Proverbs 19

Dagbani Bible (Naawuni Kundi Kasi)

← Chapter 18 Jump to: Chapter 20 →

1Nir’ yi nyɛ faralana ka mali biɛri suŋ, di so jɛrigu ŋun ŋmari ʒiri.

2Nir’ suhu yi bɔri binshɛli ka o ka yɛm, di bi viɛla, ka nir’ ŋun chani yomyom ti yaɣi bahirila soli.

3Nir’ jɛrilim tuma bahir’ o yoli, di zaa yoli ka o suhu yiɣisiri bahiri Yawɛ zuɣu.

4Buni chɛ ka nir’ nyarila zɔnim’ pam, amaa faranim’ bɛn’ ka zɔnima.

5Ŋunkam di ʒiri shɛhira ni nya tibidarigibo, ka ʒirilan’ ku yi tibidarigibo ni.

6Niriba pam bɔri ninvuɣ’ shɛb’ bɛn be zaashee’ kara ni, ka ŋun tiri pini nyɛla sokam zo.

7Faranim’ mabihi zaa yi je ba, di ni niŋ wula ka bɛ zɔnima ku zo ka chɛ ba? Hal bɛ yi kul’ kpaŋ bɛmaŋ’ kabo ni bɛ boli ba labisina, bɛ ku lan nya ba.

8Ŋunkam bo n-nya yɛm nyɛla ŋun bɔri omaŋa, ka ŋunkam nyɛ tɛhi’ zilimalana nyɛla ŋun tɔŋda.

9Ʒiri shɛhiralana ku yi tibidarigibo ni, ka ʒirilan’ mi ni kpi.

10Di bi simdi ka jɛrigu mali buni pam, di mi bi simdi ni dabili su nabihi.

11Bɛn mali yɛm suhu bi yiɣisiri yomyom, ka bɛ ni bi zaŋdi so taali zuɣu chɛ ka bɛ nyari jilima.

12Naa suhuyiɣisili ŋmanila gbuɣinli ŋumbu, amaa o nirilim ŋmanila maligim din lu mɔri zuɣu.

13Bi’ jɛrigu nyɛla ŋun tiri o ba suhugarigu. Yidaampaɣ’ so ŋun yuri zabili ŋmanila saa ŋun yɔrita.

14Nir’ ni tooi di o ba min’ o ma yili mini bɛ buni fali, amaa yidaampaɣ’ so ŋun mali yɛm yirila Yawɛ sanna.

15Vinnyaɣili chɛ ka gom gbaarila nira, ka ŋun je ni o ni’ bii ni gbe kum.

16Ninvuɣ’ shɛb’ bɛn doli fukumsi zaligunim’ ni be, ka bɛn lihi ʒiɛm li ni kpi.

17Ŋunkam niŋ nandan’ nirilim dihila Yawɛ samli, ka o ni ti yo o di zaa.

18Saɣisim’ a bihi tahima ni na beni saha shɛl’ la, ka di yu ni bɛ bahi yoli.

19Di simdi ka suhuyiɣisililan’ nya tibidarigibo, amaa a yi fa o bahi, shee ka a lan niŋ lala yaha.

20Wummi saɣisigu ka deei wuhibu din ni chɛ ka a ti mali yɛm dahin’ shɛli.

21Daadam ni tooi lo nianim’ pam o suhu ni, amaa Yawɛ ni yu shɛli n-niŋda.

22Di ni simdi ni shɛli be daadam biɛhigu ni nyɛla ʒiɛyimtali, ka nir’ yi nyɛ faralana di so ʒiŋmara.

23Yawɛ zɔbu nyɛla din tir’ nir’ nyɛvili ni yɛlimaŋli, ka di yi be nir’ kɔbili ni, o ni mali alaafee, ka barina shɛli ku paag’ o.

24Vinnyaɣilan’ n-zaŋd’ o nuu timdi laa ni hal ka bi bɔri ni o ŋmaai bindirigu ti kpar’ o nol’ ni.

25Bum’ ansarisimaana, ka bɛn bi mi bɔhim yɛm, kpahimi bɛn mali baŋsim zuɣu ni, ka bɛ nya baŋsim pahi.

26Ninvuɣ’ shɛb’ bɛn mali gadama ni bɛ ba, ka kariti bɛ ma bahira nyɛla bi’ shɛb’ bɛn tahiri vi mini turi na.

27M bia, di kpe yɔɣu ka chɛ baŋsim yɛtɔɣa, ka di chɛ ka a wum wuhibu.

28Ʒiri shɛhiralan’ maanila zaligu ansarisi, ka ninvuɣ’ biɛɣu noli vaani zaɣ’ biɛɣu.

29Ansarisimaaniba ni ti nya tibidarigibo, ka jɛra mi yaansi zuɣu ti nya fiɛbiga.

← Chapter 18 Jump to: Chapter 20 →