Hosea 13

Chuvash (CHB) (БИБЛИ) 2009

← Chapter 12 Jump to: Chapter 14 →

1Ефрем каланӑ чухне пурте чӗтресе тӑратчӗҫ. Израильре вӑл мухтавлӑччӗ; анчах Ваала пула айӑпа кӗчӗ те тӗп пулчӗ.

2Халӗ вӗсем хӑйсен ҫылӑхӗ ҫумне татах ҫылӑх хушрӗҫ: хӑйсем ӑнланнӑ пек, кӗмӗлӗнчен хӑйсем валли йӗрӗх шӑратса турӗҫ, — ку пӗтӗмпех алӑстисен ӗҫӗ, — ӗнтӗ парне кӳрекен ҫынсене калаҫҫӗ: «пӑрусене чуптӑвӑр!» теҫҫӗ.

3Ҫавӑншӑн вӗсем ирхи тӗтре пек, хӑвӑрт типекен сывлӑм пек, йӗтем ҫинчен вӗҫекен хывӑх пек, мӑрьерен тухакан тӗтӗм пек пулӗҫ.

4Анчах Эпӗ — Египетран пуҫласах санӑн Ҫӳлхуҫа Турру; санӑн, Мансӑр пуҫне, урӑх турра пӗлмелле мар; Мансӑр пуҫне урӑх ҫӑлакан ҫук.

5Эпӗ сана пушхирте, шывсӑр антӑхакан ҫӗр ҫинче, пӑхрӑм-упрарӑм.

6Кӗтӳлӗхсем пуррипе вӗсем тутӑ пурӑнчӗҫ; тӑранса ҫитмессерен вара вӗсем мӑнкӑмӑлланса каятчӗҫ, ҫавӑнпа Мана манса каятчӗҫ.

7Ӗнтӗ Эпӗ вӗсемшӗн арӑслан пек пулӑп, ҫул хӗрринче ҫамрӑк арӑслан пек сыхласа тӑрӑп.

8Вӗсем ҫине ҫурисене ҫухатнӑ упа ами пек тапӑнӑп, вӗсен кӑкӑрне турта-турта ҫурӑп, арӑслан ами пек, вӗсене ҫавӑнтах ҫисе ярӑп; вӗсене хирти тискер кайӑксем туласа тӑкӗҫ.

9Израиль, эсӗ хӑвна тӗп турӑн, санӑн тӗрекӳ Эпӗ анчах!

10Ӑҫта халӗ санӑн патшу? Ҫӑлса хӑвартӑр вӑл сана мӗнпур хулунта! Тӳрӳсем ӑҫта санӑн? Вӗсене эсӗ: «пире патшапа пуҫлӑхсем парсамччӗ» тееттӗн.

11Вара, ҫилленсе ҫитсе, Эпӗ сана патша патӑм, тарӑхса кайса, ӑна каялла туртса илтӗм.

12Ефремӗн йӗркесӗр ӗҫӗсем пӗр ҫыхха ҫыхӑннӑ, унӑн ҫылӑхӗ сыхланса юлнӑ.

13Ача ҫуратаканӑн асапӗ ҫитӗ ӑна: вӑл — айван ывӑл, унсӑрӑн ҫапла, нумай вӑхӑт хушши, вартан тухакан ача пек тӑхтаса тӑмӗччӗ.

14Тамӑк аллинчен хӑтарӑп Эпӗ вӗсене, вилӗмрен ҫӑлӑп вӗсене. Эй вилӗм! ӑҫта санӑн сӑнну? Эй тамӑк! ӑҫта санӑн ҫӗнтерӗвӳ? Эпӗ ҫакӑншӑн ӳкӗнмӗп.

15Ефрем хӑйӗн тӑванӗсем хушшинче ӗрчевлӗ пулин те, тухӑҫ ҫилӗ килсен, пушхиртен Ҫӳлхуҫа ҫилӗ ҫӗкленсен унӑн ҫӑлӗ типсе ларӗ, ҫӑлкуҫӗ иксӗлсе юлӗ; ҫав ҫил мӗнпур хаклӑ савӑт управӑшне пушатса хӑварӗ.

← Chapter 12 Jump to: Chapter 14 →