1 Samuel 3

Guarani 2015 (Ñanderuete Ñe’ẽ Porã 2015)

← Chapter 2 Jump to: Chapter 4 →

1Pe mitãrusu Samuel oiko Ñanderuete rembijokuái ramo Eli poguýpe; umi ára umíape pokã Ñanderuete ñe’ẽ ojehechauka; ha techaukapy yvagaguiguáva naipy’ỹiri avei.

2Ha ojehu peteĩ árape Eli oñeno jave hína ikotýpe, oñepyrũvo ndohechavéi, hesa iñypytũgui.

3Peteĩ pyharépe Samuel oke aja Ñanderuete rógape, oĩháme pe karameg̃ua oñemboykéva Ñanderuetépe g̃uarã ha pe tataindyenda oñembogue mboyve,

4Ñanderuete ohenói Samuélpe; ha ha’e ombohovái: Na’ápe aĩ,

5ha oñani Eli rendápe, he’ívo ichupe: Ápe aĩ, mba’erãpa cherenói. Ha Eli he’i ichupe: Che norohenóiri, tereho ha eñeno jevy. Ha ha’e oho ha oñeno jevy.

6Ha Ñanderuete ohenói jevy Samuélpe, ha ha’e opu’ã jevy ha ou Eli rendápe ha he’i: Na’ápe aĩ, mba’erãpa nde cherenóira’e. Ha ha’e he’i jevy: Che ra’y, che norohenóiri, tereho eñeno jevy.

7Upérõ Samuel ne’ĩra gueteri oikuaa Ñanderuetépe, ha iñe’ẽ avei ne’ĩra gueteri hesakã ichupe.

8Ha Ñanderuetépe ohenói jevy Samuélpe. Ha ha’e opu’ã ha og̃uahẽvo Eli rendápe, he’i ichupe: Na’ápe aĩ, mba’erãiko cherenóira’e. Upévo hesakã Elípe Ñanderuete ohenói hague pe mitãrusúpe.

9Ha Eli he’i Samuélpe: Tereho ha eñeno, ha nerenói jevy ramo eréta: Eñe’ẽ, che Jára, ne rembiguái nerendureína; ha upéicha Samuel oho ha oñeno jevy hupápe.

10Ha Ñanderuetépe jepiguáicha ohenói jevy: Samuel, Samuel; upéramo Samuel he’i: Eñe’ẽ, ne rembiguái nerendureína.

11Ha Ñanderuete he’i Samuélpe: Eikuaa porãke, Israel retãme Che ajapóta peteĩ mba’e, ha ohendúva guive péva ijapysa jovaivéva opúta.

12Upe ára upévape ajapóta Eli rehe opaite mba’e ha’emava’ekue hóga rehe, iñepyrũmby guive ipahaite peve.

13Ha ahechaukáta ichupe, Che ambojovaketaha iñemoñarenguérape opaite árape, pe aña reko ha’e voi oikuaamava’ekue rehe: Ita’yrakuéra oñe’ẽ vai cherehe, ha ha’e ndojokói ichupekuéra.

14Upévarehe Che ame’ẽma che ñe’ẽ chejupe Eli rogayguakuéra rehe, ha’évo: Eli rogaygua aña reko noñemboguemo’ãi araka’eve tymba rekovekue rupi térã ambue kuave’ẽmby rupi.

15Samuel oñeno ko’ẽ meve, ha oipe’a rire Ñanderuete róga rokẽ, ha’e okyhyje omombe’u hag̃ua Elípe umi ñe’ẽ ohendúva guive.

16Eli katu ohenói Samuélpe, ha he’i ichupe: Che ra’y, Samuel, ha ha’e ombohovái, na’ápe aĩ.

17Ha Eli he’i: Mba’eichagua ñe’ẽpa oje’éra’e ndéve. Ajerure ndéve anítei reñomi chehegui mba’eve; Ñanderuetépe tandehavira ha tombojoapyve reñomi ramo chehegui peteĩ mba’emínte jepe oje’eva’ekue guive ndéve.

18Ha Samuel omombe’upa ichupe, oñomi’ỹre ichugui mba’eve. Upémaramo Eli he’i: Ñanderuetépe tojapo iporãve háicha ichupe.

19Ha Samuel okakuaa, ha Ñanderuetépe oĩ hendive, ha ndohejái ho’a yvy rehe peteĩ iñe’ẽngue.

20Ha opaite Israelgua, Dan guive Beerséba peve, oikuaa Samuel Ñanderuete proféta añeteguaha.

21Ha Ñanderueté ojekuaaukave Samuélpe iñe’ẽ rupi, Sílope.

← Chapter 2 Jump to: Chapter 4 →