Isaiah 24

Amharic Dawro DFBE (ጌሻ ማጻፋ) No Year

← Chapter 23 Jump to: Chapter 25 →

1በእተ፥ መና ጎዳይ ጋድያ ኮሊደ መላ ከሳና፤ እ ጋድያ ባይዚደ፥ አን ደእያ አሳካ ላላና።

2ሀራ አሳ ቦላን ሀንያዋዳን ቄሳቱ ዋ ቦላንካ፥ ቆማ ቦላን ሀንያዋዳን ጎዳ ቦላንካ፥ ቆማት ቦላን ሀንያዋዳን ጎዳት ቦላንካ፥ ሻምያዋ ቦላን ሀንያዋዳን ዛልእያዋ ቦላንካ፥ ታልእያ እምያዋ ቦላን ሀንያዋዳን ታልእያ አክያዋ ቦላንካ፥ አጩዋ አችያዋ ቦላን ሀንያዋዳን፥ አጩዋ አሸትያዋ ቦላንካ ሀናና።

3ቢታይ ኡባና መላ ከሳና፤ ቃይ ኡባናካ ቦንቀታናዋ። አያዉ ጎፐ፥ ሀ ቃላ መና ጎዳይ ሃሳዬዳ።

4ቢታይ ሎይ መልና፥ አ አጫይ ኡባይ ሹሌ፤ ጋድያን ደእያ ዎልቃማ አሳይካ ዳቡሬ።

5ቢታይ ባረናን ደእያ አሳፐ ደንዴዳዋን ቱኔዳ። አያዉ ጎፐ፥ ኡንቱንቱ ህግያ ኮሌድኖ፤ ዎጋ መንድኖ፤ መና ጫቁዋካ ኮሌድኖ።

6ሄዋ ድራዉ፥ ጾሳ ሸቃይ ጋድያ ሜ፤ ቃይ አን ደእያ አሳቱካ ባረንቱ ባይዙዋ ጋሱዋን ሙረቴድኖ። ሄዋ ድራዉ፥ ሳኣን ደእያ አሳቱ ጹገቴድኖ፤ ያትና ፓይዱዋን ጉ አሳይ አቴዳ።

7ዎይንያ ቱራ አኑ መልና፥ ዎይንያ ኤሳይካ ዉሬዳ፤ ካሰ ናሸትያ ኡባይ ካዮቴዳ።

8ካራቡዋ ባቃ ናሸቻይ ጮኡ ጌዳ። ናሸትያዋንቱ ሆምቦጨይካ ኤቄዳ። ሎእያ ዲ ናሸቻይካ ጮኡ ጌዳ።

9ሀዋፐ ስንናዉ የ የጺድ፥ ኡንቱንቱ ዎይንያ ኤሳ ኡሽክኖ፤ ማይያ ኡሻይ ኡሽያዋንቶ ጫሞ ግዳናዋ።

10ማራ ማጫራ ዬዳ ካታማይ ላለቴዳ፤ ኦንነ ገለናዳን፥ ጎልያ ኡባይ ጎርደቴዳ።

11ዎይንያ ኤሳይ ዬዳዎ አሳይ ዳባባን ዋሴ፤ ናሸቻ ኡባይ ካዮ ላመቴዳ፤ ሳኣ ናሸቻይ ኡባይ ክቼዳ።

12ካታማይ ኮለቴዳ፤ ካታማ ፐንገቱካ መኤረቴድኖ።

13ዎጋራ ቴራ ቃደ ቆቆፍያዋዳን፥ ዎይ ዎይንያ ቴራ ማጽ ስሚደ፥ ቃርምያ ማጽያዋዳን፥ ጋድያ ቦላን ደእያ ካዉተቱዋ ግዶን ሄዋዳን ሀናና።

14ኡንቱንቱ ባረንቱ ቃላ ቁ ኦደ፥ ናሸቻን የጺኖ፤ አዋይ ዉልያ ባጋና ደእያ ኡባይ መና ጎዳ ግታተ ኦዳና።

15ሄዋ ድራዉ፥ አዋይ ዶልያ ባጋና ደእያዋንቶ፥ መና ጎዳዉ ቦንቹዋ እምተ፤ አባ ዶናን ደእያ ቢታቱዋን ደእያዋንቶ፥ እስራኤልያ መና ጎዳ፥ ጾሳ ሱንዉ ቦንቹዋ እምተ።

16ቢታ ጋጻፐ፥ “ጽሎ ቦንቹ ግዶ” ያግያ የ ኑን ስሴቶ። ሽን ታን፥ “ታን ግልቃይ! ታን ግልቃይ! ታዉ አየ አና! አያዉ ጎፐ፥ ካድያዋንቱ ካዲኖ፤ ካድያዋንቱ ሎይ አ እሚኖ” ያጋይ።

17ህንተኖ፥ ሳኣ ቦላን ደእያ አሳቶ፥ ዳጋማይ፥ አፉነ ጲሪ ህንተና ናጌ።

18ሳሉዋ ማስኮተቱ ዶየቴዳ ድራዉነ፥ ጋድያ ባሶቱካ ቃጽያ ድራዉ፥ ዳጋንያ ኮሻፐ ባቃትያዌ ኦላን ኩንዳና፤ ቃይ ኦላፐ ፑደ ከስያዌ ጲርያን ኦይቀታና።

19ቢታይ ዛኢደ ጳልቀቴዳ፤ ንፕ ጊደ መኤረቴዳ፤ ዎልቃፐ ቃጼዳ።

20ቢታይ ማቲደ አሳዳን ጋንድጋሬ፤ ጫርኩ ሱግያ ዳስያዳን፥ ዮንቁ ጌ። ማካላንቻቱ ባይዙ አ ሎይ ዴጼዳ ድራዉ፥ ላኤን ደንደናዳን ኩንዴ።

21ሄ ጋላስ መና ጎዳይ ሳሉዋ ዎልቃቱዋ ሳሉዋን፥ ቃይ ሳኣ ካተቱዋካ ሳኣን ሙራና።

22ኡንቱንቱ ኦላን ደእያ ቃሾ አሳቱዋዳን፥ እትፐ ሺቃና፤ ቃሾ ጎልያን ጎርደቲደ ኡታና። ቃይ ዳሮ ጋላሳፐ ጉይያን፥ ኡንቱንቱ ሙረታና።

23ሄዋፐ ጉይያን፥ አግናይካ አዋይካ ዬላታና። አያዉ ጎፐ፥ ኡባፐ ዎልቃማ መና ጎዳይ ጽዮነ ደርያንነ የሩሳላመን ካተታና፤ ቃይ እ የሩሳላመ ጭማቱዋ ስንን ባረ ቦንቹዋ ቆንጭሳና።

← Chapter 23 Jump to: Chapter 25 →