Isaiah 30

Amharic Dawro DFBE (ጌሻ ማጻፋ) No Year

← Chapter 29 Jump to: Chapter 31 →

1መና ጎዳይ ሀዋዳን ያጌ፤ “ማካላንቻ ናናቶ አየ አና! ታን ሀልቻቤናባ ኦያዋንቶ፥ ታ አያናፐ ግደና ኤጻ ባረዉ ጊግስያዋንቶ፥ ናጋራ ናጋራ ቦላ ጉጅያዋንቶ አየ አና።

2ግብጼ ካትያ ጌሱዋን አታናዉነ ግብጼ ኩዋን አትያሳ ኮያናዉ፥ ታና ዞረታ በሰናን፥ ዱገ ግብጼ ዎያዋንቶ አየ አና!

3ሄዋ ድራዉ፥ ግብጼ ካትያ ጌሱ ህንተንቶ ዬላ፥ ካቲካ ካዉሻ ግዳናዋ።

4ኡንቱንቱ ካፓቱ ጾኣነን ደኦፐካ፥ ኡንቱንቱ ኪቴዳዋንቱ ሀኔሳ ግያ ካታማ ጋክንቶካ፥

5ዬላፐነ ካዉሻፐ አትና፥ ሀራባ አያነ ዎና አሳ፥ አያነ ማደና ዎይ ጎኤና አሳን አማነቴዳ አሳይ ኡባይ ካዉሻና” ያጌ።

6ኔጌባን ደእያ ዶአቱዋባ ጾሳይ ግያዌ ሀዋ፤ ኪተትያዋንቱ መቱነ ቱጋይ ደእያ ቢታ ግዱዋና፥ ጋሙነ ጋማታ ዎያ ሾሻቱነ ፓልያ ዳዌቱ ኮልጽያ ኢታ ቢታና አደ ባና። ባረ ዱረተ ሀረቱዋ ዞክያን፥ ባረንቱ አቁዋ ጋሎቱዋ ዝመን ጫን አኪደ፥ ኡንቱንቶ አያነ ዎሰና ቢታ ባና።

7አያዉ ጎፐ፥ ግብጼ ማዱ ጋቲ ባይናባነ መላ። ሄዋ ድራዉ፥ ታን አ፥ “ጮኡ ጊደ ኡቴዳ ራኣባ” ያጋደ ሱንድ።

8ሀእ ባ፤ ስንና ያና ዎድያዉ መና ማላታ ግዳና ማላ፥ ኡንቱንቱ ስንን ሹቻ ማሰን ዎጫ፤ ማዝጎባንካ ጻፋ።

9አያዉ ጎፐ፥ ሀዋንቱ ማካላንቻ አሳቱዋነ ዎርዱዋ ናናቱዋ፤ ኡንቱንቱ መና ጎዳይ ኦድያዋ ስሳናዉ ኮየና ናናቱዋ።

10ኡንቱንቱ ሳፃ ኦድያዋንታ፥ “ሳጻ በኦፕተ” ያጊኖ፤ ትምቢትያ ኦድያዋንታካ፥ “ናሸችያባፐነ ማላትያባፐ አትና፥ ኑዉ ሱረባ ኦዶፕተ።

11ኦግያፐ ክችተ፤ ሎሱዋፐካ እት ባጋ ስምተ፤ ኑን እስራኤልያ ጌሻባ ዛረደ ስሶኮ” ያጊኖ።

12ያትና፥ እስራኤልያ ጌሻይ ሀዋዳን ያጌ፤ “ህንተ ሀ ቃላ እጺደ፥ አሳ ናቂያዋን አማነቴዳ ድራዉነ ጭምያዋን ጬቀቴዳ ድራዉ፥

13ሀ ናጋራይ ህንተንቶ ዛኢደ ዎያ፥ አኬከናን ኤለካ ኩንድያ አዱሳ ግምቢያ ማላ ግዳናዋ።

14አ መኡ ኡርቃፐ መዳነ ንፕ ጊደ መኤዳ ኦቱዋ ማላ ግዳናዋ፤ ሄ መኡዋ ግዶን ታማ ካሽያ ዎይ ኦላፐ ሃ ዱቂደ ከስያ ኮንአይነ ቤተና” ያጌ።

15ኡባ ሞድያ መና ጎዳይ፥ እስራኤልያ ጌሻይ ሀዋዳን ያጌ፤ “ህንተ ታኮ ስምያዋንነ ሸምፕያዋን አታና፤ ጮኡ ግያዌነ አማነትያዌ ህንተንቶ ዎልቃ ግዳናዋ፤ ሽን ህንተ እጼድታ።

16ሀዋዳን ያጌድታ፤ ‘ቱይት፥ ኑን ፓራቱዋን ኡቲደ ባቃታና’ ያጌድታ፤ ሄዋ ድራዉ፥ ህንተ ባቃታና። ቃይካ ህንተ፥ ‘ኤሌል ፓራቱዋ ቶጊደ ብ ክቻና’ ያጌድታ፤ ሄዋ ድራዉ፥ ህንተና የደርስያዋንቱ ኤሌላና።

17እት ቶራንቻ በኢደ፥ ህንተፐ ሻአ አሳይ ባቃታና፤ እቼሹ ቶራንቻቱ ህንተና ሙልያ የደርሳና። ደርያ ሁጲያን ኤሴዳ ባንድራ ምዳን፥ ህንተ ቶራንቻቱዋፐ ጉቱ አታና” ያጌ።

18ሽን መና ጎዳይ ህንተንቶ ኬካናዉ ናጌ፤ እ ህንተንቶ ቃረትያዋ በሳናዉ ደንዴ። አያዉ ጎፐ፥ መና ጎዳይ ጽሎ ፕርድያ ጾሳ፤ አ ናግያዋንቱ ኡባቱ አንጀቴዳዋንታ።

19ህንተኖ፥ የሩሳላመን ደእያ ጽዮነ አሳቶ፥ ሀዋፐ ስንናዉ ዬክክታ፤ ህንተ ዋሱዋን እ ህንተንቶ ቱሙዋፐ ቃረታና፤ እ ህንተ ዋሱዋ ስስያ ዎደ፥ ህንተንቶ ዛሩዋ እማና።

20ጎዳይ ህንተንቶ መቱዋ ኡክነ ቱጋ ሃ እሞፐካ፥ ህንተ አስታማሪ ሀዋፐ ስንን ባረና ቆሰና። ሽን ህንተ አይፊ ህንተ አስታማርያ በአና።

21ህንተ ኡሸቻ ዎይ ሀድርሳ ስምያ ዎደ፥ ጉየና ህንተና፥ “ኦጊ ሀዋ፤ አን ቢተ” ያግያ ኮሻ ህንተ ስሳና።

22ሄዋፐ ጉይያን፥ ብራን አሌቀቴዳ ኤቃቱዋነ ዎርቃን ካመቴዳ ምስለቱዋ ህንተ ቱንሳና። ቅታ ጩርቃዳን ህንተ ኡንቱንታ፥ “ኑፐ ሃክተ” ያጊደ ዎራ ኦላና።

23ሄ ዎደ ህንተ ጋድያን ዘሬዳ ካዉ እ እራ ቡክሳና፤ ጋድያፐ ሞክያ ካይካ ሙሩታነ ዳሮ ግዳናዋ። ሄ ጋላስ ህንተ ሚዛይ አኮ ደምባን ሀመታና።

24ጋድያ ጎሽያ ቦራቱነ ሀረቱ ላይዳንነ ግላን ፑነቲደ፥ ጌዬዳ ሀርቁዋ ማና።

25ህንተ ሞርከቱዋ ጌሶቱ ኦሞደትና፥ አሳይ ጎራኤቲደ ዉርያ ጋላስ፥ ዎልቃማ ደረቱዋፐነ ቃ ደረቱዋፐ ፑልቶ ሃቱ ጎጋና።

26ሄ ጋላስ አግናት ፖኡ አዋ ፖኡዋዳን ሀናና፤ አዋ ፖኡካ ካሰዋፐ ላፑን ኩሽያ ዳራና፤ ላፑን ጋላሳ ፖኡዋ ኬና ፖአና። ሄ ጋላስ መና ጎዳይ መኤዳ ባረ አሳ ኮላና፤ እ ደችና ማዱጼዳ ማዱካ ፓና።

27በእተ፥ መና ጎዳ ሱንይ ሱልያ ሀንቁዋና፥ ስኬዳ ጩዋ ሻርያና ሃኮ ሳፐ ያና፤ አ ዶናይ ሀንቁ ኩሜዳዋ፤ አ እንጻርሳይካ ምያ ታማ።

28ባረ ፔኑዋን ኡባባ ፕት አፍያ ድኡዋዳን፥ ይስያ ሃ ኩንዋ ማላ። እ ካዉተቱዋ ባሻ ዛዝርያን ዛዝራና፤ አሳ ጋፓታካ ዎራ አፍያ ብጻላ ባርሳና።

29ጌሻ ባላይ ቦንቼትያ ቃማ የጽያዋዳን፥ ህንተ የጻና፤ መና ጎዳ ደርያ እስራኤልያ ዛላኮ ብያ ዎደ፥ ሱሱልያ ፑኒደ የጽያ አሳይ ናሸትያዋዳን፥ ህንተ ናሸታና።

30ቃይ መና ጎዳይ ባረ ያሽያ ኮሻ ስሳና፤ አ ቀሲ ዎደ ሾጭያ ሾቻ ባረ ሱልያ ሀንቁዋን፥ ምያ ታማ ላጩዋን፥ ጎትያን፥ ኡሹዋንነ ሻቻ ቡርጭያን ቆንጭሳና።

31መና ጎዳይ ባረ ኮሻን አሶረ ዳጋንና። አ ጻምአይካ ኡንቱንታ ሾጫና።

32መና ጎዳይ ኡንቱንታ ባረ ሙርያ ጻምአን ሾጫና ሾቻይ ኡባይ ዳርቢያንነ ዲን ግዳናዋ። ኦላን እ ባረ ቄስያ ደንደ፥ ኡንቱንታ ኦላና።

33አያዉ ጎፐ፥ ታማ ኤያሳኣ ቶፌት በን ጊጌዳ፤ ሄ ሳአይ ጊጌዳዌ ካትያሳ። ሄ ሳአይ ዝቃነ አኮ ግዲደ፥ ታማይነ ዳሮ ምይ ዶረት ኡቴዳ ሳ። መና ጎዳ ሸምፑ ዲንያ ሻፋዳን ዪደ፥ ሄ ታማ ኤ ከሳና።

← Chapter 29 Jump to: Chapter 31 →