Proverbs 23

Dagbani Bible (Naawuni Kundi Kasi)

← Chapter 22 Jump to: Chapter 24 →

1A mini naa yi ʒini ni yi di bindirigu, nyin’ kpahimmi baŋ din ʒe a tooni maa ni nyɛ shɛli.

2A suhu yi ye bindirigu maa dibu zuɣu, nyin’ gbaam’ amaŋa.

3Miri ka a chɛ ka a suhu ye naa bindir’ nyaɣisa zuɣu, dama di nyɛla yɔhiŋ bindira.

4Miri ka a nahind’ amaŋa buni nyabu zuɣu, niŋmi yɛm din ni chɛ ka a yi di yɛla ni.

5A nini ti yɛn nya li la, ka di chaŋ; dama yim ka di yɛn bili kpiŋkpama yiɣi kpe zuɣusaa kaman tɔrili la.

6Miri ka a di zunyuŋnim’ bindira bee n-chɛ ka a kɔre kpe di ni di nyaɣisim zuɣu;

7dama kaman zabigu ni zaani lɔŋni shɛm la, lala n-nyɛ ba. Bɛ ni yɛl’ a, “Dim’ ka nyu.” amaa di bi paai bɛ puu ni.

8A ni di biɛla shɛli maa, a ni ti li bahi, ka a yɛtɔɣ’ viɛla bahi yoli.

9Miri ka a di jɛrigu alizama, o ni lihi ʒiɛm a yɛm yɛtɔɣa maa.

10Miri ka a vuɣi tintariga kpaa din daa pun beni kurimbuni ha bee n-fa kpibisi palo,

11dama bɛ tiligira nyɛla ŋun mali yaa. O ni zab’ bɛ zuɣu.

12Chɛ ka a baɣa be wuhibu ni, ka gbilisi tibili wum baŋsim yɛtɔɣa.

13Miri ka a chɛ a bihi tibili darigibu. A yi fiɛb’ ba fiɛbiga, bɛ ku kpi.

14A yi fiɛb’ ba fiɛbiga, a ni tiligi bɛ nyɛviya ka bɛ ku chaŋ kpiimba biɛhigu shee.

15M bia, a yi mali yɛm, n suhu ni piɛla.

16A yi tɔɣisiri yɛlimaŋli yɛtɔɣa, di ni niŋ ma nyaɣisim.

17Miri ka a zabiri alahichinim’ nyuli, amaa kul jɛmmila Yawɛ.

18Biɛhiŋ kani, a mali dahin’ shɛli biɛhigu tahima, ka a tahima maa ni niŋ pali.

19M bia, wumma, niŋmi yɛm, ka niŋ tɛha niŋ a suhu ni zaŋ chaŋ a biɛhigu polo.

20Miri ka a zaŋ amaŋ’ pahi ninvuɣ’ shɛb’ bɛn nyuri wain pam zuɣu bee n-zaŋ amaŋ’ pahi ninvuɣ’ shɛb’ bɛn suhuri ye nimdi ŋubbu zuɣu;

21dama bɛn nyuri dam kuuna mini pulaannim’ ni leei faranima; ka bɛ gɔ’ gbihibo nyɛ din ni chɛ ka bɛ chaŋ gbinfini.

22Wumm’ a ba ŋun dɔɣ’ a yɛligu. Miri ka a ʒiɛm a ma o yi ti kurigi.

23Dam’ yɛlimaŋli mini yɛm ni wuhibu ni baŋsim, ka miri ka a zaŋ li kɔhi.

24Wuntizɔra ba ni mali suhupiɛlli pam; ŋunkam dɔɣi bi’ so ŋun mali yɛm ni mali suhupiɛlli o zuɣu.

25Chɛ ka a ba min’ a ma mali suhupiɛlli; chɛ ka paɣ’ ŋun dɔɣ’ a mali suhupiɛlli.

26M bia, zaŋm’ a suhu ti ma, ka kpahim m biɛhigu;

27dama pagɔrili ŋmanila bɔɣ’ zilinli, paɣ’ zinalan’ ŋmanila kɔbil’ muɣiliŋga.

28O sɔɣimi doya gu kaman ŋmɛnditol’ la, ka chɛ ka niriba pam bi ʒe yim.

29Ninvuɣ’ banim’ biɛhigu n-lee nyɛ mbusim? Ninvuɣ’ banima n-lee mali suhugarigu? Ninvuɣ’ banima n-lee bɔri zabili? Ninvuɣ’ banima n-lee mali yɛtɔɣ’ bihi? Ninvuɣ’ banima n-lee mali dansi ka di ka daliri? Ninvuɣ’ banima n-lee mali nin’ ʒiɛri?

30Bɛna n-nyɛ bɛn ʒiini nyuri wain yuura ni binnyuri kpɛma balibubalibu.

31Wain yi ti mɔha, ka be pipia ni kpeera, ka yiɣiri lɛbira, nyin’ di lihi li.

32Di bahigu ti ŋmanila wɔɣ’ dimli, ka dimda kaman gariŋga la.

33A nina ni nya alahiziba binyara, ka a tɛha yɛtɔɣa gabi.

34A ni ti ŋmanila ninvuɣ’ so ŋun do teeku sunsuuni, ka ŋmani ŋun do ŋariŋ puuni daantaliga zuɣu.

35A ni ti yɛli, “Bɛ ŋme ma, amaa m bi nya daŋa. Bɛ bu ma, amaa di bi biɛra. Bɔ saha ka n nini yɛn neei? N lan bɔrila wain ni n nyu.”

← Chapter 22 Jump to: Chapter 24 →