Proverbs 5

Dagbani Bible (Naawuni Kundi Kasi)

← Chapter 4 Jump to: Chapter 6 →

1M bia, wummi n yɛm yɛtɔɣa ŋɔ viɛnyɛliŋga, ka luɣi a tiba wum m baŋsim yɛtɔɣa ŋɔ,

2ka di zuɣu chɛ ka a mali yɛm, ka baŋsim yɛtɔɣa be a noli ni.

3Dama pagɔrili naŋgbampiba malisimi kaman shiri la, ka o yɛtɔɣa be polipoli gari kpam,

4amaa di bahigu ni o tomi kaman yabiga ka diri kaman takɔb’ din mali naŋgbana ayi.

5O chanila kum shee, o ni doli so’ shɛli kunila kpiimba biɛhigu shee.

6O bi ʒe tibi nyɛvili soli zuɣu. O soli kpɛla yɔɣu, ka o bi mi lala.

7Dinzuɣu m bihi, wummiya n yɛligu ka di zaɣisiya n noli ni yɛtɔɣa.

8Niŋmiy’ o larigim ka miriya ka yi kul chaŋ mir’ o yiŋ’ dunoli.

9Di yi pa lala, yi ni kɔŋ yi jilima yi tab’ sani, ka ninvuɣ’ shɛb’ bɛn bi zɔri nambɔɣu kun ya ŋmaai yi yuma jia.

10Ka saamba di yi buni, ka yi tuma nyɔri kuli tinzun’ nir’ yiŋa;

11ka yi ti yɛn bahi ka ŋuhira, ka yi niŋgbuna zaa sheei;

12ka yi yɛli, “Mbaye, n daa zaɣisi biɛrisuŋ, ka zaɣisi zuɣuni kpahibu.

13N daa bi deei n karimbanim’ yɛtɔɣa bee n-luɣi n tiba wum n karimbanim’ maa wuhibu.

14Pumpɔŋɔ n yɛn bahila yoli zama laɣiŋgu ni.”

15Nyum’ amaŋmaŋ’ kɔduɣu ni kom din yi amaŋmaŋ’ kɔbiliga puuni na.

16Di tuhiya ni a chɛ ka a kɔbilinina yam luɣilikam n-nyɛ kɔzɔrim be solɔri zuɣu?

17Chɛ ka di nyɛla a kɔŋko dini, ka miri ka a niŋdi li tiri saamba.

18Naawuni niŋmi alibarika niŋ a kɔbilinina ni; chɛ ka a suhu piɛli paɣ’ so a ni daa kpuɣi a nachimbilim saha la zuɣu.

19O nyɛla ŋun viɛla kaman saŋkpaliŋ la, ka simdi ni a yu o. Chɛ ka o biha tiɣ’ a nini sahakam, ka chɛ ka o ni yur’ a shɛm ku a zuɣu.

20M bia, bɔzuɣu ka a yɛn chɛ ka paɣ’ so ku a zuɣu, ka a ti bɔbili paɣ’ zinalana biha?

21Dama Yawɛ nyari daadamnim’ tuma zaa, ka mi bɛ soya zaa.

22Dama ninvuɣ’ biɛri tuma nyɛla zana gbahiri ba, ka bɛ daalahichi tuma gbahiri ba.

23Bɛ ni bi nyari saɣisigu zuɣu ka bɛ kpira, ka bɛ jɛrilim din galisi zuɣu chɛ ka bɛ zuɣuri kpi.

← Chapter 4 Jump to: Chapter 6 →