Proverbs 24

Dagbani Bible (Naawuni Kundi Kasi)

← Chapter 23 Jump to: Chapter 25 →

1Miri ka a zabi ninvuɣ’ biɛri nyuli bee m-bɔri ni a mini ba be,

2dama bɛ tɛha zaa nyɛla duŋtaabo, ka bɛ noya tɔɣisiri barina yɛtɔɣa.

3Yɛm puuni ka nir’ mɛri yili, tɛhi’ zilima puuni ka yili mɛri zaana.

4Baŋsim puuni ka bɛ zaŋdi neen’ viɛla mini azichi nɛma paani duri.

5Tɔbbi’ so ŋun mali yɛm ni tooi nyaŋ ŋun mali kpiɔŋ, ka ŋun mali baŋsim ni tooi nyaŋ ŋun mali yaa;

6dama yɛm soli ka a ni tooi doli tuh’ a tɔbu, ka saawaranim’ pam mi chɛ ka nir’ diri nasara.

7Yɛm yɛla nyɛla din kpɛm’ pam ŋun ka yɛm sani. O yi be dunɔdali shee o bi yaar’ o noli.

8Ŋunkam lo nia ni o tum zaɣ’ biɛɣu, bɛ ni bol’ o barinatumda.

9Jɛrigu ni lo shɛli nyɛla alahichi, ka ansarisimaana mi nyɛ sokam ni je ninvuɣ’ so.

10A yi tarigi yɛl’ biɛɣu nyabu dali, a yaa m-pun bi galisi.

11A yi bi fa bɛ ni zaŋ ninvuɣ’ so chani ni bɛ ti ku m-bahi, ka o chani ŋun yɛn ku o sani ka o naba sɔhira,

12a yi yɛli, “Nyama, ti di bi mi dimbɔŋɔ.” Ŋun mi din be ninsal’ suhu ni la nya li. Ŋun gul’ a bi mi li? O ku yo nira o tuma samli?

13M bia, dim’ shiri, dama di nyɛla din viɛla, ka shikpam din tɔɣiri shigbaŋ ni na nyɛla din nyaɣis’ a noli ni.

14Baŋmi ni yɛm gba nyɛla din nyaɣis’ a suhu ni. A yi nya yɛm, a ni nya dahin’ shɛli biɛhigu, ka a tahima ku zani soli.

15Miri ka a sɔɣi doya ni a liri wuntizɔra yiŋa kaman ninvuɣ’ biɛɣu la. Miri ka a liri wuntizɔriba biɛhigu shee,

16dama bɛ yi kul lu buyopɔin, bɛ ni lan yiɣisi; amaa zaɣ’ biɛɣu ni ku ninvuɣ’ biɛri.

17A dimnim’ yi lu, nyin’ di chɛ ka di niŋ’ a nyaɣisim, bɛ yi tuui, nyin’ di chɛ ka a suhu piɛla.

18Di yi pa lala Yawɛ ni nya li, ka di bi niŋ o nyaɣisim, ka o ku lan yiɣisi o suhu bahi bɛ zuɣu.

19Di chɛ ka tuumbiɛtumdiba yɛla muɣis’ a. Di zabiri ninvuɣ’ biɛri nyuli;

20dama bɛ ka dahin’ shɛli bini; ninvuɣ’ biɛri firila ni kpi.

21M bia, zom’ Yawɛ ka zom’ naa, ka miri ka a zaɣisi bɛ so noli;

22dama alɔbo ni tooi yi bɛ sanna n-libig’ a, ka ŋuni n-lee mi bɛ ni yɛn tahi saɣiŋgu shɛl’ na?

23Dimbɔŋɔnim’ gba nyɛla yɛnnim’ yɛtɔɣa: Nimmira yɛlimaŋli tibu saria karibu bi viɛla.

24Ŋunkam yɛli ninvuɣ’ biɛɣu ni o ka taali, dilan’ nyɛla niriba ni yɛn turi so, ka zuliya kam zaɣis’ o;

25amaa ninvuɣ’ shɛb’ bɛn kpahiri ninvuɣ’ biɛri zuɣu ni ni mali suhupiɛlli, ka nya alibarika pam.

26Ninvuɣ’ so ŋun garigi bɔhigu ni yɛlimaŋli nyɛla ninvuɣ’ so ŋun bɔri zɔsimdi.

27Malim’ a tuma shili samban’ ni, ka tum a pu’ tuma naai, di nyaaŋa ka a naanyi me a yili.

28Miri ka a di shɛhira jɛnd’ a kpee ka di ka daliri, ka miri ka a yɔhim so.

29Miri ka a yɛli, “N ni niŋ n taba kaman bɛ ni niŋ ma shɛm. N ni niŋ ba yo bɛ ni niŋ shɛm samli.”

30N daa ti baɣisila vinnyaɣilan’ puu gari, ka daa ti lan baɣisi jɛrigu wain tihi puu gari,

31ka nya ka gɔhi n-kul zooi lim li; ka yihim lan zibigi di ni, ka di kuɣa gooni lu n-doya.

32Di saha ka n daa nya li, ka tɛhi di yɛla, ka lan lihi li, ka deei wuhibu di ni.

33Gbihim’ biɛla, dɔnim’ biɛla, zaŋm’ a nuhi taɣili taba vuhi biɛla,

34ka fara lir’ a kaman tayiɣ’ la, ka kum lu a zuɣu kaman tɔbbi’ so ŋun lo kpara la.

← Chapter 23 Jump to: Chapter 25 →