Isaiah 14

Amharic Dawro DFBE (ጌሻ ማጻፋ) No Year

← Chapter 13 Jump to: Chapter 15 →

1መና ጎዳይ እስራኤልያ አሳዉ ቃረታና፤ እስራኤልያካ ዛረደ ዶራና። ኡንቱንታ ኡንቱንቱ ቡዞ ጋድያን ዎና፤ እማቱ ዪደ ኡንቱንቱና ጋከቲደ፥ እስራኤልያ አሳና እትፐ ደአና።

2ዳሮ ካዉተይ እስራኤልያ አሳ አኪደ፥ ኡንቱንቱ ሳኣ አሀና፤ እስራኤልያ አሳይ ካዉተቱዋ ማጫነ አቱማ ቆማዳን፥ መና ጎዳ ጋድያን ሞዳና። ኡንቱንቱ ባረና ኦሞዴዳዋንታ ኦሞዳና፤ ባረና ኡቁኔዳዋንታካ ሞዳና።

3መና ጎዳይ ህንተና ህንተ ቱጋፐ፥ መቱዋፐነ ህንተ ሞደቴዳ ኢታ አይለተፐ ሸምፕሴዳ ጋላስ፥

4ህንተ ባብሎነ ካትያ ቦላ ሀዋዳን ያጊደ ቅሊጫና፤ “ኡቁንያዌ ዋን አጌዴ፤ አ ሀንቁዋ ሱሉካ ዋን አቴዴ!

5መና ጎዳይ ካዉተቱዋ ጻምኣነ ሞድያዋንቱ ጋትማ መንዳ።

6ኡንቱንቱ አሳ ዉርሰ ባይና ሀንቁዋን ሾጬድኖ። ባረንታ ጾኔዳ አሳቱዋ ቃንጸናን ኡንኤደ ደኤድኖ።

7ቢታ ኡባይ ኡንቱንቱፐ ሸምፒደ፥ ዎፓን ደኤ፤ አሳይካ የ የጼ።

8ሀራይ አትና፥ ዝጋቱካ ሊባኖሳ ጽደቱካ፥ ካትያ ኩንደን ናሸቲደ፤ ‘ኔን ካዉሻደ ዎደፐ፥ ኑና ቃንጻናዉ ይያዌ ባዋ’ ያጊኖ።

9“ኔን ይያ ዎደ፥ ስኦሊ ኔና ሞካናዉ ህርክን ጊጌዳ፤ እ ካሰ ጋድያ ካለዳ አሳቱዋ ሞይትለቱዋ ኔና ሳሮታናዳን ደን፤ ቃይ ካሰ ካዉተቶ ካትያ ግዴዳ ኡባቱዋካ ኡንቱንቱ አራታፐ ደን ኤሴ።

10ኡንቱንቱ ኡባይካ ሀዋዳን ያጋና፤ ‘ሄኮ ኔንካ ኑዋዳን፥ ዎልቃ ያዳ፤ ኔንካ ኑ ማላ ግዳዳ!

11ካሰ ዲ ዲጺደ ሳቢያ ነ ቦንቹ ስኦልያን ዱገ ገሌዳ። ዱቻቱ ኔን ግስያ ግሱዋ፤ ጉጹነቱካ ኔን ማይያ አፍላ ግዳና’ ያጋና።

12“ኔኖ ዎንታ ናአዉ፥ ባካልያዉ፥ ሳሉዋፐ ዋና ኩንዳዲ! ኔኖ ካዉተ ካዉሼዳዎ፥ ዋና ቃንጸታደ ሳኣን ዎአዲ!

13ኔን ነ ዎዛናን፥ ‘ታን ሳሉዋ ከሳና፤ ታ ካዉተ አራታካ ጾሳ ጾልንተቱዋፐ ቦላና ቃን ዎና፤ ሁጲሳ ባጋ ጋጻን፥ ያአይ ሺቅያ ደርያ ሁጲያን ኡታና።

14ሻረቱ ደእያ ቃፐካ ሁጲያዉ ፑደ አና፤ ታን ታና ኡባፐ ቂያ ጾሳ ማላ ኦና’ ያጋዳ።

15ሽን ኔን ስኦልያን፥ ህርክ ጪማ ኦላን ዱገ የገታዳ።

16“ኔና በእያዋንቱ፥ ‘ቢታ ቃዳዌ፥ ካዉተቱዋ ኮኮርሴዳዌ፥

17ሳኣ ባዙዋ ከሴዳዌ፥ ሳኣን ደእያ ካታማቱዋካ አ የጌዳዌ፥ ባረ ቃሾ አሳቱዋካ ጎለ የደናን ድጌዳ ብታኒ ሀዌ?’ ያጊደ ትሽ ኦ አኬኪደ ጼላና።

18“ካዉተቱዋ ካተቱ ኡባይ ባረ ዱፉዋን ዱፉዋን ቦንቹዋን ግሳና።

19ሽን ኔን እጸቴዳ ታሽያዳን፥ ነ ዱፉዋፐ ጋጻ ኦለታዳ፤ ነ አሃይ ማሻን ጫደት ሀይቄዳ አሃን፥ ቃይ ኦላን ደእያ ሹቻቱዋኮ ዱገ ዎያዋንቱ አሃን ካመቴዳ። ኔን ገድያን የደርሴዳ አሃ ማላ ግዳዳ።

20ኔን ሞጉዋካ ኡንቱንቱና እትፐ ሞገታካ፤ አያዉ ጎፐ፥ ኔን ነ ጋድያ ባይዛዳ፤ ነ አሳካ ዎዳ። ኢታ ኦያዋንቱ ሱንይ ላኤን ሙለካ ጼሰቶፖ።

21ኡንቱንቱ አዎቱዋ ናጋራ ድራዉ፥ ናናቱዋ ዎናዉ ጊግስተ፤ ሄዌ ዮፐ ኡንቱንቱ ደንዲደ፥ ጋድያ ላታና፤ ሳኣ ኡባካ ካታማ ሳላላ ኦና” ያጋና።

22ኡባፐ ዎልቃማ መና ጎዳይ ሀዋዳን ያጌ፤ “ታን ኡንቱንቱ ቦላን ደንዳና፤ ኡንቱንቱ ሱን፥ ኡንቱንቱ አቶተ፥ ኡንቱንቱ ዘረነ ኡንቱንቱ የለታ ባብሎነፐ ይሳና።

23ታን ባብሎነ ጉታታ ደኢያሳነ ሃይ ኤልያሳ ኦና፤ ባሻ ፑጻን ታን አ ፕታና። ታን ኡባፐ ዎልቃማ መና ጎዳይ ሀዋ ኦዳይ” ያጌ።

24ኡባፐ ዎልቃማ መና ጎዳይ ሀዋዳን ያጊደ ጫቄዳ፤ “ታን ሀልቼዳዋዳን ሀናና፤ ታን ቆፔዳዋዳንካ ፖለታና።

25ታን አሶረ ጋድያ ብታንያ ታ ጋድያን መንሬና፤ ታ ደረቱዋ ሁጲያን ታን አ የና፤ አ ሞርገ ምይ ኡንቱንቱ ቦላፐ፥ አ ቶኩካ ኡንቱንቱ ሀሽያፐ ክቻና” ያጌዳ።

26ሳአዉ ሙልያዉ ቆፈቴዳ ቆፋይ ሀዋ፤ ካዉተቱዋ ኡባ ቦላን ምጨቴዳ ኩሺካ ሀዋ።

27ኡባፐ ዎልቃማ መና ጎዳይ ሀዋ ቆፔዳ ድራዉ፥ አ ኦን ድጋናዉ ዳንዳዪ? አ ኩሺካ ምጨቴዳ፤ ሄዋ ኦን ጉየ ዛራናዉ ዳንዳዪ?

28ካቲ አካዝ ሀይቄዳ ላይ ኦደቴዳ ቃላይ ሀዋዳን ያግያዋ፤

29“ህንተኖ ፕልስጼማ አሳቶ ኡባቱካ፥ ህንተና ሾጬዳ ጻምአይ መኤዳ ድራዉ ናሸቶፕተ፤ አያዉ ጎፐ፥ ሄ ሾሻ ዛርያፐ ሀሱ ከሳና፤ አ ዘረይካ ቃይ ፓልያ ሾሻ ግዳናዋ።

30ህዬሳቱዋ ባይራ ናናይ ቁማ ማና፤ መቶታንቻቱ ዎፑ ጊደ ግሳና። ሽን ታን ነ ዛርያ ኮሻን ዉርሳና፤ ቃይ ኔፐ አቴዳዋንታካ ዎና።

31“ኔኖ ፐንግያዉ፥ ዬካ! ኔኖ ካታማዉ፥ ዋሳ! ህንተኖ ፕልስጼማ አሳዉ ኡባዉ፥ ህንተ ኡባይካ ህርጋን ሙሽተ! አያዉ ጎፐ፥ ሁጲሳ ባጋፐ ጩዋይ ከሲደ ዬ፤ ሄ ጭታፐ ዱጺደ ጉየ አትያዌ ባዋ።

32ካዉተይ ኪቴዳዋንቶ ዋጊደ ዛራኔ? መና ጎዳይ ‘ጽዮኖ ኬጼ፤ ቆሄቴዳ አ አሳይ እ ግዶን ቆሰት አትያሳ ደሜዳ’ ያጋና” ያግያ ቃላይ ኦደቴዳ።

← Chapter 13 Jump to: Chapter 15 →