Proverbs 4

Dagbani Bible (Naawuni Kundi Kasi)

← Chapter 3 Jump to: Chapter 5 →

1Bihi, wummiya yi ba wuhibu, wummiya li viɛnyɛliŋga din ni chɛ ka yi nya tɛhi’ zilima.

2Dama wuhibu din viɛla ka n zaŋ tiri ya maa, miriya ka yi zaɣisi n wuhibu.

3N ni daa nyɛ bidibbila ka na pɔra m-be m ba sani, ka nyɛ m ma ni daa yuri so pam,

4m ba daa wuhiri ma, ka yɛri ma, “Chɛ ka n yɛligu kpe a suhu ni viɛnyɛliŋga; gbibi n ni wuh’ a shɛli ka be.

5Bom’ yɛm, bom’ tɛhi’ zilima. Mira ka a tam bee n-zaŋ a ni wum yɛtɔɣ’ shɛŋa n noli ni bahi.

6Di zaŋ yɛm bahi, yɛm ni gbib’ a. Yum’ yɛm, ka yɛm gul’ a.

7Yɛm piligu ni nyɛ shɛm m-bɔŋɔ: Bom’ yɛm, ka a ni yɛn bo shɛli pahi nyɛla tɛhi’ zilima.

8Tibigim’ yɛm, ka o duh’ a. A yi vili yɛm gbibi, o ni ti a jilima.

9Yɛm ni zaŋ jilima zuɣupiligu pil’ a, ka zaŋ nam zuɣupil’ viɛlli ti a.”

10M bia wumma, deemi n yɛligu ka nya nyɛvili wɔɣinli.

11N wuh’ a yɛm, ka wuh’ a so’ shɛŋa din tuhi.

12A yi chana, binshɛli ku gabi a naba, ka a yi guui, a ku tuui.

13Gbibi bɛ ni wuh’ a shɛli viɛnyɛliŋga, ka miri ka a chɛ ka di faai. Guli yɛm, dama ŋuna n-nyɛ a nyɛvili.

14Miri ka a doli ninvuɣ’ biɛri soli. Miri ka a doli tuumbiɛtumdiba soli.

15Lɔɣimi li, di doli li, ŋmaligim’ chaŋ ka chɛ li.

16Dama bɛ ku tooi gbihi ka pa ni bɛ tumla din bi tuhi; bɛ yi bi chɛ ka so tuui, di niŋdi ba la gɔgaliga.

17Dama bɛ dirila ninvuɣ’ biɛtali bindirigu, ka nyuri duŋtaabo wain.

18Amaa wuntizɔriba bɛn’ soli ŋmanila biɛkaali neesim, di kul neerimi pahiri hal ti be kaman wuntaŋ’ yi ti zani zuɣu ni la.

19Ninvuɣ’ biɛri soli ŋmanila bumbɔni. Bɛ bi mi bɛ ni tuuri binshɛŋa.

20M bia, chɛ ka a baɣa be n yɛligu ni. Gbilisim tibili wum n ni yɛr’ a shɛm.

21Di chɛ ka di yi a sani, gbibi li a suhu ni.

22Ninvuɣ’ shɛb’ bɛn bo n-nya li, di ni ti ba nyɛvili, ka ti bɛ niŋgbuna zaa alaafee.

23Gbib’ a suhu n-gari binshɛɣukam, dama di ni ka nyɛvili bilisiri yirina.

24Miri ka a tɔɣisiri yɛtɔɣ’ yoya, ka miri ka a zaŋ ʒiŋmabo kpɛh’ a kɔbili ni.

25Chɛ ka a nina kul lihiri tooni, ka a kul lihir’ a tooni tibi.

26Ʒe tibi a ni doli so’ shɛli ni, ka a soya zaa ni mali viɛla.

27Miri ka a ʒiɛhi kpa nudirigu polo bee nuzaa polo. Zom’ yi zaɣ’ biɛɣu tumbu ni.

← Chapter 3 Jump to: Chapter 5 →