1 Samuel 7

Guarani 2015 (Ñanderuete Ñe’ẽ Porã 2015)

← Chapter 6 Jump to: Chapter 8 →

1Umi Quiriat-jearimgua ou ha ogueraha Ñanderuete karameg̃ua ha omohenda Abinadab rógape, oĩva peteĩ cérrope; ha oiporavo hikuái Eleazar ra’ýpe oñangareko hag̃ua pe karameg̃ua rehe.

2Pe ára og̃uahẽ guive pe karameg̃ua Quiriat-jearímpe ohasa heta ára, 20 áño rupi, ha mayma Israelgua ojahe’o Ñanderuete renondépe (oikógui Filisteayguakuéra poguýpe).

3Upéi Samuel oñe’ẽ opaite Israel retãyguakuérape he’ívo: Oime ramo pende py’aite guive pejevyse Ñanderuetépe, peipe’a umi jára gua’u ha Astarot pende apytégui, ha peme’ẽke pene ñe’ã (rembipota) Ñanderuetépe g̃uarã, ha pejerovia hese añónte, Ha’e pendesalva hag̃ua Filisteayguakuéra pógui.

4Upémaramo Israel ñemoñarenguéra omboyke Baal ha Astarotkuérape, ha ojeroviánte Ñanderuetére.

5Ha Samuel he’i toñembyaty opaite Israelguakuéra Mizpápe, ha che añembo’éta penderehe Ñanderuetépe.

6Ha oñembyaty hikuái Mizpápe, ha onohẽ hikuái y ha oñohẽ Ñanderuete renondépe, ha ndokarúi upe árape, ha he’i hikuái: Ñande voi ñañemoĩ Ñanderuete rehe ñane angaipa rupi. Samuel ombojovake Israel ñemoñarenguérape Mizpápe.

7Ha Filisteayguakuéra ohendúvo Israel ñemoñarenguéra oñembyatyha Mizpápe, imburuvichakuéra ojupi hikuái henda gotýo, ha Israel ñemoñarenguéra ohendúvo ko’ã mba’e okyhyje Filisteayguakuéragui.

8Upéramo Israel ñemoñarenguéra he’i Samuélpe: Aníke repytu’útei mba’ejerurépe orerehehápe Ñanderuetépe, Ha’e toñangareko orerehe ani hag̃ua ro’a jevy Filisteayguakuéra pópe.

9Ha Samuel oiporavo peteĩ ovechara’y okambúva ha ojuka kuave’ẽmby ojehapypáva ramo Ñanderuetépe g̃uarã. Ha Samuel omba’ejerure Ñanderuetépe Israel rehe, ha Ha’e ohendu ichupe.

10Ha ojehu Samuel oikuave’ẽ jave kuave’ẽmby ojehapypáva Filisteayguakuéra og̃uahẽ oñorãirõ hag̃ua Israel ñemoñarenguéra ndive, Ñanderuete katu ombou pe árape tyapuguasu Filisteayguakuéra ári, upéicha oñemondyipa hikuái, ha Israel ñemoñarenguéra ikatu ipu’aka hesekuéra.

11Ha Israel ñemoñarenguéra omuña Filisteayguakuérape Mizpa guive Bet-car yvy gotýo peve, ha ojuka hikuái hetápe.

12Ha Samuel ojapyhy peteĩ ita ha omoĩ Mizpa ha Sen paũme, ha ombohéra Eben-ha-ézer, he’iséva: Ápeve Ñanderuete ñanepytyvõ.

13Péicha ipu’aka hikuái Filisteayguakuéra rehe, ha ha’ekuéra ndoikevéi Israel retãme; Ñanderuete omopu’ãgui ipo Filisteayguakuéra rehe, Samuel oikove aja pukukue.

14Ha Israel ñemoñarenguéra oñemomba’e jevy umi táva rehe Filisteayguakuéra oipe’amava’ekue Israélgui, Ecron guive Gat peve; ha Israel ohekýi ijyvy Filisteayguakuéra poguýgui, ha oĩ py’aguapy Israel ha Amorguakuéra apytépe.

15Ha Samuel oiko mbojovakehára ramo Israel retãme, ha’e oikove aja pukukue.

16Ha meme áñope oho Bet-el, Gilgal ha Mizpápe ombojovake hag̃ua Israelguakuérape upérupi.

17Upéi ojevy Ramápe, oĩháme hóga, ha upépe ombojovake avei Israelguakuérape; upépe omopu’ã peteĩ kuave’ẽmby renda Ñanderuetépe g̃uarã.

← Chapter 6 Jump to: Chapter 8 →