1 Samuel 28

Guarani 2015 (Ñanderuete Ñe’ẽ Porã 2015)

← Chapter 27 Jump to: Chapter 29 →

1Ojehu umi árape Filisteayguakuéra oñembyaty joa ojeity hag̃ua Israel ári, ha Aquis he’i Davídpe: Eikuaáke resẽtaha chendive ñorãirõme, nde ha ne irũnguéra.

2Ha David he’i Aquíspe: Iporãiterei, nde reikuaa voi ne rembiguái rembiapo, ha Aquis he’i Davídpe: Upéicha ramo che romoĩta che rekove ñangarekoha ramo, aikove aja pukukue.

3Samuel omanóma ha mayma Israelgua oguerombyasýkuri, ha oñotỹ hikuái ichupe itáva Ramápe. Ha Saul oitypa Israel retãpýgui umi ohenóiva ãnguépe ha umi imba’ekuaávape.

4Ha Filisteayguakuéra oñembyaty ha opyta Sunémpe; ha Saul ombyaty opaite Israelguakuérape, ha opyta hikuái Gilbóape.

5Ha Saul ohechávo umi Filisteaygua aty ituichaitereiha oñemondyiete ha iñangekõi ipy’apýpe.

6Ha Saul oporanduse Ñanderuetépe, Ha’e katu nopenái hese ike pegua rupi, ni Urim rupi, ni iproféta rupi.

7Upémaramo Saul he’i hembiguaikuérape: Peheka chéve peteĩ kuña ohenóiva ãnguépe ha taha hendápe ha ha’erupi taporandu. Ha hembiguái he’i ichupe: Péina oime gueteri peteĩ kuña Endórpe, ohenoikuaáva ãnguépe.

8Ha Saul oñuã hova, ha oñemonde ao ambuépe, oho hag̃ua mokõi kuimba’e ndive upe kuña rendápe. Ha og̃uahẽvo upe pyharépe he’i ichupe: Che ajerure ndéve eikuaauka chéve ta’yvõ rembiapo (paje) rupi pe aikuaaséva, ha ehupiuka che rendápe pe ãngue che aipotáva.

9Ha pe kuña he’i: Eikuaa porãke, Saul oipe’aha yvy árigui umi ohenóiva ãnguépe ha imba’ekuaávape. Mba’érehe piko remoĩ ñuhã che rekovépe chejukauka hag̃ua.

10Upéramo Saul ome’ẽ ichupe iñe’ẽ Ñanderuete rérape, he’ívo: Ñanderuete rekovére, ko’ã mba’e rupi ndoumo’ãi ndéve mba’eveichagua mba’e ivaíva.

11Upérõ pe kuña he’i: Mavapépa reipota ambou ne rendápe. Ha ha’e he’i ichupe: Emboúna che rendápe Samuel ãnguépe.

12Ha pe kuña ohechávo Samuélpe, hatã osapukái, ha he’i Saúlpe:

13Mba’érehepa chembotavýra’e. Nde voi ningo Saul. Ha pe tetã ruvicha he’i ichupe: Ani rekyhyjétei. Mba’éiko rehechára’e. Ha pe kuña he’i Saúlpe: Ahecha jarakuéra ojupivahína yvyguygui.

14Ha ha’e he’i ichupe: Mba’épepa ojogua ha’ãnga. Ha ha’e he’i jevy: Peteĩ karai itujámava ou, ha oñeñu’ã peteĩ pónchope (pa’ikuéra oiporúva, hérava efod). Upévo Saul oikuaáma Samuel ouha, ha oñemomirĩvo ojeity ovapývo yvýpe.

15Ha Samuel he’i Saúlpe: Mba’érehe piko chemyangekõi chererúvo. Ha Saul he’i jevy: Ajepy’apyeterei Filisteayguakuéra chejopyetégui ha Ñanderuete oñemboykégui chehegui, ha noñe’ẽvéi chéve iproféta rupi, ni kepegua rupi; upévare rehenoikákuri, emyesakã hag̃ua chéve ajapova’erãva.

16Upéramo Samuel he’i: Ha mba’érehe piko reporandu chéve, Ñanderuete voi oñemboyke ramo ndehegui ha ndaija’evéirõ nderehe.

17Ñanderuete ojapo nderehe he’i haguéicha che juru rupi; Ñanderuete ohekýima ne retã ruvicha reko ome’ẽ hag̃ua ne irũ Davídpe.

18Nde naneñe’ẽrendúi haguére Ñanderuete he’iva’ekuépe, ha nderejapói haguére Amalec rehe rejapova’erãva ogue hag̃ua pochy rendy, upévare Ñanderuete ojapo nderehe ko árape ko mba’e kóva.

19Ha Ñanderuete omoĩta nde rekove ha Israelguakuérape Filisteayguakuéra pópe; ha ko’ẽ ramo reiméta chendive, nde ha nde ra’ykuéra, ha Ñanderuete omoĩta avei Israel soldadokuéra Filisteayguakuéra pópe.

20Saul ohendúvo Samuel ñe’ẽ, hete tuichakue javeve ho’a yvýpe, okyhyjeitereígui; ha ipy’amano, ndo’úigui avei mba’eve pe árape ni pe pyhare pukukue.

21Upéramo pe kuña ou Saul rendápe ha ohechávo iñangekõietereiha he’i ichupe: Eikuaa porãke, ne rembiguái ohendu ha ojapopa ne ñe’ẽ, ha che voi amoĩ che rekove nde pópe ajapóvo ne rembipota.

22Upévare ajerure ko’ág̃a nde rehendu hag̃ua avei ne rembiguái ñe’ẽ; ambosako’íta tembi’u re’u hag̃ua, ikatu hag̃uáicha nembarete jevy, ha reho hag̃ua nde rape rehe.

23Saul ndo’uséigui he’i: Nda’umo’ãi. Ha hembiguaikuéra ha pe kuña he’i jevy jey, ha’e ojapo hag̃ua iñe’ẽ. Upéi Saul opu’ã yvýgui ha oguapy peteĩ tupápe.

24Ha pe kuña oguerekókuri hógape peteĩ vakara’y omongyra porãva, upéva ojuka; ha ojapyhy trígo ku’i ha oipatuka ha ombojy mbeju ichupe g̃uarã.

25Ha ogueru Saul ha hembiguaikuéra renondépe; ha okarupa rire opu’ã hikuái ha oho jevy pe pyharépe.

← Chapter 27 Jump to: Chapter 29 →