Proverbs 25

Dagbani Bible (Naawuni Kundi Kasi)

← Chapter 24 Jump to: Chapter 26 →

1Sulemaana ŋaha shɛŋa din pahi m-bɔŋɔ, ka Juda naa Hɛzɛkia kpambaliba daa yaai li sabi sɔŋ.

2Naawuni nyari jilima o ni sɔɣiri yɛla zuɣu; amaa nanim’ bɛn’ nyari jilima la bɛ ni vihiri yɛla n-yihiri li palo ni zuɣu.

3Zuɣusaa ni kul du shɛm, ka tiŋgbani mi zilim shɛm, lala n-nyɛ nanim’ tɛha, di ka vihi baŋ.

4Yihim’ daɣiri din be anzinfa ni, ka machɛli zaŋ li mali duɣu.

5Yihim’ ninvuɣ’ biɛri naa kɔbili ni, ka o nam maa leei wuntitali nam.

6Miri ka a va n-zani naa tooni bee n-zani wɔɣira zaashee,

7dama bɛ yi yɛl’ a, “Dum’ zuɣusaa ŋɔ na,” di so ni bɛ filim’ a ninvuɣ’ titali tooni.

8A nini yi nya shɛli, nyin’ di bo yomyom zaŋ li tahi kootu ni, dama a kpee yi ti dih’ a vi, di nyaaŋa wula ka a yɛn niŋ?

9Chɛ ka a min’ a ʒiʒiinikpee ʒini m-mali yi yɛtɔɣa, ka miri ka a zaŋ so daashili yɛla moli;

10di yi pa lala, so yi wum li, o ni dih’ a vi, ka a yu’ saɣiŋgu ku mali tariga.

11Yɛtɔɣa yi tɔɣisi viɛnyɛliŋga, di ŋmanila salima zaɣ’ kpil’ shɛŋa bɛ ni zaŋ kpɛh’ anzinfa binyara ni.

12Nir’ yi wum yɛm saɣisigu, di ŋmanila salima nintua bee salima yɛri.

13Tuumba bɛn ʒe yim ŋmanila atam kpuɣibu saha sakuɣili din maai bɛ kpamba sani; bɛ chɛ ka bɛn tim ba suhuri maara.

14Ninvuɣ’ so ŋun nyu bara ni o ni ti pini ka bi ti li ŋmanila saa ni yi ku ka bi mi la.

15Nir’ yi zaŋ suɣilo doli naa, o ni ti saɣ’ o ni yɛl’ o shɛm, ka zilim’ balli ni tooi kabisi kɔba.

16A yi nya shiri, nyin’ dim’ li a kum tariga, a yi di li yaɣi, a ni ti li bahi.

17Di chani a ʒiʒiinikpee yiŋa waawaayili, di yi pa lala, o nyee ni ti nyɔn’ a, ka o ku lan bɔr’ a.

18Ninvuɣ’ so ŋun di ʒiri shɛhira jɛnd’ o kpee, dilan’ ŋmanila tɔbutuhiri’ guliŋguɣu bee takɔbi bee piɛm din dira.

19Nir’ yi niŋ ninvuɣ’ so ŋun bi ʒe yim naani a muɣisigu saha, di ŋmanila nyinvɔɣu bee napɔŋ din ka alaafee.

20Nir’ yi yiini yila niŋdi ŋun mali suhugarigu, di ŋmanila bɛ ni niŋ bilisitom pa yum ni la. Kaman binneembila ni be situra ni bee nɔyɛla ni be dari ni shɛm, lala ka suhugarigu dimdi daadam suhu ni.

21Kum yi mal’ a dimnima, nyin’ tim’ ba bindirigu ka bɛ di, ka kɔnyuri yi mali ba, nyin’ tim’ ba kom ka bɛ nyu;

22dama di ŋmanila buɣim sala ka a zaŋ pa bɛ zuɣuri ni maa. Ka Yawɛ ni ti a di laara.

23Kaman saa pɔhim ni tahiri sakom na shɛm, lala ka nyaanzum tahiri suhuyiɣisili na.

24A yi be mɔpilli zuɣusaa larigi ni di so ni a mini yidaampaɣ’ so ŋun bɔri zabili pam laɣim be yil’ ni.

25Lahibali suŋ din yi tiŋgbɔn’ shɛl’ ni katiŋ’ na ŋmanila kɔnyuri ni yi wum nir’ ka o ti nya komahili la.

26Wuntizɔriba bɛn ti ninvuɣ’ biɛɣu soli ŋmanila kɔbilinini din bilisiri ko’ biɛɣu bee bɛ ni saɣim kɔbil’ shɛli kom.

27Di bi simdi ni nir’ di shiri pam bee m-bɔri jilima ti yaɣi.

28Ninvuɣ’ so ŋun ku tooi gbaag’ omaŋa ŋmanila bɛ ni kabi kpe gooni ni gili tin’ shɛli ni shɛm la.

← Chapter 24 Jump to: Chapter 26 →