1 Samuel 10

Guarani 2015 (Ñanderuete Ñe’ẽ Porã 2015)

← Chapter 9 Jump to: Chapter 11 →

1Upéramo Samuel oguenohẽ peteĩ acéite ryru ha oñohẽ Saul akã rehe, ha ohetũvo ichupe he’i: Ñanderuete ndeporavóma Israel retã ruvicharã ramo.

2Ko árape rejeívo che ypýgui, rejohúta mokõi kuimba’épe Raquel tyvy ypýpe, Benjamin yvýpe, Selsápe, ha ha’ekuéra he’íta ndéve: Umi búrro kuña pehekáva ojejohúma; nde ru ndojepy’apyvéima pende búrro kuñakuéra rehe, ojepy’apýma penderehénte, ha he’i: Mba’épa ikatu ajapo che ra’y rehehápe.

3Rehomivévo tenonderã gotýo, ha reg̃uahẽvo yvyra encína Tabor peguápe, osẽta ndejohu hag̃ua mbohapy kuimba’e ohóva Bet-élpe, Ñanderuete rendápe, peteĩ ogueraháva mbohapy kavarara’y, ambue mbohapy pan ha pe mbohapyha peteĩ víno ryru.

4Ha’ekuéra nemomaitei rire ome’ẽta ndéve mokõi pan ha nde rejapyhýta ipoguikuéra.

5Upéi reg̃uahẽta Ñanderuete cérro rembe’ýpe, Filisteayguakuéra guárdia oĩháme ha reikévo pe távape rejohúta peteĩ proféta aty oguejýva pe yvy ijyvateve háguio ha henonderãme oĩta umi ombopúva árpa, tamborin, mimby ha mbarakaguasu oprofetiza joáta hikuái.

6Upévo Ñanderuete Pytu Porãitéva pu’aka oúta nde ári ha reprofetizáta hendivekuéra, ha oikóta ndehegui ambue kuimba’e.

7Ág̃a ojehu vove ko’ã mba’e techapyrãva, ejapo reñandúva rejapo hag̃ua, Ñanderuete oĩta nendive.

8Uperire nde reguejýta che rendápe Gilgálpe; ha che aguejýta ne rendápe aikuave’ẽ hag̃ua kuave’ẽmby ojehapypáva ha kuave’ẽmby angapytu’u reheguáva. Reha’ãrõta 7 ára, che aju peve ne rendápe rohekombo’e hag̃ua ne rembiaporã rehe.

9Ha ojehu Saul ojerévo ome’ẽ ijatukupe oho hag̃ua Samuel ypýgui, Ñanderuete omoambue iñe’ã ha opaite ko’ã techauka ojehu pe ára pévape.

10Ha Saul og̃uahẽvo pe cérro yképe, péina ouhína profetakuéra ohug̃uaitĩvo ichupe; ha Ñanderuete Pytu Porãitéva ou hi’ári ipu’aka reheve, ha Saul oprofetiza avei ijapytepekuéra.

11Ha umi oikuaáva Saúlpe ha ohechávo ichupe oprofetizaha avei profetakuéra ndive, he’i joa hikuái ojupe: Mba’e piko ojehúra’e Cis ra’ýpe. Saul piko oiko avei proféta ramo profetakuéra apytépe.

12Ha peteĩ oĩva upépe oñe’ẽ ombohováivo: Ha máva piko itúva. Ko’ã mba’e rupi oiko ñe’ẽ arandu ramo: Saul piko oikóma avei profetakuéra apytépe.

13Ha oprofetiza rire Saul oho hógape.

14Saul tio oporandu ichupe ha hembiguáipe: Mamóiko pehóra’e. Ha ha’e he’i: Búrro kuñakuéra rekávo; ha rohechakuaáma ramo ndorojohumo’ãiha roho Samuel rendápe.

15Pe tio he’i Saúlpe: Ajerure ndéve emombe’upa chéve mba’épa Samuel he’i peẽme.

16Ha Saul he’i itiópe: Omombe’u oréve búrro kuñakuéra ojejohúma hague; ha pe tetã ruvicharã guioguáva, Samuel he’iva’ekue ichupe, nomombe’úi mba’eve itiópe.

17Upéi Samuel ombyatyuka hetãyguakuérape Ñanderuete renondépe, Mizpápe.

18Ha he’i Israel ñemoñarenguérape: Péicha he’i Israel Jára: Che anohẽ Israélpe Egíptogui, ha asalva ichupekuéra Egiptoygua pógui, ha opaite ambue tetãnguéra pendejopyva’ekuégui.

19Peẽ katu ko’ág̃a pemboyke pende Jarateépe penemo’ãmava’ekue opaite pende jepy’apy ha pende py’ajopýgui, ha peje: Nahániri, emoĩ tetã ruvichaguasu oreári. Ko’ág̃a, peñemboja Ñanderuete renondépe pende tríbu rupi ha pende 1000 aty rehegua rupi.

20Ha Samuel ombyatyuka opaite Israel ñemoñarenguérape, ha ojeporavo Benjamin ñemoñarenguéra po’a reity rupi.

21Ha omog̃uahẽuka Benjamin ñemoñarenguérape hogaguasu rupi, pe po’a jeity ho’a Matri rogaguasu ári; ha ichugui ojeporavo Saul, Cis ra’ýpe. Ha ojeheka ichupe, ndojejohúi katu ichupe.

22Upéi oñeporandu Ñanderuetépe ne’ĩrapa ou Saul, ha Ñanderuete he’i jevy: Péina ha’e okañy umi cárga (vultokuéra) apytépe.

23Upérõ oñani hikuái ha ogueru ichupe; ha omoĩ ichupe tetãyguakuéra mbytépe; ha’e peteĩ akã ijyvateve opaite ambue hetãyguakuéragui.

24Ha Samuel he’i mayma hetãyguakuérape: Pema’ẽ porãke, kóvape Ñanderuete oiporavóma, ha’eichagua ndaipóri voi mayma tetãygua apytépe: Upévo opaite tetãyguakuéra vy’águi osapukái he’ívo: Toikove (víva) ore retã ruvichaguasurã.

25Upéi Samuel he’i hetãyguakuérape hembiaporã imburuvichaguasu rehe, ha ohaipa peteĩ kuatiañe’ẽme, ha upéva oñongatu Ñanderuete rógape.

26Upéi Samuel omondo opaite hetãyguakuéra hógape, ha Saul oho avei hógape oĩva Gibéape, ha hendive oho umi kuimba’e ñorãirõ reheguáva, Ñanderuete opoko haguére ipy’apykuéra rehe.

27Ha oĩmimi umi tekove ñaña he’íva: Mba’éichapa kóva ikatu ñaneguenohẽ jejopy vaígui. Ha ndo’apói mba’eve ramo ichupe hikuái, ha ndoguerúi ichupe jopói; Saul katu nopenái hesekuéra, ha okirirĩ.

← Chapter 9 Jump to: Chapter 11 →