Isaiah 29

Amharic Dawro DFBE (ጌሻ ማጻፋ) No Year

← Chapter 28 Jump to: Chapter 30 →

1ኔኖ ዳዊተ ደኤዳ አሪኤላ ግያ ካታማዉ፥ ነዉ አየ አና! ላይ ቦላን ላይ ጉጃ፤ ባላቱዋካ ዛራ ዛራደ ቦንቻ።

2ታን አሪኤላ ግያ ካታማ ብሮካ ኡንኤና፤ ኡንቱንቱ ዝላላናነ ዬካና። ሄ ካታማይ ሱይ ካሜዳ ያርሽያ ሳኣ ማላ ግዳናዋ።

3ታን ነ ዩሹዋን ዶዳናነ አዱሳ ግምቢያን ኔና ድራና፤ ነ ቦላን ኦላ ማማ ኬጻና።

4ሄዋፐ ጉይያን፥ ኔን ቢታ ጪሙዋፐ ሃ ፑደ ሃሳያና፤ ህርክ ባናፐ ነ ኮሻይ ያና። ነ ኮሻይ ሞይትልያ ኮሻ፥ ቢታ ግዶፐ ከሳና፤ ነ ሃሳያይካ ባና ግዶፐ ሳሱከታና።

5ሽን ነ ሞርከቱ ሊቆ ባና ኬሻ ጮራነ ነ መቀ ባይናዋንቱ ፓይዱካ ጫርኩ አፍያ ሱላ ኬሻ ዳሮ ግዳናዋ። ቆፐናን ደእሽን ኤለካ፥

6ኡባፐ ዎልቃማ መና ጎዳይ ጉጉንን፥ ቢታ ቃን፥ ዎልቃማ ኮሻን፥ ጎትያን፥ ጫርኩዋንነ ምያ ታማ ላጩዋን ህንተና ጾሞሳና።

7አሪኤላ ካታማ ኦልያ ጮራ ካዉተ ኡባይ፥ ሄ ካታማነ አ ጌሱዋ ኦልያ ኡባይ፥ አ ዋይስያ ኡባይ አኩሙዋዳን፥ ቃማ ሳጻዳን ሀናና።

8ኮሻቴዳ አሳይ አኩሙዋን ሜ፤ ሽን ቤጎትያ ዎደ አ ኮሻይ አገና፤ ዎይ ሳመቴዳ አሳይ አኩሙዋን ኡሼ፤ ሽን ቤጎትያ ዎደ ዳቡሬ፤ ሳሙዋካ አልቤና፤ ጽዮነ ደርያ ኦልያ ጮራ ካዉተ ኡባይ ሄዋዳን ሀናና።

9ህንተ ህንተረካ ዳመቲደ፥ ዳማ አሳ ግድተ፤ ህንተና ህንተረካ ቆቅሲደ፥ ቆቀ አሳ ግድተ። ማትተ፤ ሽን ዎይንያ ኤሳና ግዶፖ። ጋንድጋርተ፤ ሽን ማይያ ኡሻና ግዶፖ።

10አያዉ ጎፐ፥ መና ጎዳይ ገምእሹዋ ሶኑ ኦያ አያና ህንተ ቦላን ጉሴዳ። ትምቢትያ ኦድያዋንቶ፥ ያቲደ ህንተ አይፈቱዋ እ ጎዜዳ። ሳፃ በእያዋንቶ፥ ህንተ ሁጰቱዋካ ጉሎዬዳ።

11ሀ ኡባ ሳጻይ ነዉ አታመቴዳ ማጻፋ ማላ ግዴዳ። አሳይ፥ “ሄይ፥ ሀዋ ናባባ” ያግ፥ እት ናባብ ዳንዳይያ ኡራዉ እምያ ዎደ እ፥ “ማጻፋይ አታመቴዳ ድራዉ፥ ታን ናባባናዉ ዳንዳይከ” ያጋና።

12ቃይ ማጻፋ ናባብ ዳንዳየና ኡራዉ፥ “ሄይ፥ ሀዋ ናባባ” ያጊደ እምያ ዎደ፥ እ፥ “ታን ናባባናዉ ዳንዳይከ” ያጋና።

13ያትና፥ ጎዳይ ሀዋዳን ያጋና፤ “ሀዌ አሳይ ባረ ቦላ ዶናን ታኮ ሺቄ፤ ባረ እንጻርሳን ታና ቦንቼ፤ ሽን ኡንቱንቱ ዎዛናይ ታፐ ሃኩዋን ደኤ። ኡንቱንቱ አሳይ መዳ ዎጋ ታማሪደ፥ ታዉ ጮ ጎይኒኖ።

14ሄዋ ድራዉ፥ በእተ፥ ታን ሀ አሳ ቦላ ዛረደካ ማላልስያባ ኦና፤ ማላልያባነ ኦራባ ኦና። ኡንቱንቱ ኤራንቻቱዋ አዳ ኤራተይ ዳላማና፤ ኡንቱንቱ አኬካንቻቱዋ አኬካይካ ቆሰታና” ያጌዳ።

15ባረ ሀልቹዋ ጪማዪደ፥ መና ጎዳፐ ቆስያዋንቶ፥ ባረንቱ ኦሱዋ ማን ኦደ፥ “ኑና ኦን በኢ? ኑና ኦን ኤሪ?” ያግያዋንቶ አየ አና!

16ህንተ የዎቱዋ ላሚታ፤ ኡርቃ መያዌ ኡርቃ ማላ ጊደ ቆፒታ! መቴዳዌ መዳዋ፥ “እ ታና መቤና” ጋኔ? ኦቱ ባረና መዳዋ፥ “እ አይነ ኤረና” ጋናዉ ዳንዳዪ?

17ሊባኖሳ ዎራይ አራዳ ጋድያዉ ላመታናዉ፥ አራዳ ጋዲ ቃይ ዎራ ግዳናዉ፥ ጉ ዎዲ አቴዳ ግደኔየ?

18ሄ ጋላስ ቱለቱ ማጻፋ ቃላ ስሳና፤ ለምእለምኣፐነ ማፐ ከሲደ፥ ቆቀቱዋ አይፊ ጼላና።

19አሽከቱ ጉጂድካ መና ጎዳን ናሸታና፤ አሳ ግዶን ደእያ ህዬሳቱካ እስራኤልያ ጌሻን ሀሹ ጋና።

20መቀ ባይናዋንቱ ዉራና። ቅሊጭያዋንቱ ትምእ ጋና። ኢታባ ኦናዉ ዎችያዋንቱ ኡባይ ያና።

21ሄዋንቱ የዉዋን አሳ ባይዛንቻ ከስያዋንታ፥ ችሎታን አሳ ሴርያዋንቶ ግትያ ዎያዋንታነ ዎርዱዋን ጽሎ ብታንያ ፕርዳ ተእያዋንታ።

22ሄዋ ድራዉ፥ አብራሃማ ዎዜዳ መና ጎዳይ ያቆባ ዛርያዉ ሀዋዳን ያጌ፤ “ያቆባ ዛሪ ሀዋፐ ስንናዉ ዬላተና፤ ኡንቱንቱ ሶምኢካ ዬላቲደ፥ ሳኣ ጼለና።

23ሽን ኡንቱንቱ ታ ኩሽያ ኦሶ ግድያ ባረንቱ ናናቱዋ ባረንቱ ግዶን በእያ ዎደ፥ ታ ሱን ጌሻተን ናጋና፤ ኡንቱንቱ ያቆባ ጌሻ ጌሻተ ባይዝክኖ። እስራኤልያ ጾሳካ ያሻተን ቦንቻና።

24አያናን ባሌዳዋንቱ ስሚደ አኬካና፤ ዙዙምያዋንቱካ ትምርትያ አካና” ያጌ።

← Chapter 28 Jump to: Chapter 30 →