1 Samuel 25

Guarani 2015 (Ñanderuete Ñe’ẽ Porã 2015)

← Chapter 24 Jump to: Chapter 26 →

1Samuel omano ha mayma Israelgua, oñembyaty oguerojahe’o hag̃ua ichupe; ha oñotỹ hikuái ichupe hóga ykére, Ramápe. Ha opu’ã David ha oho Paran desiértope.

2Ha Maónpe oikove peteĩ kuimba’e ipirapireitáva ijyvy oĩ Carmélpe, imba’e 3.000 ovecha ha 1.000 kavara. Ha péina oñapĩhína ijovechakuéra Carmélpe.

3Pe kuimba’e réra Nabal, ha hembireko Abigail. Pe kuñakarai iñarandu ha hete porãitereíva, pe kuimba’e katu oñembotuicha ha pya’eiterei oñembopochy rei, peteĩ Caleb ñemoñare añeteguáva.

4David ohendúvo Nabal oñapĩha ijovechakuéra desiértope,

5Omondo 5 karia’y ha he’i ichupekuéra: Pejupi Carmélpe ha tapeho Nabal rendápe ha pemomaitei ichupe che rérape,

6Ha péicha peje ichupe: Toĩ nendive py’aguapy, ha taipy’aguapy nde rogayguakuéra, ha taipy’aguapy mayma oikóva guive nendive.

7Aikuaákuri reñapĩha nde ovechakuéra. Nde ovecha rerekuakuéra oikókuri orendive; ndorojapói hesekuéra mba’eve ivaíva, ha oiko aja pukukue hikuái Carmélpe nokañýikuri ichuguikuéra mba’eve.

8Eporandu ne rembiguaikuérape, ha ha’ekuéra omombe’úta ndéve. Ko’ã karia’y to’a porãite nde resa renondépe, rojúgui ára porãme; ajerure ndéve eme’ẽ hag̃ua ikatumíva ne rembiguaikuérape, ha nde ra’y Davídpe.

9Ko’ã karia’y, David ojokuaiva’ekue, he’i Nabálpe opaite ñe’ẽ David he’iukava’ekue ichupekuéra ha upéi okirirĩ hikuái.

10Nabal katu he’i David remimondokuérape: Máva piko David. Ha máva piko Isai ra’y. Ko’ã ára ko’ãvape oĩ voi heta tembiguái okañýva huvichágui.

11Ha ko’ágã che amboja’ótapa che pan, che y ha so’o ambosako’iva’ekue che ovecha apĩharakuérape g̃uarã, ha ame’ẽta piko kuimba’ekuérape aikuaa’ỹre mamoguápa hikuái.

12Ha David remimondokuéra ou jevy David rendápe ha omombe’upa ichupe Nabal ñe’ẽngue.

13Upémaramo David he’i iñirũnguérape: Pemoĩmba pende ku’a rehe pende kyse puku ha avei David omoĩ iku’a rehe ikyse puku; ha 400 kuimba’e ojupi David rapykuéri ha 200 opyta oñangareko hag̃ua imba’ekuéra rehe.

14Ha peteĩ Nabal rembiguái omombe’u Abigail, Nabal rembirekópe, he’ívo: Péina David omboúkuri ñe’ẽ reruharakuéra, omomaitei hag̃ua ore patrónpe, ha’e katu oja’o ichupekuéra.

15Umi kuimba’e heko porã kuri orendive, ha araka’eve ndaorereko asýi, ha mba’eve nokañýi roiko aja pukukue hendivekuéra, roiko ramoguare ñu rehe ha’ekuéra oikoha rupi avei.

16Ñemo’ãha ramo oiko hikuái ore jerekuévo, ára ha pyhare, roiko aja pukukue ijypypekuéra oñangareko porã ore patron ovechakuéra rehe.

17Ko’ág̃a ejepy’amongeta porã ha ehecha mba’épa rejapóta, mba’evai katuete oútama ore patron ha hogayguakuéra ári; iñañaitereígui, ndaipóri avave ikatúva oñe’ẽ ichupe.

18Upémaramo Abigail ojapyhy 200 pan, mokõi víno ryru kavara pirekueguiguáva, 5 ovecha jypyréva, 5 kílo mba’e ra’ỹi imaimbepyréva, 100 apesã parral’a ikãmbyréva ha 200 pan he’ẽ hígo ikãmbyreguiguáva, ha ohupipaite iburrokuéra apére.

19Ha he’i hembiguaikuérape: Tapeho che renonderãme, upéi che aháta avei pende rapykuéri. Ha mba’evete nomombe’úi iména Nabálpe.

20Ha ojupi peteĩ búrro ári ha oguejy peteĩ tape ñemi rupi pe cérrogui; ha péina David ha iñirũnguéra ouhína henonderãitépe, ha ha’e osẽ hug̃uaitĩvo ichupe.

21Ha David he’i voi kuri: Reietépa añangarekóra’e ko kuimba’e rymba rehe desiértope aipe’a’ỹre hymba apytégui mba’eve; ha ha’e omyengovia chéve mba’evaietépe che mba’eporãre hendive.

22Ñanderuete tachehavira ha avei tombojoapyve gueteri chéve ijehavira nahundipáirõ ko’ẽ meve opaite kuimba’e oikovéva guive Nabal ndive.

23Ha Abigail ohechávo Davídpe, pya’ete oguejy hymba búrrogui, ha ojeity David renondépe.

24Ha he’i: Che jára, cheárina topyta che ména rembiapo vai; ikatúpa añe’ẽmi nde apysápe ha ehendumi ne rembiguái ñe’ẽ.

25Anína repena pe kuimba’e ñaña Nabal rehe, ha’e itavyeterei, héra voi omombe’u háicha. Héra Nabal, upévagui iñakã tarova voi; ha che ne rembiguái ndahecháinte ne rembijokuaikuérape.

26Upévare ko’ág̃a, che jára, Ñanderuete ha ne ánga rekovére Ha’e ndohejái gueteri reñohẽ tuguy, ha remyengoviapa nde po rupiete. Nabálicha toiko nderehe ija’e’ỹva, ha mayma oñeha’ãva ojapo hag̃ua ivaíva nde, che jára rehe.

27Péina ápe, ko’ã jopói ne rembiguái ogueru che járape, toñeme’ẽ ne irũnguérape oikóva guive che jára ndive.

28Ha che ajerure asy ndéve eperdonami ne rembiguáipe oñe’ẽ vaiete haguére, Ñanderuete voi omoingóta opaite árape che jára róga, reñorãirõgui Ñanderuete ñorãirõ, ha reikove aja ndojejohúi ndepype tembiapo vai.

29Oĩ ramojepe opu’ãva nderehe, ha oipe’aséva nde rekove, upeichavérõ jepe nde che jára rekove toñeñapytĩ umi aty oikovéva Ñanderuete rovake ndive, ha Ha’e omombóta umi nderayhu’ỹva rekove oñemombo háicha pe ita hondítape.

30Ha og̃uahẽ vove pe ára Ñanderuete he’iva’ekue nderehe, Ha’e voi nemboguapýta Israel ruvicha guapyhápe.

31Upéramo, nde che jára natekotevẽmo’ãi reñembyasy térã reñemyangekõi reñohẽ rei haguére tuguy, térã reñemyengovia haguére nde po rupi, upévare nde che jára ejejokókena, ha Ñanderuete voi ojapo vove mba’e porã che jára rehe, nemandu’amíke ne rembiguái rehe.

32Ha David he’i Abigáilpe: Toñemomba’eguasu Israel Jára nembou haguére ko ára kóvape cherug̃uaitĩvo.

33Ha toñemomba’eguasu nde reko arandu nde resẽgui chejoko hag̃ua añohẽ mboyve tuguy, che potee rupi amyengovia Nabal rembiapo vai.

34Israel Jára voi ndohejái ajapo nderehe ivaíva, ha nderejúi rire pya’e pya’e cherug̃uaitĩvo, katuete ko’ẽramo g̃uarã ndoikoveimava’erãmo’ã Nabal rógape peteĩ kuimba’e jepe.

35Ha Abigail ome’ẽ opaite mba’e ogueruva’ekue ichupe, ha David he’i: Angapytu’u reheve ejupi jevy nde rógape, ha eikuaa porãke ahendu hague ne ñe’ẽ, ndajapomo’ãiha mba’eve ivaíva penderehe.

36Ha Abigail oho jevy Nabal rendápe, ha péina ha’e oguerekohína karuguasu umi tetã ruvicha ojapo háicha; ha Nabal ovy’a ipy’apýpe, tuicha oka’úgui, Abigail katu nde’íri ichupe mba’eve, ko’ẽ jevy peve.

37Ha ko’ẽramo, Nabal ojeráma ramo oka’u rire, hembireko omombe’upa ichupe ojehuva’ekue guive; ha upéva ombopy’a kangy ichupe, ha opyta peteĩ itáicha.

38Ha 10 ára haguépe, Ñanderuete ombohasyeteve Nabálpe omano hag̃ua.

39David ohendúma ramo Nabal omano hague he’i: Toñemomba’eguasu Ñanderuete, Ha’e voi ombojovake Nabálpe oiko vai haguére ha ndohejaiva’ekue che ajapo mba’evaiete. Upéi David omondo hembijokuái oñe’ẽ hag̃ua Abigail ndive, ha’e omoneĩ ramo oiko hag̃ua hembireko ramo.

40Upéicha David rembiguaikuéra og̃uahẽ Abigail rendápe, Carmélpe, ha oñemongeta hendive ha oporandu: Ha’épa oikose David rembireko ramo.

41Ha ha’e opu’ã oñakãity yvy rehe, ha he’i: Na’ápe aĩ David rembiguái ramo, ha aĩ ambojepyhéi hag̃uáicha che jára rembiguaikuérape.

42Upéi Abigail pya’e opu’ã ha ogueraha 5 kuñataĩ, hembiguáirõ, ha ojupi hymba búrro ári ha oho David rembijokuaikuéra rapykuéri, ha oiko David rembireko ramo.

43David oñemohembireko avei Ahinoam, Jizreelgua rehe, ha mokõivéva oiko hembireko ramo.

44Saul ome’ẽma Mical, David rembireko, Palti, Lais ra’ýpe, oikóva Galímpe.

← Chapter 24 Jump to: Chapter 26 →