Isaiah 2

Amharic Dawro DFBE (ጌሻ ማጻፋ) No Year

← Chapter 1 Jump to: Chapter 3 →

1ይሁዳ ቢታባነ የሩሳላመ ካታማባ አሞጻ ናአይ እስያስ በኤዳዌ ሀዋ።

2ዉርሰ ጋላሳቱዋን መና ጎዳ ጌሻ ጎሊ ኬጸቴዳ ደሪ ደረቱዋ ኡባፐ ቂደ ቤታና፤ ዞዘቱዋ ኡባቱዋፐካ ቦላና ቁ ቁ ጋና። ካዉተቱዋን ደእያ አሳይ ኡባይ አኮ ዛታና።

3ዳሮ አሳይ ዪደ፥ “ሃይተ! መና ጎዳ ደርያ፥ ያቆባ መና ጎዳ ጌሻ ጎልያ አነ ፑደ ከሶይተ። እ ኮይያዋዳን ኑን ባና ማላ፥ እ ኑና ባረ ኦግያ ታማርሳና” ያጋና። አያዉ ጎፐ፥ ህጊ ጽዮነፐ፥ ጾሳ ቃላይካ የሩሳላመፐ ከሳና።

4ካዉተቱዋፐነ ካዉተቱዋፐ ግዱዋን እ ፕርዳናነ ዳሮ አሳቱዋ ፓሉምያ ሻካና። ኡንቱንቱ ባረንቱ ማሻ ማራሻ፥ ባረንቱ ቶራካ ባጫ ከሳናዉ ቆጻና። ካዉተይ ካዉተ ቦላ ማሻ ደንና። ሄዋፐ ጉይያን ኡንቱንቱ ሙለካ ኦላ ትምርትያ ታማርክኖ።

5ህንተኖ፥ ያቆባ ዛረቶ፥ ሃይተ! አነ መና ጎዳ ፖኡዋን ሀመቶይተ።

6ጾሳዉ፥ ነ አሳ፥ ያቆባ ዛራቱዋ አጋዳ። ኡንቱንቱ አዋይ ዶልያ ባጋ ጋድያ አሳቱዋ ቢታን ኩሜድኖ፤ ፕልስጼማ አሳቱዋዳን ካዪኖ። ኡንቱንቱ አላጋ አሳቱዋና እትፐ ዙፐቲኖ።

7ኡንቱንቱ ጋዲ ብራይነ ዎርቃይ ኩሜዳዋ፤ ኡንቱንቱ ሻሎ ዛዋይ ባዋ። ኡንቱንቱ ጋዲ ፓራይ ኩሜዳዋ፤ ኡንቱንቱ ፓራ ጋረቶ ዛዋይ ባዋ።

8ኡንቱንቱ ጋዲ ኤቃቱዋን ኩሜዳዋ፤ ኡንቱንቱ ባረንቱ ኩሺ ኦዳ ኦሶ ሆኪደ ጎይኒኖ።

9ሄዋ ድራዉ፥ አሳይ ኡባይ ቶሸታናነ ካዉሻና። ኡንቱንቶ አቶ ጎፓ።

10መና ጎዳ ዳጋማፐነ አ አንጋ ቦንቹዋፐ አታናዉ ዛላኮ ቢተ፤ ቢታ ግዶን ቆሰትተ!

11አሳ ኦቶሩ ጊያና፤ አ ክላሁካ ሲላና፤ ሄ ጋላስ መና ጎዳ ጻላላይ ቁ ቁ ጋና።

12ኡባፐ ዎልቃማ መና ጎዳይ እት ጋላሳ ኬሬዳ። ሄ ጋላስ ኦቶረትያዋንታ፥ አይያዋንታነ ቁ ቁ ጌዳዋንታ ካዉሻና፤

13አዱሳነ ቃ ግድያ ሊባኖሳ ዝጋቱዋነ ባሳነ ዎላ ኡባ ይሳና፤

14ቃ ደረቱዋካ ዞዘቱዋካ ደምባያና፤

15ካታማ ናግያ አዱሳ ሚጻቱዋ ኡባነ ካታማ ዩሹዋን ደእያ ምኖ ግምበቱዋ ዝቂሳና፤

16ጾሳይ ግታነ ሎእያ ማርካባቱዋካ ሃን ምትሳና።

17አሳ ኦቶሩ ዝቂ ጋና፤ አ አዩካ ያና። ሄ ጋላስ መና ጎዳ ጻላላይ ቁ ቁ ጋና፤

18ኤቃ ኡባይካ ኡባና ያና።

19መና ጎዳይ ሀ ጋድያ ቃናዉ ደንድያ ዎደ፥ አ ዳጋማፐነ አ አንጋ ቦንቹዋፐ አታናዉ አሳይ ሹቻ ጎንጎሎነ ቢታ ኦላዉ ባቃታና።

20ሄ ጋላስ አሳይ ጎይናናዉ መዳ ባረንቱ ብራ ምስለቱዋነ ባረንቱ ዎርቃ ምስለቱዋ ኦጮቶነ ሀራ ካፎቶ ኦላና።

21መና ጎዳይ ሀ ጋድያ ቃናዉ ደንድያ ዎደ፥ አ ዳጋማፐነ አ አንጋ ቦንቹዋፐ አታናዉ ኡንቱንቱ ጎንጎሎ ግዶነ ሹቻ ኮፖ ግዶ ባቃታና።

22ስም ሀይቂያ አሳን አማነትያዋ አግተ! አሳይ አይ ማዳኔ?

← Chapter 1 Jump to: Chapter 3 →