Proverbs 3

Dagbani Bible (Naawuni Kundi Kasi)

← Chapter 2 Jump to: Chapter 4 →

1M bia, di tam n ni wuh’ a shɛli, amaa gbibi n ni wuh’ a shɛli maa a suhu ni.

2Dama di ni ti a nyɛvili wɔɣinli, ka chɛ ka a biɛhigu tɔŋ pam.

3Di chɛ ka ʒiɛyimtali mini yɛlimaŋli yi a kɔbili ni. Zaŋmi li lo a nyiŋgol’ ni, ka sab’ li niŋ a suhu ni.

4Di ni chɛ ka a nya nirilim niŋbu mini yu’ suŋ Naawuni mini salinim’ sani.

5Niŋmi Yawɛ naani ni a suhu zaa, ka miri ka a niŋ amaŋmaŋ’ milinsi naani.

6A yi yɛn niŋ shɛlikam, nyin’ di niŋ li o nyaaŋa, ka o chɛ ka a soya tuhi.

7Miri ka a lihi ni a mali yɛm, zom’ Yawɛ, ka zo n-yi zaɣ’ biɛɣu tumbu ni.

8Di ni leei tim tib’ a niŋgbuŋ, ka chɛ ka a niŋgbuna maai.

9Tim’ Yawɛ jilima a ni mali shɛlikam ni, ka zaŋ a puu bindir’ daŋda zaa gba ti o jilima.

10Di nyaaŋa ka bindira pam pal’ a kambɔna, ka wain pal’ a wain tɔɣiri bɔɣa hal ti puuri bahira.

11M bia, Yawɛ yi saɣis’ a, nyin’ di lihi ʒiɛm li bee o yi kpah’ a zuɣu ni, nyin’ di chɛ ka a nyee nyɔni.

12Dama Yawɛ ni yuri so, dilan’ zuɣu ni ka o kpahira kaman doo ni kpahir’ o ni yur’ o bidib’ so zuɣu ni shɛm la.

13Ninvuɣ’ shɛb’ bɛn bo n-nya yɛm mini yɛla baŋbu mali suhupiɛlli.

14Dama di nyɔri so anzinfa, ka di nyɔri lan so salima.

15Yɛm malibu so salima nɛma zaa, ka a ku tooi zaŋ a suhu ni bɔri binshɛŋa zaa shɛli buɣisi li.

16Nyɛvili wɔɣinli bela yɛm nudirigu ni, ka buni mini jilima be di nuzaa ni.

17Yɛm tuma nyɛla din chɛ ka biɛhigu niŋdi nyaɣisim, ka di soya zaa nyɛ din tahiri suhudoo na.

18Yɛm nyɛla nyɛvili tia ninvuɣ’ shɛb’ bɛn bɔbi gbaai li gbibi sani. Ka ninvuɣ’ shɛb’ bɛn gbibi li kirikiri nyɛ bɛn mali suhupiɛlli.

19Yawɛ yɛm puuni ka o daa nam tiŋgbani ŋɔ. O yɛla baŋbu puuni ka o daa nam zuɣusaa.

20O baŋsim puuni ka teeku daa yina, ka o daa chɛ ka saa yiri sagbana ni lurina.

21M bia, di chɛ ka dimbɔŋɔnim’ faai ka chɛ a. Kul gbibi yɛm maŋli mini tɛhi’ wɔɣila

22ka di leei nyɛvili a sani, ka leei nachiinsi bini a nyiŋgol’ ni.

23Di saha ka a dol’ a soli ni alaafee, ka a napɔŋ ku tuui shɛli.

24A yi ʒini tiŋa, a ku zɔri dabiɛm; ka a yi dɔni tiŋa, a ni gbihi go’ nyaɣisili.

25Di zɔri yɛlibiɛ’ libigirili dabiɛm bee sanʒiɛɣu din ʒiɛri ninvuɣ’ biɛri,

26dama Yawɛ n-nyɛ a ni yɛn niŋ so naani, ka o mi ku chɛ ka tɔŋ gbaag’ a napɔŋ.

27Di zaɣisi zaɣ’ viɛlli niŋ ti di ni simdi ni a niŋ li ti ninvuɣ’ shɛba, a yi mali yiko din ni niŋ li.

28Di yɛli a ʒiʒiinikpee, “Cham’ ka sa labina biɛɣuni ka n zaŋ li ti a,” di yi be a sani.

29Miri ka a lo a ʒiʒiinikpee ŋun ʒi m-baɣ’ a, ka niŋ a naani zaɣ’ biɛɣu.

30Miri ka a chɛ ka a mini so zabi ka di ka soli, ka di pala o tum’ a la taali.

31Miri ka a zabiri gadamanim’ nyuli, a mi di pii bɛ soya shɛli doli,

32dama Yawɛ je tuumbiɛrinima, amaa wuntizɔriba nyɛla o zɔsimnima.

33Yawɛ yɛlila noli niŋ ninvuɣ’ biɛri yinsi, amaa o niŋdi alibarika niŋdi wuntizɔriba biɛhigu shee.

34O maani ansarisimaaniba ansarisi, amaa ka niŋdi tarimba nirilim.

35Yɛnnim’ ni nya jilima, amaa tipawumlinim’ bɛn nyɛ jɛra ni di vi.

← Chapter 2 Jump to: Chapter 4 →