Isaiah 40

Amharic Dawro DFBE (ጌሻ ማጻፋ) No Year

← Chapter 39 Jump to: Chapter 41 →

1ህንተ ጾሳይ ሀዋዳን ያጌ፤ “ታ አሳ ምንተ! ምንተ!

2የሩሳላመዉካ፥ እዛ ኦሞዱዋን ደኤዳ ዎዲ ፖለቴዳዋ፥ እዝ ናጋራይ አቶ ጌተቴዳዋ ኦድተ፤ እዝ ናጋራ ድራዉ፥ መና ጎዳይ እዞ ላኡ ዳኩዋ ሙሬዳዋ ኦድተ” ያጌ።

3እት ሀዋዳን ያግያ ኮሻ ስሰቴ፤ “መላ ቢታን መና ጎዳ ኦግያ ጊግስተ፤ ኑ ጾሳዉ መላ ጋድያን አኮ ኦግያ ስት ኦተ።

4ዎምባ ኡባይ ቁ ጋና፤ ደሪ ኡባይነ የዉ ኡባይ ዝቂ ጋና። ባዬዳ ኦጊ ሳላላና፤ ኮርጱኮርጳ ቢታይካ ደምባታና።

5ሄ ዎደ፥ መና ጎዳ ቦንቹ ቆንጫና፤ አሹዋ ማዬዳ ኡባይ ሄዋ እትፐ በአና። አያዉ ጎፐ፥ መና ጎዳ ዶናይ ሄዋ ሃሳዬዳ” ያጌ።

6እት ኮሻይ፥ “ዋሳ!” ያግያዋ ስሳድ። ታን፥ “ዋጋደ ዋሶ?” ያጋድ። “አሳይ ኡባይ ማታ ማላ፤ አ ቦንቹ ኡባይካ ደምባ ጪሻ ማላ።

7መና ጎዳይ ባረ ሸምፑዋ አ ቦላን ሸምፕያ ዎደ፥ ማታይ መሌ፤ ጪሻይካ ቆቆፈቴ። አሳይ ቱሙ ማታ ማላ።

8ማታይ መሌ፤ ጪሻይካ ቆቆፈቴ፤ ሽን ኑ ጾሳ ቃላይ መናዉ ኤቂደ ደኤ” ያጋ ዋሳ።

9ኔኖ ምሽራቹዋ ኦድያ ጽዮኔ፥ ቃ ደርያ ፑደ ከሳ፤ ነኖ ምሽራቹዋ ኦድያ የሩሳላመ፥ ነ ኮሻ ዎልቃፐ ቁ ኦ፤ ያዮፓ፤ ቁ ኦ፤ ያታደ ይሁዳ ካታማቶ፥ “ህንተ ጾሳይ ሀዌኮ” ያጋ ኦዳ።

10በእተ፥ ኡባ ሞድያ መና ጎዳይ ዎልቃና ዬ፤ አ ቀሲ አዉ ሞዳና። በእተ፥ አ ዎይታይ አናና ደኤ፤ አ ኦሱዋ ጋቲካ አ ስንና።

11እ ባረ ዉድያ ሄንንቻዳን ምዜ፤ ባረ ዶርሳ ማራቱዋካ ባረ ቀስያን ሺሺደ፥ ባረ ክዉዋን እድማና። ንያዋንታካ ሎዳን ካለና።

12ሃቱዋ ባረ ኩሽያ ኮጵያን ማኬዳዌ፥ ሳሎቱዋ ታካያን ልኬዳዌ፥ ቢታ ባና ቁንኣን ማኬዳዌ፥ ቃይ ደረቱዋነ ዞዘቱዋካ ሚዛናን ልኬዳዌ ኦኔ?

13መና ጎዳ አያና አዛዜዳዌ፥ ዎይ አ ዞርያዋ ግዲደ ታማርሴዳዌ ኦኔ?

14እ ባረዉ ቆንጫናዳን፥ መና ጎዳይ ኦናና ዞረቴዴ? ዎይ አ ሱረ ፕርዳ ኦግያ ታማርሴዳዌ ኦኔ? ዎይ አ አዳ ኤራተ ታማርሴዳዌ ዎይ አ አኬካ ኦግያ በሴዳዌ ኦኔ?

15በእተ፥ ካዉተቱ ባሬታ ግዶን ደእያ እት ጾክያ ሃ ማላ። ኡንቱንቱ ሚዛናን ደእያ ጉ ባናዳን ፓይደቴድኖ። በእተ እ ዳጋቴዳ ሃካ ሊቆ ባናዳን ማዛኔ።

16ሊባኖሳ ምይ አዉ ኤናዉ ግደና፤ አን ደእያ ዶአቱካ ጹግያ ያርሾ ግድክኖ።

17ካዉተቱ ኡባይ አ ስንን ባይናዋ ማላ፤ ኡንቱንቱ አ ስንን ኡባ ባይናባፐካ ጉዳን ፓይደቲኖ።

18ያትና፥ ጾሳ ህንተ ኦናና ማላትሲቴ? ዎይ አይ ምስለቱዋና ልኪ ጼሊቴ?

19ኤቃ ምስልያ ግዶፐ፥ ኩሽያ ሂላ ኤርያ አሳይ አ ማሴ፤ ሄዋ ቃይ ዎርቃ ትግያዌ ዎርቃን ሼሼ፤ ብራ ትግያዌካ አ ቦላ ብራ ሳንሳላታ መ።

20ሄዎ ሻሉ ባይና ህዬሳይ ያርሾ ዎቀና ም ዶሬ፤ ያቲደ፥ ሄ ምስሊ ቃጸናዳን ኤሳናዉ ኩሽያ ሂላ ኤርያ አሳ ኮዬ።

21ኤርበይክቴ? ዎይ ስስበይክቴ? ሀዌ ህንተንቶ ኮይሮፐ ኦደትቤኔ? ዎይ ሳአይ መቶደፐ ሀዋ ህንተ አኬክበይክቴ?

22እ ቢታ ዩሹዋፐ ቦላ ባጋን ባረ አራታን ኡቴ፤ ጋድያን ደእያዋንቱ አ ስንን ቡምቡረ ማላ። ሳሎቱዋ ጋርዱዋዳን ፕድ ኦያዌ፥ ቃይ ደኢያሳ ኦደ፥ ዱንካንያዳን ቶልያዌ፥

23ካፓቱዋ ባይናባዳን ኦያዌ፥ ቢታ ካለያዋንታካ ሀዳ ኦያዌ አ።

24ብሮ ኡንቱንቱ ቶከቶሳናነ ዘረቶሳና፥ ቃይ ጻጱዋካ ብሮ ጋድያን የዶሳና፥ ጾሳይ ኡንቱንቱ ቦላ ጫርኩዋ የድ አጌዳ፤ ኡንቱንቱካ መሌድኖ፤ ጎቲ ኡንቱንታ ሱላዳን አፌዳ።

25ጌሻይ ኡንቱንታ፥ “ያትና፥ ታን አናና ልከታናዉ ታና ኦናና ማላትሲቴ?” ያጌ።

26ህንተ አይፍያ ቁ ኦደ፥ ሳሉዋ ጼልተ፤ ሄ ጾልንተቱዋ መዳዌ ኦኔ? እ ኡንቱንታ ኦላንቻዳን ካለ፤ ኡንቱንቱ ፓይዱዋካ ኤሬ። እ ኡንቱንታ ኡባካ ኡንቱንቱ ሱንን ሱንን ጼሴ። አ አንጋ ግታተፐነ አ ዎልቃ ምኖተፐ ደንዴዳዋን፥ ኡንቱንቱፐ እቱነ የና።

27ኔኖ ያቆባ፥ ነኖ እስራኤልያዉ፥ “ታ ኦጊ መና ጎዳፐ ጌሜዳ፤ ጾሳይ ታ ፕርዳ ሸነኮ ጌዳ” ያጋ አያዉ አማሳላይ? ቃይ አያዉ ሀዋዳን ሃሳያይ?

28ኤራበይኪ? ስሳበይኪ? መና ጎዳይ መና ጾሳ፤ እ ቢታ ኡባካ መዳዋ። እ ዳቡረና፤ ዎይ ዎልቃይ አዉ ዉረና፤ ኦንነ አ ቆፋ ኤራናዉ ዳንዳየና።

29ዳቡራንቻዉ ዎልቃ እሜ፤ ምኖተይ ባይናዎካ ምኖተ ጉጄ።

30ሀራይ አቶ ያላጋ ናናይካ ዳቡሪኖ፤ ቃይ ዎልቃ ዉሪኖ። ዎዳላቱካ ኡባና ዳቡሪደ ኩንዲኖ።

31ሽን መና ጎዳ አማነቲደ ናግያዋንቱ፥ ባረንቱ ዎልቃ ኦራና። ኡንቱንቱ አርጋንቱዋዳን፥ ቀፍያን ፑደ ከሳና፤ ዎጺደ ዳቡርክኖ፤ ሀመቲደካ ዎልቃ ዉርክኖ።

← Chapter 39 Jump to: Chapter 41 →