Isaiah 56

Amharic Dawro DFBE (ጌሻ ማጻፋ) No Year

← Chapter 55 Jump to: Chapter 57 →

1መና ጎዳይ ሀዋዳን ያጌ፤ “ቱሙ ፕርዳ ናግተ፤ ጽሎባ ሀንተ፤ አያዉ ጎፐ፥ ታ አሹ ኤሌሊደ ያና፤ ታ ጽሎተይካ ማታን ቆንጫና።

2ሀዋ ኦያ ኡራ፥ ሳምባታ ቱንሰናዳን ቦንችያ ኡራነ ኢታባ ኦናን እጽያ ኡራ ታን አንጃና” ያጌ።

3መና ጎዳኮ ሺቄዳ በቲ፥ “መና ጎዳይ ታና ባረ አሳፐ ቱሙ ሻካና” ጎፖ። ቃይ ሙይሬሳይካ፥ “በአ፥ ታን መሌዳ ም” ጎፖ።

4መና ጎዳይ ሀዋዳን ያጌ፤ “ታ ሳምባታቱዋ ቦንችያ፥ ታና ናሸችያባ ዶርያነ ታ ጫቁዋ ምንሲደ ናግያ ሙሬሳቶ፥

5ኡንቱንቶ ታን ታ ጌሻ ጎልያ ግዱዋንነ ታ ድርሳ ግምቢያ ግዶን፥ ኡንቱንቱ ሀሳየትያዋ እማና። ማጫ ናናቱዋፐነ አቱማ ናናቱዋፐ ሎእያ ሱን ታን ኡንቱንቶ እማና፤ ታን ኡንቱንቶ መናዉ የና ሱን እማና።

6መና ጎዳዉ ኦናዉ፥ መና ጎዳ ሱን ዶሳናዉነ አ ቆማ ግዳናዉ፥ ባረንታ አኮ ሺሽያ በተቱዋ፥ ቃይ ሳምባታ ቱንሰናን ቦንችያዋንታነ ታ ጫቁዋ ምንሲደ ናግያዋንታ ኡባቱዋ

7ታን ታ ጌሻ ደርያ አሀና፤ ታ ዎሳ ጎልያን ኡንቱንታ ናሸቻና። ኡንቱንቱ ታ ያርሽያ ሳኣ ቦላን ሺሽያ፥ ጹግያ ያርሹነ ሀራ ያርሹ አከታና፤ አያዉ ጎፐ፥ ታ ጎሊ አሳይ ኡባይ ጾሳ ዎስያ ጎልያ ጌተታና” ያጌ።

8እስራኤልያፐ ላለቴዳዋንታ ሺሽያ፥ ኡባ ሞድያ መና ጎዳይ፥ “ሺቄዳዋንቱ ቦላ ጉጃደ፥ ታን ሀራቱዋካ ሺሻና” ያጌ።

9ህንተኖ ባዙዋ ዶአቶ፥ ህንተኖ ዎራን ደእያ ዶአቶ፥ ኡባይካ ሃ ዪደ ሚተ።

10እስራኤልያ አሳ ናግያዋንቱ ቆቀ፤ ኡንቱንቶ ኡባዉካ ኤር ባዋ። ኡንቱንቱ ኡባይካ ቦጫናዉ ዳንዳየና ዱደ ካናቱዋ ማላ። ኡንቱንቱ ግሲደ አኩመቲኖ፤ ኡንቱንቱ ገምእሹዋ ዶሲኖ።

11ኡንቱንቱ ሚደ ካለና ካና ማላ፤ ካል ኤርክኖ። ኡንቱንቱ አኬክ ፓጬዳ ሄንንቻ፤ ኡንቱንቱ ኡባይ ባረንቱ ኦግያ ኦግያ ስሜድኖ፤ ኡባይካ ባረንቱ ጎአ ጻላላ ኮዪኖ።

12ኡንቱንቱ ኡባይካ፥ “ሃ ዪተ፤ ዎይንያ ኤሳ አነ ኡሼቶ። አነ ኑ ማይያ ኡሻ ኩመን ጋነቶ! ዎንታይካ ሀች ማላ ግዳናዋ፤ ዎይ ሀችፐካ አ ሎአና” ያጊኖ።

← Chapter 55 Jump to: Chapter 57 →