Proverbs 20

Dagbani Bible (Naawuni Kundi Kasi)

← Chapter 19 Jump to: Chapter 21 →

1Wain nyɛla ansarisimaana, ka dam din kpɛma mi nyɛ vuyɔra, ka ninvuɣ’ so ŋun chɛ ka di kpɛh’ o yɔɣu nyɛla ŋun ka yɛm.

2Naa suhuyiɣisili ŋmanila gbuɣinli ŋumbu, ka ninvuɣ’ so ŋun miligi naa suhu, dilan’ ni kɔŋ o nyɛvili.

3Nir’ yi gbaag’ omaŋa ka chɛ zabili, di tir’ o jilima, amaa jɛrigu kam ŋun bɔrila zabili yomyom.

4Vinnyaɣilan’ bi kɔri kɔbu saha, ka puri atam kpuɣibu saha yi ti paai o bi nyari shɛli.

5Nia shɛŋa din be ninsal’ suhu ni ŋmanila kɔbil’ zilinli puuni kom, amaa ninvuɣ’ so ŋun mali baŋsim’ ni tooi ŋɔŋ di kom maa.

6Niriba pam yɛr’ ni bɛ nyɛla bɛn ʒe yim, amaa bɛ ni ŋuni n-lee nyɛ nir’ ni yɛn dihi so tabili?

7Wuntizɔriba kul dolila yɛlimaŋli soli, ka bihi bɛn doli bɛ naba mali alibarika.

8Naa ŋun ʒini saria karibu shee, o nina nyari zaɣ’ biɛɣu kam zaa.

9Ŋuni n-lee ni tooi yɛli, “Mani m-mali n suhu ka di yi daɣiri ni, n yi n daalahichi ni?”

10Ʒiri sanianim’ mini ʒiri binzahindisi zaa nyɛla din chihiri Yawɛ sani.

11Hal bihi tuma ni ka niriba baŋdi bɛ ni nyɛ shɛba, bɛ tuma yi nyɛla din viɛl’ ka tuhi.

12Yawɛ n-nam tibili din wumda mini nini din nyari ŋɔ zaa.

13Di yuri gbihibu, di yi pa lala fara ni gbaag’ a. Neem’ a nina, a ni nya bindirigu pam.

14Ŋun yɛn da kul yɛrimi, “Di mali shaara, di mali shaara,” di nyaaŋa ka o chaŋ ha ti nyuri bara.

15Salima beni ka kuɣ’ viɛla pam din mali shaara beni, amaa noli din tɔɣisiri baŋsim yɛtɔɣa n-nyɛ binshɛli din viɛl’ gari di zaa.

16Ninvuɣ’ so ŋun zani sana nyaaŋa ka o di samli, yin’ deem’ o binyɛrigu sɔŋ, deemiy’ o ni zaŋ shɛli lo alikauli maa, ka di leei saamba talima bini.

17Nir’ yi ŋma ʒiri nya bindirigu di nyaɣisa, amaa di nyaaŋa taŋkuɣa n-yɛn pal’ o noli.

18Ninvuɣ’ so ŋun deeri niriba yɛligu, o ni lo nia shɛli ni niŋ pali; doli yɛnnim’ ni yɛn wuh’ a so’ shɛli n-tuhi tɔbu.

19Tikub’ ku tooi gbibi ashili, dinzuɣu miri ka a zaŋ amaŋ’ tabili yɛtɔɣ’ gbaliŋlana.

20Bi’ so ŋun buɣisi ni o yɛli noli ti o ba bee o ma o firila ni kpi bumbɔn’ ni.

21Nir’ yi daŋ deeg’ o fali yomyom piligu ni, di bahigu ti ka anfaani.

22Miri ka a yɛli, “N ni niŋ a zaɣ’ biɛɣu labisi.” Guhimi Yawɛ, o ni sɔŋ a.

23Kuruwa kɔŋkɔba zaŋ zahim binyara nyɛla din chihira Yawɛ sani, ka ʒiri sanianim’ bi viɛla.

24Yawɛ n-su ti naba chandi ni nyɛ shɛm, ka wula ka ti lee yɛn tooi niŋ baŋ timaŋmaŋ’ soya?

25Nir’ yi niŋ yomyom yɛli, “N zaŋ bini yaakaza ti Naawuni,” ka naanyi ti piligi tɛhir’ o ni po pɔri shɛli maa yɛla, di ni leei tɔŋ gbaag’ o.

26Naa ŋun mali yɛm, ŋuna n-yihiri ninvuɣ’ biɛri, ka zaŋdi kaburi dari buri ba.

27Daadam shia nyɛla Yawɛ firila din vihiri baŋdi din be daadam niŋgbina puuni zaa.

28Yurilim mini ʒiɛyimtali n-nyɛ din gbibi naa, ka wuntitali mi nyɛ din chɛ ka o nam ʒiɛya.

29Bipola kpiɔŋ n-nyɛ bɛ jilima, amaa ninkura mi zab’ piɛla n-nyɛ bɛ jilima.

30Buri din tiri daŋa nyɛla din yihiri zaɣ’ biɛɣu, ka ŋmɛri nyɛ din maani ninsal’ niŋgbina puuni zaa.

← Chapter 19 Jump to: Chapter 21 →