1 Samuel 14 — Guarani 2015 (Ñanderuete Ñe’ẽ Porã 2015)

1Ojehu ningo peteĩ árape, Jonatan, Saul ra’y, he’i hembiguáipe ogueraháva iñorãirõ rembiporukuéra: Eju jaha Filisteaygua soldádo aty oĩháme. Ha’e katu ndoikuaaukái mba’eve itúvape.

2Ha Saul opyta Gibéa rembe’y gotýo, peteĩ granáda (yvyra) rakã guýpe, oĩva Migrónpe, ha umi kuimba’e hendive hembýva oiméne 600 rupi.

3Ha Ahías, Ahitub ra’y, Icabod ryvy, Finees ra’y, Eli remineno oikóva Ñanderuete pa’i ramo Sílope, ogueraha ijehe pe póncho mbyky pa’ikuéra omondéva; ha umi tetãygua ndoikuaái Jonatan oho hague.

4Umi cérro pa’ũ (válle) po’ípe Jonatan ohasaseha rupi umi Filisteaygua oñembyatyhápe ha upépe oĩ mokõi ita tuicha hakua ojováiva, peteĩ héra Boses ha ambue Sene.

5Peteĩ itaguasu opyta nórtepe, Micmas gotýo, ha pe ambue súrpe, Gibéa gotýo.

6Ha Jonatan he’i hembiguáipe: Eju jaha ko’ã kuimba’e ipire’i oñekytĩ’ỹva rendápe, ikatu Ñanderuete ojapo ñanderehehápe oimeraẽ mba’e, ndahasyiete ichupe g̃uarã oporopytyvõ heta térã mbovy (kuimba’e) rupi.

7Ha hembiguái he’i ichupe: Ejapo katu reñandúva guive nde py’apýpe, eikuaa porãke, che romoirũta rehosehápe.

8Upéramo Jonatan he’i: Jahasa Filisteaygua rendápe ha jajehechauka ichupekuéra.

9Ha he’i ramo hikuái ñandéve: Peha’ãrõke rog̃uahẽ meve pene rendápe, upéicharamo japytátante ñaimeháme, ha ndajajupimo’ãi ha’ekuéra oĩháme.

10Ha he’i mba’e ramo ñandéve: Pejúna ore rendápe, upéicharamo jajupíta, upéva he’ise Ñanderuete omoĩmaha ichupekuéra ñande pópe, péva toiko techaukaha ramo ñandéve g̃uarã.

11Upéramo mokõivéva ojehechauka Filisteaygua soldadokuérape, ha umi Filisteaygua he’i: Péina Israelguakuéra osẽma itakuaguasu okañy haguégui.

12Ha umi Filisteaygua soldádo he’i Jonatan ha hembiguáipe: Peju ore rendápe ha roikuaaukáta peẽme peteĩ mba’e. Upéramo Jonatan he’i iñorãirõ rembiporu oguerovávape: Ejúke che rapykuéri, Ñanderuete omoĩma ichupekuéra Israel pópe.

13Ha Jonatan ojupi oñekaramaháme ipy ha ipópe, ha hapykuéri iñorãirõ rembiporu rerojahára, ha Jonatan ojeity umi ojohúva ári ha iñorãirõ rembiporu rerojaha ohóva hapykuéri ndive ojuka ichupekuéra.

14Kóva ningo pe jejuka tenondegua Jonatan ha iñorãirõ rembiporu rerojahára ojapova’ekue ha oiméne ojuka 20 kuimba’épe peteĩ yvy pehẽnguépe, peteĩ guéi oarakuaáva peteĩ ára pukukuépe.

15Upeguive oiko ñemondyiguasu Filisteayguakuéra atyguasúpe oĩva ñúme, ha isoldadokuéra okyhyjepa ha péicha ojehu avei umi osẽva’ekue omonda hag̃ua, ha oiko avei hi’ári yvyryrýi, péicha Ñanderuete omondyiete ichupekuéra.

16Ha umi ma’ẽhára oĩva Saul ndive Gibéa, Benjamin reheguápe, ohecha pe sarambi oikóva Filisteaygua atyguasúpe, oñanívo ágotyo pégotyo oñemosarambipávo.

17Upéramo Saul he’i hetãyguakuéra oĩvape gueteri hendive: Peipapa jaikuaa hag̃ua mávapa osẽ ra’ẽ ñande apytégui, ha ojepapa rire iñorãirõhára, péina Jonatan ha hembiporu rerojaha ndaipóri.

18Ha Saul he’i Ahíaspe: Eru Ñanderuete karameg̃ua. Umi árape pe karameg̃ua oĩva’ekue Israelguakuéra atýpe.

19Ha ojehu Saul oñe’ẽ aja gueteri hína pe pa’i ndive, peteĩ ayvu ha sarambi tuichaitéva oiko Filisteayguakuéra apytépe. Upéramo Saul he’i pe pa’ípe: Ehejána, ha eha’ãrõke.

20Ha Saul ombyaty hetãyguakuérape oĩva gueteri hendive, ha ojeity avei Filisteayguakuéra ári, pe apañuãiguasu apytépe, ha’ekuéra voi oñepyrũmagui ojojuka ikyse puku rupi.

21Ha Israelguakuéra omoirũvahína Filisteayguakuérape, oñemoĩ ko’ág̃a avei hesekuéra, oipytyvõ hag̃ua Israelguakuérape oĩvahína Saul ha Jonatan ndive.

22Upéicha avei opaite Israelgua okañymava’ekue Efrain cérro rehe, ohendúvo Filisteayguakuéra oñemuñambamaha, ojeity avei hi’arikuéra.

23Upéicha Ñanderuete oipytyvõ porã Israélpe pe ára pévape. Ha pe ñorãirõ guasu og̃uahẽ Bet-aven peve.

24Israel kuimba’ekuéra katu ohasa asyete pe árape peteĩ jejopy vaípe, Saul voi he’iukara’e hetãyguakuérape he’ívo: Oimeraẽ ho’úva pan iñypytũ mboyve, añevenga mboyve cherehe ija’e’ỹvare topyta maldecído, upévare mayma hetãyguakuéra ndo’úi mba’evete.

25Upéi Israel ñorãirõhára og̃uahẽ peteĩ ka’aguy oĩháme eíra yvy apére rei.

26Ha hetãyguakuéra oikepa ka’aguýpe, ha péina upépe otyky eíra, avave katu nomog̃uahẽi ipo ijurúpe okyhyjégui Saul ñe’ẽ vaígui.

27Jonatan katu nohendúira’e itúva omoñe’ẽ hague péva hetãyguakuérape, ha oikutu peteĩ yvyra puku oguerúva ipópe, ha ombohykue eírape ha ogueraha ijurúpe; ha péva omyesakã porã ichupe hesa ha omombarete jevy ichupe.

28Upévo peteĩ soldádo he’i ichupe: Nde ru ningo he’iuka oréve: Opytava’erã maldicion poguýpe pe kuimba’e ho’úva tembi’u ko ára kóvape. Ha upévare hetãyguakuéra ipy’a kangypáma ohóvo.

29Ha Jonatan he’i: Che ru omyangekõi rei hetãyguakuérape, pehecháma mba’éichapa hesakã porã che resa ha’u rire michĩmi ko eíra kóvagui.

30Mba’eichaite va’erãmo’ãiko tetãygua ho’u rire ho’use háicha ko árape, pe tembi’u oipe’amava’ekue Filisteaygua pógui. Ndaituichaveiva’erãmo’ã piko pe sarambi oikóva Filisteayguakuéra apytépe.

31Pe árape Israelguakuéra ojuka Filisteayguakuérape Micmas guive Ajalón peve; Saul ñorãirõhára katu ikuepáma.

32Ha hetãyguakuéra ojeity mba’eita ojepe’ava’ekue ári, ha ojuka hikuái ovecha, vaka, vakara’y ha oajurakytĩvo yvýpente, ha peichaite ho’u hikuái huguy reheve.

33Ha oñemomarandu Saúlpe oje’évo ichupe: Tetãyguakuéra oñemoangaipa Ñanderuete renondépe, ho’úvo hikuái so’o huguy reheve, ha ha’e he’i: Peẽ pepyrũ teko porã rehe; pembyapajeréi peteĩ itaguasu che rendápe.

34Saul he’iuka hetãyguakuérape peteĩteĩva togueru che rendápe hymba vaka, ovecha ha peajúra kytĩ, pe’u hag̃ua ko’ápe; ha ani peñemoangaipa Ñanderuete renondépe, pe’úvo so’o huguy reheve. Ha hetãyguakuéra ogueru umi hymba vaka pe pyharépe, ha oajúra kytĩ hikuái umívape Saul oĩháme.

35Ha Saul omopu’ã peteĩ kuave’ẽmby renda Ñanderuetépe g̃uarã, ko kuave’ẽmby renda kóva ningo pe tenondegua ha’e omopu’ãva’ekue.

36Ha Saul he’i: Jajepoi ko pyharekuépe Filisteayguakuéra ári, ha jaipe’a ichuguikuéra imba’eita ko’ẽ meve, ha jajukapa jajohúva guive ñanderehe ija’e’ỹvape. Ha ha’ekuéra he’i: Ejapo katu ndéve iporãve háicha. Upéi pe pa’i he’i: Ñañembojapaite Ñanderuete rehe.

37Ha Saul omba’eporandu Ñanderuetépe: Rojupítapa Filisteayguakuéra rapykuéri. Remoĩtapa ichupekuéra Israel pópe. Ñanderuete katu nombohováiri ichupe.

38Upémaramo Saul he’i: Tetãyguakuéra ruvicha pejupaite ápe, peikuaa ha pehecha hag̃ua mávapa oñemoangaipa ko ára kóvape.

39Che ame’ẽma che ñe’ẽ Ñanderuete rérape katuete omanotaha upe oñemoangaipáva oime ramojepe che ra’y Jonatan. Ha hetãyguakuéra okirirĩmbaite.

40Upéi Saul he’i opaite Israelguápe: Peẽ peimembaitéta peteĩ yke gotýo ha che ha che ra’y Jonatan roiméta ambue yke gotýo. Ha hetãyguakuéra he’i Saúlpe: Ejapo katu hi’ã porã háicha ndéve.

41Upéramo Saul oñembo’e Israel Járape he’ívo: Ehechauka oréve pe añetegua. Ha pe po’a ho’a Saul ha Jonatan rehe, hetãyguakuéra katu opyta ipotĩ tembiapo vaígui.

42Ha Saul he’i: Jaity pe po’a che ha che ra’y Jonatan rehe; ha pe po’a ho’a Jonatan rehe.

43Upéramo Saul he’i Jonatánpe: Emyesakã chéve mba’épa rejapóra’e. Ha Jonatan omombe’upa ichupe ha he’i: Añetehápe aikũmbýkuri eírami che pópe agueruva’ekue yvyra puku apỹimi rehe; ápe aĩ, tamano che.

44Ha Saul he’i: Ñanderuete tachehavira pohýi, che ndorojukái ramo, Jonatan, añetehápe nde remanova’erã.

45Upévo Israelguakuéra he’i Saúlpe: Omanova’erã piko Jonatan, pe oguerúva salvacion Israélpe g̃uarã. Ndaupeichaiva’erã, Ñanderuete rérape, ni peteĩ iñakã rague ndo’amo’ãi ichugui yvýpe, heta hembiapo porã ojapókuri Ñanderuete pu’aka rupi. Upéicha tetãyguakuéra oguenohẽ Jonatánpe iñemanorãgui.

46Upévare Saul ndohovéima Filisteayguakuéra rapykuéri; ha’ekuéra ohopa avei hendaguépe.

47Saul oñemoĩ hatã rire tetã ruvicha ramo Israel retã guapyhaguasúpe ojeity opaite tetã ári oñemoĩva Israel rehe ha oikóva guive ijerekuévo: Moab, Amon, Edom, Soba retã ruvichakuéra ha Filisteayguakuérape; ha ohohápe ombopoguypa avei.

48Ha ombyaty peteĩ soldádo aty tuicháva ombopoguy hag̃ua Amalécpe. Ha oguenohẽ avei Israélpe Amalec poguýgui. Upéicha umi Amalecgua nomondavéi Israelguakuérape.

49Saul ra’ykuéra oñemboheta, Jonatan, Isvi ha Malquisua, ha itajýra ig̃uaig̃uivéva héra Merab, ha pe imitãvéva Mical.

50Ha Saul rembireko réra Ahinoam, Ahimaas rajy. Ha isoldádo aty ruvicha réra Abner, Ner ra’y, ha kóva Saul tio voi.

51Saul ru Cis, ha Ner, Abner ru, ha kóva Abiel ra’y.

52Ha oiko ñorãirõ ndetuicha jepéva Filisteayguakuéra ndive Saul oikove aja pukukue; upévare Saul ombyaty ijerekuévo opaite kuimba’e imbarete ha ipy’aguasúva guive.