Isaiah 28

Amharic Dawro DFBE (ጌሻ ማጻፋ) No Year

← Chapter 27 Jump to: Chapter 29 →

1ኤፍሬማን ደእያ ማትያዋንቱ ካላቻዉነ፥ ዎይንያ ኤሳይ ጾኔዳዋንቱ አራዳ ዛንጋራን ደእያ፥ ሹልያ ጪሻ ማላ ግዴዳ አ ቦንቹዋ ፑላዉ አየ አና!

2በእተ፥ ጎዳዉ ዎልቃማነ ምኖ ግዴዳ እት አሳይ ደኤ፤ ጎዳይ አ ሻቻ ኡሹዋዳን፥ ባይዝያ ጎትያዳንነ ኩንደ ጎግያ ዎልቃማ ሃዳን፥ ምኖ ኩሽያን ዱገ ሳኣ ኦላና።

3ሄ ማትያ ኤፍሬማ አሳቱዋ ኦቶሩዋ ካላቻይ ገድያን የታና።

4አራዳ ዛንጋራ ሁጲያን ደእያ ቆቆፈትያ ጪሻይ፥ አ ቦንቹዋ ፑላይ ዎዲ ጋካናፐ ካሰቲደ ቴሬዳ ባላስያ ማላ ግዳናዋ፤ እት አሳይ ሄ ባላስያ በእያ ዎደ፥ ባረ ኩሽያን ኦይቆሳና ማና።

5ሄ ጋላስ ኡባፐ ዎልቃማ መና ጎዳይ ባረ አሳፐ አቴዳዋንቶ ቦንቹዋ ካላቻነ ፑላዉ ሁጲያን ኡትያ አሌቁዋ ግዳናዋ።

6እ ዳናቶ ልከ ፕርድያ አያና፥ ኦላ ሚጻፐ ዛርያዋንቶካ ዎልቃ ግዳናዋ።

7ሀዋንቱካ ዎይንያ ኤሳ ኡሺደ ዪጮቲኖነ ማይያ ኡሻን ጋንድጋሪኖ። ቄሲነ ትምቢትያ ኦድያዌ ማይያ ኡሻን ዪጮቲኖ፤ ኡንቱንቱ ዎይንያ ኡሻን ሻዌቲኖ፤ ማይያ ኡሻንካ ጋንድጋሪኖ። ሳፃ ልከ በእክኖ፤ ፕርዲደካ በቲኖ።

8ኡንቱንቱ ምያ ማዳ ኡባይ ጮሻ ጻላላ ግድያ ድራዉ፥ ባይቤና ሳአይ ሙለካ ባዋ።

9ኡንቱንቱ ሀዋዳን ያጋና፤ “ኤራተ እ ኦና ታማርሳኔ? ኪታካ ኦስ ቆንጭሳኔ? ማ ፓኩዋ ብሮ አጌዳዋንቱሴየ፥ ዎይ ን ብሮ ዱዳዋንቱሴ?

10አያዉ ጎፐ፥ እ ግያዌ ሀዋ፤ አዛዙዋ ቦላ አዛዙዋ፥ አዛዙዋ ቦላ አዛዙዋ፥ ዎጋ ቦላ ዎጋ፥ ዎጋ ቦላ ዎጋ፥ ሀዋን ጉ፥ ሄዋን ጉ” ያጋና።

11ሽን ጾሳይ አላጋቱዋ ቃላንነ እማቱዋ ዶናን ሀ አሳዉ ሃሳያና።

12እ ኡንቱንቶ ሀዋዳን ያጌዳ፤ “ሀዌ ሸምፑዋ። ጻላሌዳዋ ሸምፕስተ። ሀዌ ሸምፕ አክያ ሳ” ያጌዳ። ሽን ኡንቱንቱ ስሰናን እጼድኖ።

13ሄዋ ድራዉ፥ ኡንቱንቱ ቢደ ኩንዳና ማላ፥ መአና ማላነ ግትያን ኦይቀቲደ ኦሞዱዋ ባና ማላ፥ መና ጎዳ ቃላይ ኡንቱንቶ አዛዙዋ ቦላ አዛዙዋ፥ አዛዙዋ ቦላ አዛዙዋ፥ ዎጋ ቦላ ዎጋ፥ ዎጋ ቦላ ዎጋ ግዲደ፥ ሀዋን ጉይ፥ ሄዋን ጉይ ግዴዳ።

14ሄዋ ድራዉ፥ ህንተኖ፥ የሩሳላመን ደእያ አሳ ሞድያ ቅሊጭያዋንቶ፥ መና ጎዳ ቃላ ስስተ።

15ህንተ፥ “ኑን ሀይቁዋና ጊጌዶ፤ ስኦልያናካ ጫቀቴዶ፤ ኑን ዎርዱዋ ኑዉ ደኡዋ ኦዳ ድራዉነ ማልትያ ኑዉ ቆሰት አትያሳ ኦዳ ድራዉ፥ ዎልቃማ ቦሻይ ዪደካ ኑና ቦቼናን አና” ያጊደ ጬቀቲታ።

16ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ “በእተ፥ ታን ጽዮነን ባሱዋ ሹቻ፥ ፓጨቴዳ ሹቻ፥ ጎዳ ጻጱዋ ምንስያ፥ አልኦ ሹቻ ዎድ፤ አን አማንያ ኦንነ ዬላተና።

17ታን ሱረ ፕርዳ ባሱዋ ልክያ ዎዶሩዋ፥ ጽሎተካ ቱምቢያ ኦና። ቃይ ህንተ አማነትያ ዎርዱዋ ጌሱዋ፥ ሻቻይ ሾጫና፤ ህንተ ቆሰት አትያሳካ ሃይ ሙካና” ያጌ።

18ሄዋፐ ጉይያን፥ ህንተ ሀይቁዋና ጫቀቴዳ ጫቁ ላለታና። ስኦልያናካ ጫቀቴዳ ጫቁካ ምነና። ዎልቃማ ቦሻይ ይያ ዎደ፥ ህንተ አን ሾጨታና።

19ሄ ቦሻይ ዎንታ ዎንታ፥ ቃምነ ጋላስ ሄዋና አና፤ ሄ አያ ዎደ ኡባንካ፥ ህንተና አክ ባና። አ ኪታ አኬክያዌ ህንተንቶ ሻቢርሳ ዳጋማ ግዳናዋ።

20አርሳይ ገድያ ጮጎቲደ ግሳናዉ ቃን፤ አፍላይካ ጋ ማያናዉ ጉ።

21አያዉ ጎፐ፥ ፓራጺማ ደርያ ቦላን መና ጎዳይ ኦዳዋዳን፥ ባረ ኦሱዋ፥ ባረ እማ ኦሱዋ፥ ሄዌካ ባረ ኦራ ኦሱዋ ኦናዉ ደንዳና። ቃይ ጋባኦና ዛንጋራን ሀንቀቴዳዋዳን ሀንቀታናዋ።

22ጎዳፐ፥ ኡባፐ ዎልቃማ መና ጎዳፐ እ ቦሻ ቢታ ኡባ ቦላ አሀናዉ ቃቼዳዋ ታን ስሴዳ ድራዉ፥ ህንተ ቃሹ ምነና ማላ፥ ቅሊጭያዋ አግተ።

23ህንተ ሀይ ሃ የጊደ፥ ታን ኦድያዋ ስስተ፤ ታ ሃሳያካ አኬኪደ ስስተ።

24ካ ዘራናዉ ጎሽያ ጎሻንቻይ ኡባ ገደካ ጎሺደ ደኢ? ቃይ እ ኡባ ገደካ ጉሉዋ ክንቺደነ ሊቅሲድ ደኢ?

25ጋድያ ሊቅሲደ፥ አኑጋ ላሌ፤ ካረ ሳዉዋካ ዘሬ፤ ዛርጋካ አ ይፓን፥ ባንጋካ አ ቆሙዋን፥ ሞርገ ምካ አዉ በስያ ሳኣን ዘሬ ግደኔ?

26አያዉ ጎፐ፥ ሀ ሂላ አ ጾሳይ አ ኤርሴነ ታማርሴ።

27ካረ ሳዉዋ ኡዱላ ምን ቆጸና፤ አኑጋካ ጩጉዋን ቡከና። ሄዋ አጊደ፥ ካረ ሳዉዋካ ጋትማን፥ አኑጋካ ጻምአን ቆጼ።

28ኡክ ኡክያ ካ ቆጽያሳን ቆጽያዌ ሊቅሲየ? ግደና፥ እ አ ቆጺደ ቆጺደ፥ መናዉ ደኤና። ቃይ እ ካ ቡክያ ፓራ ጋረቱዋ አ ቦላና ላጊደካ ካይ ጋጨታናዳን ኦና።

29ሀዌካ ቃይ ማላልስያ ዞርያ ዞርያ፥ ኦሱዋካ አዳ ኤራን ኦያ ኡባፐ ዎልቃማ መና ጎዳፐ ዬ።

← Chapter 27 Jump to: Chapter 29 →

Recommended Reading

Commentary Isaiah Commentaries → Devotional Isaiah Devotional Guide → Get This Bible Amharic Dawro DFBE (ጌሻ ማጻፋ) No Year Study Bible →