Proverbs 15

Dagbani Bible (Naawuni Kundi Kasi)

← Chapter 14 Jump to: Chapter 16 →

1Zilim’ balli maari suhuyiɣisili, amaa yɛtɔɣ’ yoli yiɣisirila nir’ suhu.

2Yɛndan’ tɔɣisirila baŋsim yɛtɔɣa, amaa jɛrilim n-yiri jɛra noya ni na.

3Yawɛ nina kul bela luɣilikam, ka o yuuni ninvuɣ’ biɛri mini ninvuɣ’ suma.

4Zilim’ balli nyɛla nyɛvili tia, amaa yɔhiŋ yɛtɔɣa nyɛla din chɛ ka nir’ suhu saɣinda.

5Jɛrigu n-zaɣisir’ o ba ni wuh’ o shɛli, amaa ŋunkam deeri saɣisigu nyɛla ŋun mali yɛm.

6Buni palila wuntizɔriba yinsi, amaa ashaara kul lurila ninvuɣ’ biɛri nyamma zuɣu.

7Yɛndana tɔɣisirila baŋsim yɛtɔɣa, jɛra bɛn’ tɛha puuni pa lala n-nyɛ li.

8Ninvuɣ’ biɛri sara maligu nyɛla din chihiri Yawɛ sani, amaa ninvuɣ’ shɛb’ bɛn tumdi din tuhi suhigu nyɛla din tiɣir’ o nini.

9Ninvuɣ’ biɛri soli nyɛla din chihiri Yawɛ sani, amaa o yuri ninvuɣ’ so ŋun doli wuntitali soli.

10Ŋun chɛ soli bahi ni ti nya tibidarigibo pam, ka ŋunkam mi je ni bɛ kpah’ o zuɣu ni ni kpi.

11Kpiimba biɛhigu shee mini chiyaama buɣim kul dola palɔni Yawɛ sani, ka wula ka ninsalinim’ suhuri ni yɛla ku do palo ni o sani.

12Ansarisimaaniba je ni so kpahi bɛ zuɣuri ni; bɛ ku chaŋ yɛnnim’ sani.

13Suhupiɛlli nyɛla din chɛ ka nir’ lara, amaa suhugarigu nyɛla din chɛ ka nandahima mali nira.

14Ninvuɣ’ so ŋun mali tɛhi’ zilima suhu yɛla baŋsim zuɣu, amaa jɛrilim m-be jɛra noya ni.

15Nandaamba bɛn’ dabisa zaa nyɛla wahala dabisa, amaa bɛn suhuri piɛla kul puhirila chuɣu sahakam.

16Nir’ yi mali biɛla ka zɔri Yawɛ, di so ni nir’ mali buni pam ka di mal’ o muɣisigu.

17Niriba yi diri ʒiɛvari kɔŋko ka mali yurilim ni taba, di so ni niriba ŋubiri naɣ’ kpaba ka je taba.

18Suhuyiɣisilinim’ tahirila zabili na, amaa bɛn suhuri bi yiɣisiri yomyom goorila zabili.

19Vinnyaɣilana soli zuɣu kul zibigila gɔhi, amaa ŋun tumdi din tuhi soli nyɛla solɔɣu.

20Bi’ so ŋun mali yɛm tir’ o ba suhupiɛlli, amaa jɛra ʒiɛmdila bɛ manima.

21Jɛrilim tuma tirila ŋun ka yɛm suhupiɛlli, amaa ŋun mali tɛhi’ zilima ŋun’ tumdila din tuhi.

22Saawara niŋbu yi kani, nia lɔbu bi paana, amaa saawaranim’ pam yi beni, bɛ dirila nasara.

23Nir’ yi garigi bɔhigu viɛnyɛla di nyɛla suhupiɛlli nir’ kam sani. Ka nir’ yi tɔɣisi yɛtɔɣa di tɔɣisibu saha, di viɛla.

24Yɛnnim’ bɛn’ sani, nyɛvili soli durila zuɣusaa din ni chɛ ka bɛ ku siɣi tiŋgban’ ni kpiimba biɛhigu shee.

25Yawɛ wurindi karimbaandan’ yili, amaa ka guli pakoli tiŋgbani tarisi.

26Nia biɛri nyɛla din chihiri Yawɛ sani, amaa wuntizɔriba yɛtɔɣa nyɛla din viɛla.

27Bɛn diri zalinsi nyɛla bɛn bɔri yɛla tiri bɛ yiŋnima, amaa bɛn je birapu dibu ni be.

28Wuntizɔra tɛhirila o ni yɛn garigi shɛm, amaa ninvuɣ’ biɛɣu ŋun’ noli ni zaɣ’ biɛɣu n-yirina.

29Yawɛ be katiŋ’ ka chɛ ninvuɣ’ biɛri, amaa o deeri wuntizɔriba suhigu.

30Nina neesim chɛ ka nir’ suhu piɛla, ka lahibali viɛlli tiri niŋgbuŋ alaafee.

31Nir’ yi gbilisi tibili wum saɣisigu viɛnyɛliŋga, bɛ ni kal’ o pahi yɛnnim’ ni.

32Bɛnkam zaŋ bɛ ni wuhi ba shɛli niŋ bɛ baɣaka ʒiɛmdila bɛmaŋa, amaa bɛn wum saɣisigu ni nya tɛhi’ zilima.

33Yawɛ zɔbu nyɛla yɛm wuhibu ni be shɛli ni, ka maŋsiɣisibu be tooni ka jilima doli.

← Chapter 14 Jump to: Chapter 16 →