1 Samuel 6

Guarani 2015 (Ñanderuete Ñe’ẽ Porã 2015)

← Chapter 5 Jump to: Chapter 7 →

1Ñanderuete karameg̃ua oiko Filisteaygua retãme 7 jasy.

2Upémaramo Filisteayguakuéra ohenói ipa’i ha ipaje apohakuérape ha oporandu hikuái ichupekuéra: Mba’épa rojapóta Israel Jára karameg̃uágui. Peikuaaukákena oréve, mba’éichapa roguerahauka jevýta hendaiteteépe.

3Ha’ekuéra he’i: Pemondo ramo Israel Jára karameg̃ua, aníke pemondótei nandiete, peguerahauka pene me’ẽmby reheve Israel Jára pochy ojei jevy hag̃ua pendehegui; ha upéicha pekuerapáta, ha peikuaáta mba’érehepa ndojeíri ipo pende árigui.

4Ha he’i hikuái: Ha mba’eichagua me’ẽmbýpa romondóta. Ha’ekuéra he’i jevy: Pemondo 5 susu’a ra’ãnga órogui, ha 5 anguja oroguiguáva, oĩgui 5 Filisteaygua ruvicha peteĩchagua mba’asýnte penderupitypa ha pende ruvichakuérape avei.

5Upévare pejapo, pende susu’a ha pene anguja ra’ãnga ombyaíva pene retã ha pemomba’eguasu Israel Jarateépe; ikatu mba’e ningo Ha’e ombovevuive ipo pende árigui, pende jára ha avei pende jeikoha árigui.

6Ma’erãpa peñembopy’ahatãse Egiptoyguakuéra ha faraon oñembopy’ahatã haguéicha. Egiptoyguakuéra ohejánte Israelguakuéra osẽ, ohasa asyeterei rire, ndoipotaitéi ramojepe.

7Upévagui pejapo peteĩ cárro ipyahúva, pegueru mokõi vaka imemby ramóva ha ne’ĩrava gueteri ojejokua cangálla (yúgo) rehe, ha pejokua umi vaka pe cárro rehe, imembykuéra katu pemondo jevy pende rógape.

8Upéi pemoĩta Israel Jára karameg̃ua pe cárrope, pene me’ẽmby oroguiguava reheve, ha peheja toho.

9Ha pema’ẽ mbukúta hese, ojupi ramo Israel retã rape rehe Bet-semes gotýo, Israel Jára voi ojapopa ko’ã mba’evaiguasuete ñanderehe; ha upeicha’ỹ ramo, jaikuaáta ndaha’éi hague ipo ñanembyaíva, ãva ojehúnte ojehuva’erãguinte.

10Ha umi kuimba’e péicha ojapo: Ogueru mokõi vaka imemby ramóva ha ojokua peteĩ cárro pyahu rehe, ha omboty imembykuéra hógape.

11Upéi omoĩ Israel Jára karameg̃ua pe cárrope, avei pe karameg̃ua’i anguja ha susu’a ra’ãngakuéra oroguiguáva reheve.

12Umi vaka oguata Bet-semes rape rehe ha oipykúi tape rehe, oguata ombureahápe, opia’ỹ rehe akatúa ni asu gotýo; ha Filisteaygua ruvichakuéra oho hapykuéri Bet-semes rembe’y peve.

13Ha umi Bet-semesgua omono’õ trígo yvypépe; ha ojesarekóvo yvate gotýo ohecha hikuái Ñanderuete karameg̃ua, ha ovy’a joa hikuái ohechávo.

14Ha pe cárro ou Bet-seméspe Josue ñúme, ha opyta oĩháme peteĩ itaguasu; ha ha’ekuéra ombo’i pe yvyra cárro reheguáva, ha oikuave’ẽ kuave’ẽmby ramo umi vaka Ñanderuetépe.

15Ha Levi ñemoñarenguéra omboguejy Ñanderuete karameg̃ua, ha avei pe karameg̃ua’i oĩva hendive, ipype oĩ Filisteaygua me’ẽmby oroguiguáva, ha omoĩ hikuái pe itaguasuetéva ári; upéicha Bet-semesgua kuimba’ekuéra oikuave’ẽ pe árape ko’ã vaka Ñanderuetépe.

16Ha umi 5 Filisteaygua ruvicha ohechávo ko’ã mba’e, ojevy Ecrónpe.

17Filisteayguakuéra ome’ẽva’ekue ko’ã susu’a ra’ãnga Ñanderuetépe g̃uarã ime’ẽmby ramo: Asdod rehe peteĩ, Gáza rehe peteĩ, Ascalon rehe peteĩ, Gat rehe peteĩ, ha Ecron rehe peteĩ.

18Umi 5 anguja ra’ãnga Filisteayguakuéra omondo oĩgui 5 táva oñemombaretéva, oikohápe imburuvichakuéra ha ijerekuévo oĩ ambue tava’i oñemombarete’ỹva. Pe itaguasuete omoĩ haguépe hikuái Ñanderuete karameg̃ua oime gueteri Bet-seméspe, Josue ñúme ko ára peve.

19Ha Ñanderuete ojuka umi kuimba’e Bet-semesguápe, oma’ẽ haguére ikarameg̃ua ryepýre; 50.000 hetãygua apytégui ojuka 70 kuimba’épe. Ha umi tavaygua ojahe’o Ñanderuete ojuka haguére hetápe.

20Ha Bet-semesguakuéra he’i: Mávapa ikatu opyta Ñanderuete heko porãva rovake. Mávapa ikatu ogueraha ko karameg̃ua ñande apytégui.

21Ha omondo ñe’ẽ rerahahára Quiriat-jearimguakuérape, he’iukávo: Filisteayguakuéra ogueruka jevy Ñanderuete karameg̃ua: Peju ha pegueraha.

← Chapter 5 Jump to: Chapter 7 →