Isaiah 48

Amharic Dawro DFBE (ጌሻ ማጻፋ) No Year

← Chapter 47 Jump to: Chapter 49 →

1“ህንተኖ ያቆባ ዛረቶ፥ እስራኤልያ ሱንን ጼሰትያዋንቶ፥ ቃይ ይሁዳ ዘረፐ ዬዳዋንቶ፥ ሀዋ ስስተ። ህንተ መና ጎዳ ሱንን ጫቂታ፤ እስራኤልያ ጾሳ ጼሲታ፤ ሽን ቱማተንነ ጽሎተን ግደና።

2ህንተ ህንተና ጌሻ ካታማ ሱንን ጼሲታ፤ እስራኤልያ ጾሳን ዘምፒታ፤ አ ሱንይ ኡባፐ ዎልቃማ መና ጎዳ።

3“ታን ካሰ ሀኔዳዋንታ ዳሮ ዎድያፐ ካሰ ኦዳድ፤ ታ ዶናፐ ኡንቱንቱ ከሴድኖ። ኡንቱንቱ ኤለካ ፖለታናዳን፥ ታን ኦድ።

4አያዉ ጎፐ፥ ኔን ኦድና ስሰናዋ፥ ነ ሞርጊ ብራታ ማላ ግድያዋ፥ ነ ሶምኢካ ናሃስያ ግያ ብራታዳን ሌቃመናዋ ታን ኤራድ።

5ሄዋ ድራዉ፥ ኔን፥ ‘ሀዋ ታ ኤቃይ ኦዳ፤ ቃይ ታ ማሰቴዳ ምስለቱነ ታ ሲልሲደ ኦዳ ምስሊ ኦዳ’ ጌናዳን፥ ታን ሄዋ ነዉ በንፐ ዶማደ ኦዳድ። ቃይ ኡንቱንቱ ሀናናፐ ካሰታደ፥ ታን ኡንቱንታ ነዉ አዋያድ።

6“ኔን ካሰ ስሳዳ፤ ሀእ ስም ሀዋ ኡባ በአ። ያትና፥ ኔን ሀዋ ኡባ ቱማ ጊኪ? ሀእፐ ዶማደ ስንዉ ኔን ኦራባ ስሳናዳን፥ ታን ኦና።

7ኡንቱንቱ ሀእ መቴድኖፐ አትና፥ በን መትበይክኖ። ኔን፥ ‘በአ፥ ታን ኡንቱንታ ኤራይ’ ጌናዳን፥ ሀችፐ ካሰ ኔን ሙለካ ኡንቱንቱባ ስሳባካ።

8ኔን ሙለካ ስሳባካ፤ ቃይ ሙለካ ኤራባካ። ነ ሀይይ በንፐካ ዶየትቤና። አያዉ ጎፐ፥ ኔን ጭምያዋ ግድያዋ ታን ኤራይ፤ ቃይ የለቶደፐካ ኔን ማካላንቻ ጌተታደ ጼሰታዳ።

9“ታ ሱን ድራዉ፥ ታን ታ ሀንቁዋ ዛራና፤ ታን ኔና ይሰናዳን፥ ታ ሀንቁዋ ተአና።

10በአ፥ ታን ኔና ፓጫድ፤ ሽን ብራዳን ግደና፤ ታን ኔና መቱዋ ታማን ፓጫድ።

11ታን ታ ድራዉ፥ ሀዋ ኦይ። አያዉ ጎፐ፥ ታ ሱንይ ቶሸታናዉ ታን ኮይከ። ታን ታ ቦንቹዋ ሀራዉ እምከ።

12“ኔኖ ያቆባ፥ ታን ጼሴዳ እስራኤልያዉ፥ ታን ግያዋ ስሳ። ታን አ፤ ኮይሩካ ታና ዉርሰይካ ታና።

13ቢታ ባሱዋ ታ ኩሺ ባሴዳ። ሳሎቱዋካ ታ ኡሸቻ ኩሺ ምጬዳ። ታን ኡንቱንታ ጼስያ ዎደ፥ ኡንቱንቱ እትፐ ኤቂኖ።

14“ህንተ ኡባይ እትፐ ሺቂደ ስስተ፤ ኤቃቱዋፐ ሀዌ ሀናናዋ ካሰቲደ ኦዴዳዌ ኦኔ? መና ጎዳይ ዶሬዳዌ አ ቆፋ ባብሎነ ቦላ ፖላና፤ አ ቀሲካ ባብሎነ ቢታ አሳ ቦላ ግዳናዋ።

15ታን ታ ሁጲያዉ አ ጼሳድነ አዉ ኦዳድ፤ አ አሄዳዌ ታና። ቃይ እ ኦያባይ ኡባይ አዉ እንጀታና።

16“ታኮ ሃ ሺቂደ፥ ሀዋ ስስተ፤ ታን ኮይሮፐ ዶማደካ ጌማን ሃሳያበይከ፤ ሄዌ ሀኔዳ ዎድያፐካ ዶማደ ታን ያን ደአይ” ያጌ። ቃይ ኡባ ሞድያ መና ጎዳይነ አ አያናይ ሀእ ታና ኪቴድኖ።

17መና ጎዳይ፥ ኔና ዎዝያዌ፥ እስራኤልያ ጌሻይ ሀዋዳን ያጌ፤ “ታን መና ጎዳይ፥ ነ ጾሳይ፥ ኔና ማድያዋ ታማርስያዋ። ኔን ባናዉ በስያ ኦግያንካ ኔና ካለያዌ ታና።

18ኔን ታ አዛዙዋ ስሴዳዋ ግድንቶነ፥ ነ ሳሮተይ ሻፋ ሃዳን ጎጋና ሽን፤ ነ ጽሎተይካ አባ ቤታዳን ሀናና ሽን።

19ነ ዛሪ አባ ሻፍያዳን፥ ነ ናናይካ ፓይዱ ባይና ሳኣ ባናዳን ጮራታና ሽን፤ ኡንቱንቱ ሱንይካ ታ ስንፐ የናን ዎይ ክቼናን አጋና ሽን” ያጌ።

20ባብሎነ ጋድያፐ ከስተ፤ ባብሎነ አሳፐካ ባቃትተ! ቃላ ቁ ኦደ፥ ናሸቻን ሀዋ ሃሳይተ፤ ሳኣፐ ሳኣ ጋጻ ጋካናዉ፥ ሀዋ ኪትተ። “መና ጎዳይ ባረ ቆማ ያቆባ ዎዜዳ” ያጊደ ኦድተ።

21እ ኡንቱንታ መላ ቢታ ግዶና ካለዳ ዎደ፥ ኡንቱንቱ ሳመትበይክኖ። ዛላፐ ሃካ ኡንቱንቶ ፑልትሴዳ፤ ዛላ እ ጳልቂና፥ ሃይ ቄዳ።

22መና ጎዳይ፥ “ኢታቶ ሳሩ ባዋ” ያጌ።

← Chapter 47 Jump to: Chapter 49 →