1 Samuel 19

Guarani 2015 (Ñanderuete Ñe’ẽ Porã 2015)

← Chapter 18 Jump to: Chapter 20 →

1Saul oñe’ẽ ita’ýra Jonatánpe ha opaite hembiguaikuérape ojuka hag̃ua Davídpe; Jonatan, Saul ra’y, katu ohayhueterei Davídpe.

2Ha Jonatan voi omombe’u Davídpe, he’ívo: Che ru Saul oñeha’ãmbaite ndejuka hag̃ua; upévare eñangarekóke ndejehe pyhareve peve, ha ekañy rekañykuaahápe.

3Ha che asẽta che ru ndive ñúme ha aiméta hendive mamo nde reikoha rupi, ha añe’ẽta ichupe nderehe, ha che aikuaaukáta ndéve oĩva guive che ru py’apýpe.

4Ha Jonatan oñe’ẽ porã itúvape David rehe, ha he’i ichupe: Anína che retã ruvicha, rejapo ivaíva ne rembiguái David rehe, ha’e ndojapói mba’eve ivaíva nderehe, hembiapokuéra iporã uvei ndéve g̃uarã.

5Ha’e omoĩ hekove jepe ne rembipota poguýpe ojeitývo Filisteaygua ári, ha’erupi Ñanderuete ome’ẽ tuicha pytyvõ mayma Israelguápe. Nde reikuaapa ko’ã mba’e ha revy’ákuri, mba’upépa ko’ág̃a reñemoangaipáta tuguy imarã’ỹva rehe, rejuka rei ramo Davídpe.

6Ha Saul ohendu Jonatan ñe’ẽ, ha Saul ome’ẽ iñe’ẽ Ñanderuete rérape, he’ívo: David nomanomo’ãi.

7Ha Jonatan ohenói Davídpe, ha omombe’u ichupe ko’ã ñe’ẽ; ha Jonatan voi ogueru Davídpe Saul rendápe, ha oiko henondépe jepiguáicha.

8Upéi oiko jevy ambue ñorãirõ Filisteayguakuéra ndive, ha David ojapo sarambi hesekuéra ija’e’ỹva apytépe, ha ha’ekuéra okañy David renonderãgui.

9Ha peteĩ pytu ñaña Ñanderuete ombouva’ekue ou Saul rendápe; ha oguapyhápe hógape oguereko ipópe peteĩ yvyra puku akua, David ombopu aja hi’árpa.

10Ha Saul ojakutusemo’ã Davídpe tápia rehe ijyvyra puku akuápe; ha David ojehekýi Saul renondégui, ha pe yvyra puku akua ojekutu tápia rehe; upévare David okañy pe pyharépe Saul rógagui.

11Upéi Saul omondo omaña ñemiva’erã David rehe hógape, ojukauka hag̃ua ichupe pyharevete. Ha Mical, David rembireko, omomarandu ichupe he’ívo: Nde nerekañýi ramo ko pyhare kóvape, ko’ẽ ramo nde ndereikovemo’ãvéima.

12Ha Mical omboguejy Davídpe hovetã rupi, péicha ha’e okañy ha osalva hekove.

13Upéi Mical omoĩ ijára rete ra’ãnga hupápe, ha omyakãngyta peteĩ aramboha kavara raguekueguiguápe, ha oñu’ãmba ijaópe.

14Ha Saul omondo oapresa hag̃ua Davídpe; Mical katu he’i: Oime hasy.

15Upéi Saul omondo jevy hembiguaikuérape ogueru hag̃ua Davídpe, he’ívo: Pegueru hupa reheve ajuka hag̃ua.

16Ha Saul rembiguái oikévo ikotýpe, péina ojohu hupápe peteĩ jára gua’u rete ra’ãnga, ha peteĩ aramboha kavara raguekueguiguáva iñakã rendag̃uáme gotýo.

17Upéramo Saul he’i Micálpe: Mba’érehepa péicha chembotavy, ha reheja cherehe ija’e’ỹvape okañy. Ha Mical he’i ichupe: Ha’e ningo he’i chéve: Ehejáke taha, ndaupéichai ramo rojukáta.

18David okañy ha ou Samuel rendápe, Ramápe, ha omombe’upa ichupe Saul ojapova’ekue guive hese. Upéi David ha Samuel oho oiko hag̃ua profetakuéra rekohápe.

19Ha oñemombe’u Saúlpe, péina ág̃a David oime Ramápe, profetakuéra rekohápe.

20Upéramo Saul omondo hembiguaikuérape ogueru hag̃ua Davídpe, ha umía ohug̃uaitĩ umi proféta remimbo’ekuéra oprofetizavahína ha Samuel omyakã ichupekuéra. Ha Ñanderuete Pytu Porãitéva ou avei Saul rembijokuaikuéra ári ha ha’ekuéra oprofetiza avei hendivekuéra.

21Saul oikuaávo upéva omondo jevy ambue hembijokuaikuéra, ko’ãva upéicha oprofetiza avei. Ha Saul omondo jevy ambue hembijokuaikuérape, ha’ekuéra avei oprofetiza.

22Upémaramo ha’ete voi oho Ramápe, ha og̃uahẽvo pe yvykuaguasu oĩva Secu ypýpe, oporandu he’ívo: Mamópa oime Samuel ha David. Ha peteĩ he’i ichupe: Péina oime Naiot Rama peguápe, profetakuéra rekohápe.

23Ha oho profetakuéra rekohápe Ramápe, ha Ñanderuete Pytu Porãitéva ou avei hi’ári ha ohokuévo oprofetiza avei og̃uahẽ meve Ramápe.

24Ha Saul oipe’a ijaokuéra, ha oprofetiza Samuel rovake ha oiko opívo upe ára ha pyhare javeve. Péva rupi oje’e: Saul piko oikóma avei profetakuéra apytépe.

← Chapter 18 Jump to: Chapter 20 →