከስያ ኦጊ ደአናዋ።

← Chapter 10 Jump to: Chapter 12 →